Gbaburu 8

1Yinni Gusunɔ u Mɔwisi sɔ̃ɔwa u nɛɛ, a Aroni sɔ̃ɔwɔ a nɛɛ, 2ù n fitilanu nɔɔba yiru ye doke dabu ge sɔɔ, u de nu n yam bururasie wuswaaɔ. 3Ma Aroni u kua mɛ. U nu doke doke dabu gen wuswaaɔ nge mɛ Yinni Gusunɔ u nùn sɔ̃ɔwa. 4Ba dabu ge kuawa ka wura bɔri tia saa gen wɔllun di sere n ka da temɔ, ka sere bura ni ba gu kua. Mɔwisi u dera ba gu kuawa nge mɛ Yinni Gusunɔ u nùn sɔ̃ɔsi. 5Yinni Gusunɔ u Mɔwisi sɔ̃ɔwa u nɛɛ, 6a Lefiba wunɔ Isireliban suunu sɔɔn di kpa a bu dɛɛrasia. 7Wee nge mɛ kaa ko a ka bu dɛɛrasia. Kaa bu nim yɛ̃kawa mɛ mu koo ben toranu wukiri. Kpa a de bu ben wasin sansu kɔni. Kpa bu ben yãnu tea kpa bu tii dɛɛrasia. 8Yen biru ba koo kɛtɛ kinɛ kpɛmbu sua ka som mɛ ba ka gum burina ka kɛtɛ kinɛ kpɛmbu gagu bu ka torarun yãkuru ko. 9Kpa a Isireliba kpuro mɛnna kuu ten kɔnnɔwɔ, kpa a de Lefiba bu susima 10nɛ, Yinni Gusunɔn wuswaaɔ, kpa Isireliba bu ben nɔma sɔndi Lefi ben wiru wɔllɔ. 11Kpa Aroni u Lefi be sɔ̃ɔsi beri berika nɛ, Yinni Gusunɔn wuswaaɔ nge yãkuru te Isireliba ba ka na. Saa ye sɔɔ, ba bu wunawa mi nɛnɛm nɛn sɔmburun sɔ̃. 12Lefiba ba koo maa ben nɔma sɔndi kɛtɛ kinɛ nin wiru wɔllɔ. Yen biru kpa Aroni u teeru go ben torarun suurun sɔ̃ kpa u ka teeru yãku dɔ̃ɔ mwaararugiru ko u sere bu dɛɛrasiabun woronu koosi. 13Kaa de Lefiba kpuro bu se bu yɔ̃ra Aroni ka win bibun wuswaaɔ, kpa a bu sɔ̃ɔsi beri berika nge yãkuru nɛ, Yinni Gusunɔn wuswaaɔ. 14Kaa Lefiba wunawa nɛnɛm Isireliban suunu sɔɔn di, kpa ba n wãa nɛn sɔmburun sɔ̃. 15Yeniban biru ba koo sɔmburu ko nɛn sãa yerɔ. Kaa bu dɛɛrasiawa kpa a bu sɔ̃ɔsi beri berika nge yãkuru. 16Domi ba man bu wɛ̃wa mam mam ba kua Isireliban bii gbiikobu kpuron kɔsire. 17Ben bii gbiikobu kpuro ba sãawa nɛgibu saa tɔmbun bii gbiikobun di n ka da yaa sabenun binɔ. Na bu wunawa nɛnɛm ba kua nɛgibu, saa mìn di na bii gbiikobu go Egibitiɔ. 18Na Lefiba mwa Isireliban bii gbiikobun ayerɔ. 19Na bu wunawa na Aroni ka win bibu wɛ̃, bu ka sɔmburu ko Isireliban sɔ̃ sãa yerɔ, kpa ba n sãa nge yãkuru te Isireliba ba wɛ̃ ben toranun sɔ̃. Saa ye sɔɔ, Isireli be, ba ǹ susimɔ nɛn kuu ten bɔkuɔ n sere bu go. 20Mɔwisi ka Aroni ka Isireliba kpuro ba kua mam mam ye Yinni Gusunɔ u gerua Lefiban sɔ̃. 21Lefiba ba tii dɛɛrasia ba ben yãnu tea, ma Aroni u bu sɔ̃ɔsi beri berika nge yãkuru. Ma u bu torarun suuru ka dɛɛrasiabun woronu koosi. 22Yen biruwa Lefi be, ba na Yinni Gusunɔn kuu ten mi, ba ben sɔmburu torua Aroni ka win bibun nɔni biru, nge mɛ Yinni Gusunɔ u Mɔwisi sɔ̃ɔwa u ko ben sɔ̃. 23Yinni Gusunɔ u maa Mɔwisi sɔ̃ɔwa u nɛɛ, 24Lefi be ba wɔ̃ɔ yɛnda nɔɔbu mɔ ka be ba kere mɛ, beya ba koo sɔmburu ko nɛn kuu te sɔɔ. 25Be ba wɔ̃ɔ weeraakuru tura, ba koo yariwa ben sɔmburun di mam mam. Ba ǹ maa man sɔmburu kuammɛ. 26Ba ko n da ben Lefisibu somi bà n sɔmburu mɔ̀. Adama ben tii ba ǹ ko n maa sɔmburu mɔ mi. Nge mɛya kaa Lefiba kua ben sɔmburun swaa sɔɔ.

will be added

X\