Mɔnnu 11

1Yinni Gusunɔ u ku ra kã ba n kianu yĩirumɔ ka kilo ye ya ǹ sãa dee dee, adama u kĩwa ba n yĩirumɔ ka ye ya sãa dee dee. 2Tii suabu bu ra ka gɛndu nɛwa. Be ba tii kawe bera ba bwisi mɔ. 3Gemgiin gem kobu bu ra nùn kparewa win wãaru sɔɔ, adama wi u ǹ naanɛ mɔ, u ra gbiwa win weesun sɔ̃. 4Dukia kun kpɛ̃ yu tɔnu wɔra Gusunɔn siribun sanam, adama gem mu ra tɔnu wɔre gɔɔn di. 5Gemgiin dɛɛraru ta ra dewa win swɛɛ yi n wã, adama tɔn kɔ̃so u ra kɔ̃ɔrewa win nuku kɔ̃surun sɔ̃. 6Gemgiin dɛɛraru ta ra nùn kari gbarewa, adama tɔn kɔ̃son tiin binɛ ya ra nùn yina mwɛwa. 7Tɔn kɔ̃so u ra gbiwa ka win yĩiyɔbu sannu. Yĩiyɔ bi u raa doke win dukia sɔɔ, kpa bu kam ko. 8Gemgii u ra yariwa nuku sankiranun di, kpa tɔn kɔ̃so u kɔsire ko ni sɔɔ. 9Wi u Gusunɔn wãaru sikimɔ, u win winsim kpeerasiamɔwa ka win gari, adama gemgibu ba ra yariwa min di ben yɛ̃run sɔ̃. 10Sanam mɛ gemgiba kuuramɔ, wuugibu ba ra n nuku dobu mɔwa. Tɔn kɔ̃sobu bà n maa biru wura, ba ra n yɛ̃ɛrimɔwa. 11Gemgiba ba ra de wuu gu kuura, adama tɔn kɔ̃sobu ba ra gu gowa ka ben gari. 12Wi u win winsim gɛma u sãawa gari bɔkɔ, adama wi u laakari mɔ, u ra mariwa. 13Wi u ra tɔnun kɔ̃sa saari, u ku ra tɔmbun asiri bere, adama naanɛgii u ra ye berewa win tii sɔɔ. 14Tɔn be ba ǹ kparo mɔ ba ra kam kowa, adama be ba bwisi kɛ̃ɔ dabiru mɔ beya ba ra n wãa bɔri yɛndu sɔɔ. 15Wi u nɔɔ mwɛɛru kua u nɛɛ, u koo win winsim dibu kɔsia, u koo wahala wa, adama wi u yina u nɔɔ mwɛɛru ko, u ko n wãawa bɔri yɛndu sɔɔ. 16Kurɔ geowa u ra siarabu wa, adama be ba tɔmbu dam dɔremɔ, dukia tɔnawa ba ra wa. 17Tɔn geo, gea ye u mɔ̀, wi sɔɔra ya ra wure. Mɛya maa tɔn kɔ̃so, kɔ̃sa ye u mɔ̀, wi sɔɔra ya ra wure. 18Tɔn kɔ̃son sɔmburun are kun arufaani mɔ, adama wi u gem swĩi, are geeya u ra n mɔ. 19Wi u wura u gem swĩi, u ko n wãawa, adama wi u kɔ̃sa naa gire u koo gbiwa. 20Yinni Gusunɔ u tɔn kɔ̃sobu tusa, adama bèn sanu sanusu dɛɛre, bera u ra ka nɔnu geu mɛɛri. 21Ba koo tɔn kɔ̃sobu sɛɛyasiawa kam kam, adama gemgibu ba koo faaba wa sere ka ben bibun bweserɔ. 22Kurɔ burɔ gari bɔkɔ u sãawa nge kurusɔ ge ba wuran taabu dokeye wɛ̃rɔ. 23Gea gemgii u ra n kasu u ko, adama ye tɔn kɔ̃so u kĩ kpuro, Gusunɔn mɔruwa ya ra seeye. 24Wi u ra wɛ̃ ka nuku tia, wiya u ra ko arumanigii. Wi u ku ra mɛnam kã, u ra tii sãaru kpɛ̃ɛwa. 25Nuku tiagii u koo dukia wa n kpã. Wi u win winsim nim kã, ba koo maa yɛ̃ro nim kɛ̃. 26Wi u ra win dĩanu bere are bɛkɛn sɔ̃, wiya ba ra bɔ̃rusi, adama wi u dɔramɔ, wiya ba ra domaru kue. 27Wi u gea mɔ̀, u koo Gusunɔn domaru wa, adama wi u bwisikumɔ u kɔ̃sa ko, kɔ̃sa ya koo yɛ̃ro deema. 28Wi u win naanɛ doke dukia sɔɔ, u koo wɔrumawa, adama gemgiba koo kparawa nge dãa. 29Wi u ka win yɛnu wahala naawa, u koo kam naa gira. Gari bɔkɔ u ko n sãawa bwisigiin yoo. 30Gem kobu bu sãawa wãarun nuuru. Bwisigii, bwisiya u ra ka tii tɔmbu gawe. 31Gemgii u ra win are wawa tara mi. Kaa sere gere tɔn kɔ̃so?

will be added

X\