Abudiasi 1

1Gari wee yi Yinni Gusunɔ u nɛɛ, Abudiasi u gere Edɔmuban sɔ̃. Yinni Gusunɔ u sɔmɔ gɔra bwese tukunun suunu sɔɔ u nɛɛ, nu seewo nu Edɔmuba tabu wɔri. 2Yinni Gusunɔ u Edɔmuba sɔ̃ɔwa saa Abudiasin nɔɔn di u nɛɛ, bɛɛ Edɔmuba, kon bɛɛ ko bwese dam sarirugiru bwesenu kpuro sɔɔ. Tɔmbu kpuro ba koo bɛɛ gɛm. 3Wee bɛɛn tii suabu bɛɛ nɔni wɔ̃kua, ma i sɔ̃ kpee baaba sɔɔ mì goo kun kpɛ̃ u bɛɛ naa turi. Ma i tii sɔ̃ɔmɔ i mɔ̀, wara u koo sun sura minin di. 4Yen sɔ̃, i n yɛ̃ ma baa ì n da sere mi gunɔ bakeru ta ten sokuru mɔ, ǹ kun mɛ, i dua kperiɔ i bɛɛn wãa yenu kua mi, kon bɛɛ sarasiama. Nɛ, Yinni Gusunɔwa na yeni gerua. 5Gbɛnɔbu bà n na ba bɛɛ wɔri subaru sɔɔ wɔ̃kuru, ba koo bɛɛn yãnu gurawa. Bà n bɛɛn resɛm gbea wɔri, ba koo ye sɔriwa, kpa bu bɛɛ fiiko deria. 6Adama bɛɛ Esaun bibun bweseru, yibɛrɛba ba koo bɛɛn arumani gura, baa ka bɛɛn dukia ye ya berua. 7Be i raa ka nɔɔ tia sãa, ba koo bɛɛ tɔnu kandu kua, kpa bu bɛɛ gira sere bɛɛn tem nɔɔ bura yerɔ. Be ba raa sãa bɛɛn bɔrɔba, ba koo bɛɛ dam dɔre. Ka be i ra raa di sannu, ba koo bɛɛ yina bɛria. Adama i ǹ ye tubumɔ. 8Nɛ, Yinni Gusunɔ na nɛɛ, nɛn mɔrun tɔ̃ru sɔɔ, kon bwisigibu kpeerasia Edɔmun tem sɔɔ, kpa n laakarigibu go. 9Bɛɛ Temagibu, bɛɛn tabu kowobu ba koo burisina kpa bu be kpuro go. 10Bɛɛ Edɔmuba, wee i bɛɛn mɛro bisibu Yakɔbun bweseru mwɛɛra i go. Yen sɔ̃, i ko i sekuru wa. I ko i kam kowa sere ka baadommaɔ. 11Domi i wãa mi sanam mɛ yibɛrɛba ba Isireliba tabu kamia ma ba dua ben wusɔ. Ma ba ben yãnu gura Yerusalɛmuɔ ba tɛtɛ toosi. Bɛɛn tii i sãa nge yibɛrɛ be. 12Bɛɛ Edɔmuba, n ǹ daa weenɛ i bɛɛn mɛro bisibu Yudaba mɛɛri ka nuku dobu sanam mɛ ba nɔni sɔ̃ɔre. N ǹ daa weenɛ i nuku dobu ko ǹ kun mɛ i bu wɔmɛ sanam mɛ ba nuki sankire. 13Bɛɛ Edɔmuba, n ǹ daa weenɛ i du nɛn tɔmbun wuuɔ sanam mɛ yibɛrɛba ba gu kpeerasia. N ǹ daa weenɛ i gen bansu mɛɛri ka nuku dobu. N ǹ daa weenɛ i gen dukia gura i tii koosi. 14N ǹ daa weenɛ i yɔ̃ra swaa yinna yerɔ i ben be ba duki mɔ̀ mwɛɛri i go, ǹ kun mɛ i bu mwa i yibɛrɛba nɔmu sɔndia nɔni swãa te sɔɔ. 15Domi saa ya turuku kua yè sɔɔ Yinni Gusunɔ u koo bwesenu kpuro siri. Saa ye sɔɔ, ba koo bɛɛ kua nge mɛ i gabu kua. Kɔ̃sa ye i kua mi, ya koo wɔriwa bɛɛn wiru wɔllɔ. 16Bɛɛ Isireliba, i nɛn mɔru ye na ka bɛɛ sɛɛyasia nɔra nɛn guu dɛɛrarun wɔllɔ. Mɛya bwese ni nu tie, nu ǹ kpɛ̃ nu ye nɔ nu kpe. Nu ko n ye nɔrumɔwa sere yu ka nu go kpa nu kpeera mam mam. 17Saa ye sɔɔ, Siɔni koo maa ko nɛ Gusunɔn guu dɛɛraru. Be ba yara tabun di Yakɔbun bweseru sɔɔ ba koo faaba wa mi, kpa bu ben tem mwa be ba raa mu mwan nɔman di. 18Yakɔbun bibun bweseru ka Yosɛfun bibun bwesera ko n sãawa nge dɔ̃ɔ. Ba koo Esaun bweseru dɔ̃ɔ mɛniwa nge yakasu. Ba koo bu dɔ̃ɔ mɛniwa mam mam, ba ǹ goo derimɔ mi. Nɛ, Yinni Gusunɔwa na yeni gerua. 19Yuda be ba wãa sɔ̃ɔ yɛ̃san nɔm dwaru gia ba koo Edɔmuban tem mɛ mwa. Be ba wãa wɔwaɔ, ba koo Filisitiban tem ka Samarigim ka Efaraimugim mwa, kpa Bɛnyamɛɛba bu maa Galadin tem mwa. 20Isireliban tabu kowo be ba raa kpikiru sua saa sɔ̃ɔ yɛ̃san nɔm geu gian di, ba koo Kananiban tem mwa sere n ka da Sarepataɔ. Yerusalɛmugii be ba maa kpikiru da Sefaradiɔ, ba koo wuu si su wãa sɔ̃ɔ yɛ̃san nɔm dwaru gia mwa. 21Ka nasarawa ba koo Siɔnin guuru yɔ. Min diya ba ko n Edɔmuba kpare. Kpa Yinni Gusunɔ u n bandu dii!

will be added

X\