Mɔnnu 14

1Tɔn kurɔ bwisigii u ra yɛnu tãsisiewa, adama tɔn kurɔ gari bɔkɔ u ra yɛnu gowa. 2Wi u sĩimɔ gem sɔɔ, u Yinni Gusunɔ nasiewa, adama wìn sanu sanusu su ǹ dɛɛre, u nùn gɛmawa. 3Gari bɔkɔn tii sua gari yi ra dewa bu nùn bokuru so, adama bwisigiin yara ya ra nùn kari gbarewa. 4Biranu nu ra yɔ̃rewa diinu mi naa wuku sari. Naa gea ya ra ka arumani baka nɛ. 5Seeda dio wi u naanɛ mɔ, u ku ra weesu ko. Seeda weesugian dio ku ra gem gere. 6Tɔn yaa kasikio ù n bwisi kasu u ku ra wa, adama wi u laakari mɔ, n ku ra n sɛ̃ u ka yɛ̃ru wa. 7A gari bɔkɔ duka suurio, domi a ǹ gari bwisigii nɔɔmɔ win nɔɔn di. 8Bwisigii u ra n win sanu sanusu laakari sãawa, adama gari bɔkɔ u ra kɔ̃ɔrewa win gari bakarun sɔ̃. 9Gari bɔkɔ u ku ra bwisiku u win toraru sɔmɛ, adama gemgibun suunu sɔɔ, duroma mu ra n wãa. 10Baawurewa u ra n win nuku sankiranu ka win nuku dobun kpãaru yɛ̃. Goo sari wi u koo kpĩ u ka nùn ye bɔnu ko ka gem. 11Tɔn kɔ̃sobun yɛnu ga koo gbiwa, adama gemgibun yɛnu ga koo kuurawa baa gà n sãa nge kuru tɔna. 12Tɔnu ra n tamaa win sanu sanusu su wãwa, adama gɔɔwa sin kɔkɔrɔ. 13Yɛ̃ɛsu koo kpĩ su tɔnun nuku sankiranu bere. Mɛya maa nuku dobu koo kpĩ bu gɔsira nuku sankiranu. 14Tɔn kɔ̃so u koo win kookoosun are wa. Nge mɛya tɔn geo u koo maa wigisun are wa. 15Be ba ra gari wure fuuku, ba ra naanɛ kowa kpuro ye ba bu sɔ̃ɔwa, adama bwisigii u ra n win sanu sanusu laakari sãawa. 16Bwisigii u ra durum bɛrum kowa, kpa u ye deri, adama gari bɔkɔ u ra kpuro kowa bɛrum sari. 17Wi u ra mɔru se fuuku, gari baka kookoosa u mɔ̀. Wi u bwisi kɔ̃si yiba, u tii tusiru guremɔwa. 18Be ba ku ra bwisiku bu sere gari wura, gari bakara ya ra bu marue. Be ba maa laakari mɔ, yɛ̃ra ta ra ko ben bɛɛrɛ. 19Tɔn kɔ̃sobu ba koo tɔn geobu yiirawa bu bara ko. 20Goo ku ra sãaro kã, baa ka win berusebu, ba ra n nùn tusawa, adama gobigii u ra n bɔrɔba yibawa. 21Wi u win beruse gɛma, durumwa u kua, adama wi u sãarobun wɔnwɔndu mɔ, u koo domaru wa. 22Be ba ra kɔ̃sa bwisiku, ba kɔ̃ɔrewa, adama be ba ra gea bwisiku, durom ka gema ba ra sɔ̃ɔsi. 23Sɔmburu kpurowa ta ra n are mɔ, adama gari saarinu, sãara nu ra ka nɛ. 24Dukia ya sãawa bwisigiin are, adama gari bɔkɔ, gari baka kookoosa su ra n nùn wãasi. 25Seeda dio gemgii u ra tɔmbun hunde wɔrewa, adama wee kowo, weesa u ra n sãamɔ. 26Wi u Yinni Gusunɔ nasie, tãsi yee damgira u mɔ mi. Gusunɔwa u ra maa yɛ̃ron bibu kɔ̃su. 27Yinni Gusunɔn nasiaru ta sãawa wãarun nuuru. Teya ta ra tɔnu yare gɔɔn yinan di. 28Tɔn dabira ta sãa sina bokon bɛɛrɛ, adama win tɔmbu bà n yarina, win banda nim surewa. 29Wi u ku ra mɔru ko fuuku, bwisi bɛkɛya u mɔ, adama wìn mɔru ya ra se fuuku, gari bakara u ra sɔ̃ɔsi. 30Bwɛ̃ra yà n kpĩ, ya sãawa wasin alafia, adama nisinu nu sãawa nge bara te ta ra kukunu tem. 31Wi u sãaro dam dɔremɔ, u win taka kowo torarimɔwa, adama wi u nùn wɔnwɔndu kua, u taka kowo wi bɛɛrɛ wɛ̃ɛmɔwa. 32Tɔn kɔ̃so, nuku kɔ̃sura ta ra nùn fuke, adama gemgii u ra n tororu sɔ̃wa baa gɔɔn wuswaaɔ. 33Bwisigiin gɔ̃ruɔ laakariwa ya ra n wãa, adama ba ǹ kpɛ̃ bu ye wa gari bɔkɔn mi. 34Gem mu ra temgibu bɛɛrɛ dokewa, adama durum ya ra bu sekuru dokewa. 35Sina asakpɔ bwisigiiwa sunɔ u ra ka nɔnu geu mɛɛri, kpa u ka wi u nùn sekuru dokemɔ mɔru ko.

will be added

X\