Mɔnnu 13

1Bii bwisigii u ra win tundon sɔ̃ɔsiru swĩiwa, adama bii wi u tii sue, u ku ra gerusibu kã. 2Gemgibu ba ra ben garin are wa, adama tɔn kɔ̃sobu, dam dɔrenaan wãara ba ra n wãa. 3Wi u win nɔɔ kpĩa u win hunde kɔ̃suwa, adama wi u ra gari gere yabi u tii kari bɔriemɔwa. 4Yikuro u ra n gãanun binɛ mɔwa ni u ǹ kpɛ̃ u wa, adama wi u ra sɔmburu ko u ra wawa ye u kĩ. 5Gemgii u ku ra weesu kã, adama tɔn kɔ̃so u ra tii sekuru dokewa. 6Wi u win tii nɛni dee dee, win daa gea ya koo nùn kɔ̃su, adama wi u kɔ̃sa mɔ̀, kɔ̃sa ya koo nùn sura. 7Gobigiin kookoosa gabu ba ra n mɔ̀, adama ba ǹ gãanu mɔ. Kpa gabu ba n sãa nge sãarobu, adama beya ba arumani mɔ. 8Gobiya gobigii u ra ka win wãaru yakie, adama goo ku ra sãaro wɔri. 9Gemgii u ra n ballimɔwa nge yam bururam, adama tɔn kɔ̃so u sãawa nge fitila ge ga gɔɔ dɔɔ. 10Tii suabu bu ra ka sannɔ nɛwa, adama wi u ra ka bwisi kɛ̃ru sɔmburu ko, bwisigiiwa. 11Dukia ye tɔnu wa ka keetan swaa ya ra doonɛwa fuuku, adama ye tɔnu waamɔ fiiko fiiko ka swaa gea, ya ra sosiwa. 12Ye tɔnu yĩiyɔ yà kun koore, ya ra nùn kowa barɔ, adama yĩiyɔ bi bu yibiara bu ra kowa nuku doo bakabu. 13Wi u bwisi kɛ̃ru yina u koo yen are wa. Wi u maa tu wura u koo yen are wa. 14Bwisigiin sɔ̃ɔsiru ta sãawa wãarun nuuru. Ta ra tɔnu yarewa gɔɔn yinan di. 15Bwisigiin bwisi yi ra dewa bu nùn bɛɛrɛ wɛ̃, adama tɔn kɔ̃son sanu sanusu su ra nùn kam kowa. 16Wi u laakari mɔ u ra bwisikuwa u sere gãanu ko, adama gari bɔkɔ ga ra gen gari bakaru tɛriewa. 17Sɔmɔ kɔ̃so, wahalawa u ra ka nɛ, adama sɔmɔ geo u ra tɔmbu nukuru yɛmiasiewa. 18Wi u sɔ̃ɔsiru yina u koo kowa sãaro kpa u sekuru wa, adama wi u tu wura wiya u koo bɛɛrɛ wa. 19Ye tɔnu u kĩ, yà n koora, ya ra nùn nuku dobu wɛ̃wa, adama tɔn kɔ̃sobu ba ku ra kã bu ben kɔ̃sa deri. 20Wi u ra bwisigii bere, u koo bwisi wa. Wi u ra n maa wãa ka gari bakasu, u koo kɔ̃sa wa. 21Kɔ̃sa ya ra durumgibu naa swĩiwa, adama duroma mu ra ko gemgibun are. 22Tɔn geon dukia ya ra kowa win bibun bweserugia, adama tɔn kɔ̃sogia ya ra kowa gemgibugia. 23Sãarobu ba ra dĩa geenu wa ben gberun di, adama gabugia ra gberewa yèn sɔ̃ ba ǹ gem swĩi. 24Wi u ku ra win bii sɛɛyasie u ǹ nùn kĩwa, adama wi u nùn kĩ u ra nùn sɛɛyasiewa. 25Gemgii u ra n deburu mɔwa, adama tɔn kɔ̃so u ra n gɔ̃ɔru barɔwa.

will be added

X\