1 Ye Isireliba ba yarima Egibitin di yen wɔ̃ɔ yirusen suru gbiikoo sɔɔ, yera Yinni Gusunɔ u ka Mɔwisi gari kua Sinain gbaburɔ. 2 U nɛɛ, Isireliba ba ko n da Gɔɔ sararibun tɔ̃ɔ bakaru diwa saa ye na yi sɔɔ. 3 Yera suru winin sɔ̃ɔ wɔkura nnɛsen yoka, sanam mɛ sɔ̃ɔ dua. Ba koo tu diwa nge mɛ ten wooda ya gerua. 4 Ma Mɔwisi u Isireliba sɔ̃ɔwa nge mɛ ba koo ka Gɔɔ sararibun tɔ̃ɔ bakaru di. 5 Ma ba tɔ̃ɔ te di suru gbiikoon sɔ̃ɔ wɔkura nnɛse yen yoka sanam mɛ sɔ̃ɔ dua, Sinain gbaburu mi, nge mɛ Yinni Gusunɔ u Mɔwisi sɔ̃ɔwa bu ko. 6 Yen dɔma te, tɔmbu gaba wãa be ba disi mɔ gorun sɔ̃. Ba ǹ kpĩa ba tɔ̃ɔ baka te di. Ma ba da ba Mɔwisi ka Aroni deema. 7 Ba bu sɔ̃ɔwa ba nɛɛ, wee sa disi mɔ gorun sɔ̃. Yen sɔ̃, kaa sun yinari su ka bɛsɛn yãkuru na Yinni Gusunɔn wuswaaɔ tɔ̃ɔ te sɔɔ, nge Isireli be ba tie? 8 Ma Mɔwisi u nɛɛ, i yɔ̃ro n bikia ye Yinni Gusunɔ u koo man sɔ̃ bɛɛn sɔ̃. 9 Yinni Gusunɔ u Mɔwisi sɔ̃ɔwa u nɛɛ, a Isireliba sɔ̃ɔwɔ a nɛɛ, 10 ben goo ǹ kun mɛ ben bibun bweseru sɔɔ, goo ù n disi mɔ gorun sɔ̃, ǹ kun mɛ u wuu da, ka mɛ, u koo Gɔɔ sararibun tɔ̃ɔ bakaru diwa nɛn sɔ̃. 11 Adama ba koo tu diwa suru yirusen sɔ̃ɔ wɔkura nnɛsen yoka sanam mɛ sɔ̃ɔ dua. Kpa bu ten yaa tem ka pɛ̃ɛ ye ba ǹ seeyatia doke ka maa kpee wuru si su sosu. 12 Bu ku yen gaa deri sere sisiru bururu. Ba ǹ maa yen kukunu kɔramɔ. Bu de bu yen wooda mɛm nɔɔwa mam mam. 13 Goo ù n dɛɛre ma u ǹ wuu de, ma u ka sere yina u Gɔɔ sararibun tɔ̃ɔ baka te di, ba koo yɛ̃ro yarawa Isireliban sansanin di, yèn sɔ̃ u yina u ka win yãkuru na ten saa sɔɔ. Yɛ̃ro u koo win tora ten are mwawa. 14 Sɔɔ goo ù n wãa bɛɛn suunu sɔɔ, u tɔ̃ɔ baka te dimɔ, u koo tu diwa nge mɛ na ten wooda yi. Bɛɛ ka sɔbu, wooda tia yera na bɛɛ wɛ̃ɛmɔ. 15 Dɔma te Mɔwisi u Yinni Gusunɔn kuu te gira u kpa, guru wii wurora ta tu wukiri saa yoka yen di n ka girari bururɔ. Ma ta yam bururasie nge dɔ̃ɔ kuu ten wɔllɔ. 16 Nge mɛya ta tu wukiri saa dɔma ten di. Wɔ̃kuru kpa ta n yam buriri. 17 Guru wii wuro te, tà n seewa Yinni Gusunɔn kuu ten wɔllun di, Isireliba ba ra kuu te wukewa bu doona. Kpa bu maa yɔ̃ra mi guru wii wuro te, ta yɔ̃ra. 18 Nge mɛya ba ra ka Yinni Gusunɔn gere tubu ù n kĩ bu kuu te gira, ǹ kun mɛ, ù n kĩ bu tu wuka. Guru wii wuro te, tà n wãa kuu ten wɔllɔ, ba ku ra doonɛ min di. 19 Tà n yɔ̃ra kuu ten wɔllɔ n ka tɛ, Isireliba ba ra Yinni Gusunɔn wooda mɛm nɔɔwɛwa, ba ku ra doonɛ min di. 20 Tà n yɔ̃ra saa fiiko, miya ba ra ben sansani gire saa fiiko. Yen biru kpa bu se bu doona Yinni Gusunɔ ù n nɛɛ, bu se bu doona. 21 Gasɔ guru wii wuro te, ta ra yɔ̃re yam tem, saa yokan di sere ka bururɔ, ǹ kun mɛ sɔ̃ɔ teeru ka wɔ̃ku teeru. Adama tà n seewa, Isireliba ba ra sewa bu swaa wɔri. 22 Adama tà n yɔ̃ra kuu ten wɔllɔ sɔ̃ɔ yiru ǹ kun mɛ suru tia ǹ kun mɛ wɔ̃ɔ tia Isireliba ba ku ra kuu te wuke, ma n kun mɔ ba guru wii wuro te wa ta seewa. 23 Ba ku ra se, ba ku ra maa sinɛ, ma n kun mɔ Yinni Gusunɔ u bu wooda wɛ̃. Ba ra win wooda swĩiwa nge mɛ u Mɔwisi sɔ̃ɔwa u ko.
