1 Salomɔɔn mɔnnu. Bii bwisigiiwa u ra de win tundon nukura n do. Adama bii gari bɔkɔ u ra win mɛron nukuru sankuwa. 2 Dukia ye ba wa ka kɔ̃san swaa, ya ku ra arufaani gaa ko, adama ye ba wa dee dee, yera ya ra wãaru wɛ̃. 3 Yinni Gusunɔ kun gemgii derimɔ gɔ̃ɔru sɔɔ, adama u ra tɔn kɔ̃so birewa ye u binɛ sãa. 4 Wi u yikuru mɔ, wiya sãara ra deemɛ, adama wi u hania mɔ, wiya u ra dukia wa. 5 Wi u dĩanu mɛnnamɔ gɛ̃ɛbun saa, u laakari mɔwa, adama wi u dò saa ye, u koo sekuru wa. 6 Gemgii u ra tii domaru kasuewa, adama tɔn kɔ̃son nɔɔ ga ra n kɔ̃sa bɛkiwa. 7 Ba ku ra gemgii duari, adama tɔn kɔ̃so, ba ra nùn duariwa sere ka win yĩsirɔ. 8 Wi u bwisi mɔ, wiya u ra sɔ̃ɔsiru wure, adama wi u kun gari gerubu yɛ̃, u ra kam kowa. 9 Wi u sĩimɔ gem sɔɔ, u ku ra n nande, adama wìn sanu sanusu kun dɛɛre, u koo sɔ̃ɔsira. 10 Wi u win beruse gɔni, u nùn nuki sankumɔwa, adama wi u kun gari gerubu yɛ̃, u ra kam kowa. 11 Bwisigiin gari yi sãawa wãarun nuuru, adama tɔn kɔ̃son gari, kɔ̃sa yi ra n bɛki. 12 Tusiru ta ra sannɔ seeyewa, adama kĩru ta ra toranu kpuro wukiriwa. 13 Laakarigiin geren diya ba ra bwisi wa, adama bokura ta ra n gari bɔkɔ mara. 14 Bwisigii u ra bwisi berewa nge arumani, adama gari bɔkɔn gere ya ra de u biru wurawa. 15 Gobigiin arumani ya ra nùn kɔ̃suwa nge gbãraru, adama sãaron sãaru ta ra nùn kam kowa. 16 Gemgiin sɔmburu ta ra dewa u n wãa, adama tɔn kɔ̃so u ra win dukia dendiwa u ka kɔ̃sa ko. 17 Wi u ra kirɔba yaaye u koo wuswaa da win wãaru sɔɔ, adama wi u ra ye duari u ko n kɔ̃ɔramɔwa u n dɔɔ. 18 Wi u tusiru berua gɔ̃ruɔ u sãawa murafiti. Mɛya wi u maa seeda weesugia dimɔ u sãawa gari bɔkɔ. 19 Gari bɛkɛgii kun toranu kpeemɔ, adama wi u ra win yara nɛnɛ u sãawa bwisigii. 20 Gemgiin gari yi sãawa nge sii geesun tii, adama tɔn kɔ̃son bwisikunu nu ǹ arufaani gaa mɔ. 21 Gemgiin gari yi ra ka tɔn dabinu arufaani naawɛ, adama gari bakasu su ra gbiwa sɛkum laakari sarirun sɔ̃. 22 Yinni Gusunɔn domara ta ra tɔnu ko dukiagii. Tɔnun tiin himba kun gãanu sosimɔ wi sɔɔ. 23 Gari bɔkɔn mi, kɔ̃san kobu bu sãawa nge dweebu. Nge mɛya laakari ya maa sãa bwisigiin mi. 24 Yèn bɛrum kɔ̃san kowobu ba mɔ, yera ya ra bu deemɛ. Ye maa gemgiba kĩ, yera n da koore. 25 Wahala yà n seewa nge woo guna, ya ra tɔn kɔ̃so surewa, adama gemgii u ra n yɔ̃wa dim dim sere ka baadommaɔ. 26 Tam mɔmmɔm mu ra donnu sirewa, kpa wiisu su nɔni sɔkiri. Nge mɛya yikuro u ra win yinnin mɔru seeye. 27 Be ba ra Yinni Gusunɔ nasie, bera ba ra tɛ, adama durumgibu ba ra gbiwa sɛkum. 28 Gemgiin yĩiyɔbu bu ra nùn nuku dobu wɛ̃wa, adama tɔn kɔ̃sogibu kun arufaani gaa mɔ. 29 Yinni Gusunɔ u ra gemgibu kɔ̃suwa, bà n sĩimɔ win swɛɛ sɔɔ, adama u ra tɔn kɔ̃sobu kam koosiewa. 30 Gãanu ganu sari ni nu koo gemgii sura, adama tɔn kɔ̃so u ǹ kpɛ̃ u sina tem mɛ sɔɔ. 31 Gari bwisigiiya yi ra yari gemgiin nɔɔn di, adama ba koo wee kowon yara burawa. 32 Gemgii, durom gariya u ra gere, adama kɔ̃sa tɔn kɔ̃son nɔɔ ga ra gere.
