Mɔnnu 1

1Dafidin bii, Salomɔɔ, wi u sãa Isireliban sunɔ, win mɔnna. 2Mɔn ni sɔɔra tɔnu koo bwisi ka yɛ̃ru wa kpa gari yi yi tubum sɛ̃ yi nùn yeeri. 3Nu koo nùn bwisi gee sɔ̃ɔsi kpa u ko ye n sãa dee dee weesu ka taki sariru sɔɔ. 4Nu koo laakari sarirugii ko laakarigii, kpa nu aluwaasi yɛ̃ru ka bwisi kɛ̃. 5Niya nu koo maa bwisigiin bwisi sosi, kpa nu yɛ̃rugii kpara 6u ka mɔnnun tubusianu ka bwisigibun gari tubu. 7À n kĩ a n bwisi mɔ, a de a gina Gusunɔ nasia. Domi wi u ra bwisi ka sɛɛyasiabu atafiiru ko, u sãawa gari bɔkɔ. 8Wunɛ, nɛn bii durɔbu, a wunɛn baaban sɔ̃ɔsiru nɔɔwɔ, kpa a ku ra wunɛn mɛron gere yina. 9Ya koo de wunɛn daa yu wɛ̃ra nge mɛ furɔ burɔ ka wura ra wasi buraru kue. 10Wunɛ, nɛn bii durɔbu, tɔn kɔ̃sobu bà n nun kɔkirimɔ, a ku ra wura. 11Bà n gerua ba nɛɛ, a na a ka bu da i tɔmbu samba ko i bu sɛ̃suku baa bà kun gãanu kue, 12i bu go yande nge mɛ gɔribun wãa yeru ta ra tɔnu mwɛ wasiru. I bu mwa nge wɔru bɔkɔ ge ga tɔnu samba kua u wɔri. 13I ko arumani bwese bweseka wa i dam diima i yibia bɛɛn diaɔ. 14A na a ka bu mɛnna, kpa i bɛɛn mɔru kpuro doke bɔɔ teeru sɔɔ. 15Wunɛ, nɛn bii durɔbu, a ku ka tɔn ben bweseru swĩina. A ku ben yira du. 16Ben naasu sãu bu ka kɔ̃sa ko. Ba maa sɛnde bu ka tɔnun yɛm yari. 17Gunɔ ge a yina bɛriammɛ, gà n nun mɛɛra, kama a bɛrimɔ. 18Adama tɔn be, ba tii yina bɛriammɛ, ba koo maa mwaara ye sɔɔ. 19Nge mɛya n sãa ka baawure wi u dukian kĩru mɔ. Be ba tii ye wɛ̃, bera ya ra go. 20Bwisi yi gbãramɔ tɔɔwɔ, yi nɔɔgiru sue wuun batuma sɔɔ. 21Yi gbãramɔ swaa kɛɛnanɔ yi yin gari kparamɔ mi wirugiba ra mɛnnɛ, 22yi mɔ̀, bɛɛ laakari sariba, sere domma i kĩ i n wãa bwisi sariru sɔɔ. Bɛɛ yaako kowobu, sere domma i ko n nuku dobu mɔ̀ bɛɛn yaako kobu sɔɔ, kpa bɛɛ gari bakasu i n yɛ̃ru tusa. 23I gɔsirama i nɛn gerusibu nɔ. Kon bɛɛ nɛn hunde wɛ̃, kpa n ka bɛɛ nɛn yɛ̃ru bɔnu ko. 24Wee, na bɛɛ soka, i ǹ wure. Na bɛɛ nɔma gãri, goo kun nɛ. 25I nɛn bwisi kɛ̃ru kpuro yina, i ǹ maa nɛn gerusibu kĩ. 26- 27Yen sɔ̃na, bɛɛn wahala sɔɔ, sanam mɛ bɛrum bɛɛ mwa nge guru woo bɔkɔ, ma wahala ya seewa nge woo guna ya ka nuku sankiranu ka tɔ̃ya na, nɛn tii kon bɛɛ yɛ̃ɛ kpa n bɛɛ yaakoru ko. 28Sanam mɛya i ko man soku, adama na ǹ bɛɛ wurarimɔ. I ko man kasu, i ǹ maa man wasi. 29Domi i yɛ̃ru tusa, i ǹ kĩ i Yinni Gusunɔ nasia. 30I ǹ nɛn bwisi kɛ̃ru wure, ma i nɛn gerusibu atafiiru kua. 31Yen sɔ̃, i ko bɛɛn himba ka bɛɛn kookoosun are di i debu. 32Laakari sariban bwisi kɛ̃ɛ yinabu koo de bu gbi. Gari bakasun biti sarira dera ba kam mɔ̀. 33Adama wi u nɛn gari swaa daki, win bwɛ̃ra ko n kpĩ. U ǹ ko n maa wurure kɔ̃sa gaan bɛrum sɔ̃.

will be added

X\