1 Wisi bi bu du, bu ra mɔru suresiewa, adama gari gerubu ka dam biya bu ra mɔru seesie. 2 Bwisigiin gari yi ra de tɔnu u yɛ̃ru kasu, adama gari bɔkɔn nɔɔ, wiira gariya ga ra n saarimɔ. 3 Yinni Gusunɔn nɔni wãawa yam kpuro. Yi tɔn kɔ̃sobu ka gemgibu mɛɛra. 4 Gari yi yi nukuru yɛmiasiamɔ yiya yi ra ka wãaru nɛ, adama gari kam yi ra tɔnun gɔ̃ru sankuwa. 5 Wi u ra win baaban sɔ̃ɔsiru atafiiru ko, gari bɔkɔwa, adama wi u ra gerusibu wure, win bwisi koo sɔ̃ɔsira. 6 Gemgiin yɛnuɔra arumani baka wãa, adama ye tɔn kɔ̃soba mɛnnamɔ, wahalawa ya ra ka nɛ. 7 Bwisigibun nɔɔwa ga ra n yɛ̃ru kparamɔ, adama bwisi sarirugibun gɔ̃ru ga ǹ sãa mɛ. 8 Yinni Gusunɔ u ku ra tɔn kɔ̃sobun yãkuru waabu kã, adama gemgibun kanaru ta ra nùn wɛ̃re. 9 Yinni Gusunɔ u tɔn kɔ̃sobun swaa tusa, adama be ba gea mɔ̀, beya u kĩ. 10 Wi u swaa gea deri, ba koo yɛ̃ro sɛɛyasiawa gem gem. Wi u maa sɛɛyasiabu yina, u koo gbiwa. 11 Yinni Gusunɔ u yɛ̃ ye ya kooramɔ gɔribun wãa yerɔ. Kaa sere gere tɔnun gɔ̃ruɔ? 12 Wi u tii sue, u ku ra kã bu nùn gerusi. U ku ra maa kã bwisigibu bu nùn bwisi kɛ̃. 13 Nuku doba bu ra wuswaa dɛɛrasie, adama nuku sankiraru ta ra wuswaa burisinɛwa. 14 Wi u bwisi mɔ, u ra yɛ̃ru kasuwa, adama gari bɔkɔ u ra n buriwa win gari bakaru sɔɔ. 15 Wɔnwɔndo u ra n wãawa wahala sɔɔ baadomma, adama doo nɔɔrugii, u ra n tɔ̃ɔ bakaru mɔ̀wa saa baayere. 16 N buram bo a n sãa sãaro, kpa a n Yinni Gusunɔ nasie, n kere a n dukia mɔ kpa a n wurure. 17 N sanɔ bo a di ka kpee wurusu yɛnu mi kĩra wãa, n kere a di ka yaa gumgia yɛnu gèn mi tusira wãa. 18 Wi u mɔru mɔ, u ra sannɔsu seeyewa, adama wi u suuru mɔ u ra su kpeesiewa. 19 Yikuron swaa ya ra n sãki yibawa. Wi u gem swĩigia kpa ya n dɛɛre. 20 Bii bwisigiiwa u ra de win tundon nukura n do, adama bii gari bɔkɔ u ra win mɛro gɛmwa. 21 Gari baka kookoosu su ra gari bɔkɔ dorewa, adama wi u bwisi mɔ, daa gea u ra ko. 22 Wi u ku ra bwisi bikie win himban sɔ̃, ya ku ra koore, adama wi u bwisi kɛ̃ɔbu mɔ, win himba ya ra koorewa. 23 Wi u gari wisibu tuba saa ye n weenɛ, u ra n nuku dobu mɔwa. 24 Wi u bwisi mɔ, u ra wãarun swaa swĩiwa, kpa u swaa deri ye ya dɔɔ gɔɔwɔ. 25 Yinni Gusunɔ u ra tii suon diru surewa, adama u ku ra de bu gɔminin tem kɔɔrɔ mure. 26 Yinni Gusunɔ u bwisi kɔ̃si tusa, adama gari yi yi kĩru sɔ̃ɔsimɔ, yiya yi ra nùn dore. 27 Wi u ra gobi kasu ka swaa kɔ̃sa, u win yɛnu wahala dokemɔwa, adama wi u nɔm biran kɛ̃nu tusa, u ko n wãawa. 28 Gemgii u ra bwisikuwa u sere wisi, adama gari kɔ̃siya tɔn kɔ̃so u ra n saarimɔ. 29 Yinni Gusunɔ u ku ra tɔn kɔ̃son kanaru laakari ko, adama u ra gemgiin kanaru nɔ. 30 À n tɔnu mɛɛra ka kĩru, u ko n nuku dobu mɔ. À n maa tɔnu labaari dora sɔ̃ɔwa, ya ra nùn dam kɛ̃. 31 Wi u gerusibu wura bi bu koo nùn faaba ko, u ko n wãawa bwisigibun wuurɔ. 32 Wi u sɔ̃ɔsiru yina, u tii mɛɛra mɔ̀wa, adama wi u wura ba nùn gerusi, u koo bwisi wa. 33 À n kĩ a bwisi ko, a de a gina Gusunɔ nasia. À n kĩ a bɛɛrɛ wa, a de a gina tii kawa.
