Gbaburu 35

1Yinni Gusunɔ u ka Mɔwisi gari kua Mɔabun wɔwaɔ, Yuudɛnin bɔkuɔ, Yerikon deedeeru u nɛɛ, 2a Isireliba sɔ̃ɔwɔ bu wusu gɔsi ben tem sɔɔ bu Lefiba wɛ̃ mi ba ko n wãa ka sere maa kpara yenu. 3Lefiba ba koo sinawa wuu marosu sɔɔ, kpa ba n tem mɔ mi ba ko n da ben yaa sabenu kpare. 4Kpara yee ni i ko i bu wɛ̃ mi, nin yasum mu ko n sãawa gɔm soonu nɔrɔbu (1.000) saa gbãrarun beri berikan di, 5kpa nin dɛ̃ɛbu bu n sãa gɔm soonu nɔrɔbun suba yiru (2.000) sɔ̃ɔ yari yeru gia, ka sɔ̃ɔ duu yeru gia, ka sɔ̃ɔ yɛ̃san nɔm dwaru gia, ka maa nɔm geu gia, kpa wuu ga n wãa suunu sɔɔ. Nge mɛya ben kpara yee ni, nu ko n sãa wuu baagere sɔɔ. 6Ba koo bu wusu nɔɔba tia wɛ̃ mi wi u tɔnu go u ko n da kpikiru de, ka maa wusu gasu weeru ka yiru. 7Wuu si kpuro su ko n sãawa weeru ka nɔɔba ita, ka sin kpara yenu. 8Isireliban bwese kɛra baayere ya koo Lefiba wusu wɛ̃wa nge mɛ yen tem mu kpãaru nɛ. Be ba dabi ba koo wɛ̃wa n dabi. Be ba ǹ maa dabi, kpa bu wɛ̃ fiiko. 9Yinni Gusunɔ u Mɔwisi sɔ̃ɔwa u nɛɛ, 10a Isireliba sɔ̃ɔwɔ a nɛɛ, bà n Yuudɛni tɔbura ba dua Kananin temɔ, 11bu wusu gasu gɔsio mi wi u kun kĩ u ka tɔnu go u ko n da kpikiru de, 12sere bu ka nùn da bu siri tɔmbun wuswaaɔ. Nge mɛya u koo ka yari wi u kĩ u nùn mɔru kɔsian nɔman di. 13Wuu sìn mi ba ko n da kpikiru de, su ko n sãawa nɔɔba tia, 14ita ya n wãa Yuudɛnin sɔ̃ɔ yari yeru gia, ita ye ya maa tie ya n wãa Kananin temɔ. 15Isireli goo, ǹ kun mɛ sɔɔ wi u wãa Isireliban suunu sɔɔ, ù kun kĩ u ka tɔnu go, u koo kpĩ u kpikiru da wuu sin gagun mi. 16- 19Goo ù n tɔnu so u go ka gãa ni ba kua ka sisu, ǹ kun mɛ ka kperu, ǹ kun mɛ ka bokuru, u sãawa tɔn gowo. Wi u go min tɔnu u koo maa nùn mɔru kɔsie u gowa. 20Goo ù n win winsim tusa u bɔria, ǹ kun mɛ u nùn gãanu kara, 21ǹ kun mɛ u nùn so ka nɔma u go, ba koo yɛ̃ron tii gowa, domi u sãawa tɔn gowo. Wi u go min tɔnu u koo maa nùn mɔru kɔsie u gowa. 22- 23Goo ù kun maa kĩ u ka win winsim bɔria, ǹ kun mɛ u nùn kara ka gãanu ǹ kun mɛ, u ka nùn kperu so u go, 24tɔmbu ba koo ye ya koora min saria mɛɛriwa bu ka yɛ̃ro siri wi u tɔnu go mi. 25Kpa bu nùn wiru dwe bu de u wura wuu gèn mi u raa kpikiru da, kpa u sina mi sere yãku kowo tɔnwero u ka gbi wi ba gum tãre wirɔ. 26Wi u tɔnu go mi, ù n yara wuu gen min di, gèn mi u kpikiru da mi, 27ma wi u kĩ u nùn mɔru kɔsia u nùn go, yɛ̃ro kun taarɛ gaa mɔ. 28Domi wi u tɔnu go mi, n weenɛ u sinawa wuu mi u raa kpikiru da sere yãku kowo tɔnwero u ka gbi. Yen biru u koo kpĩ u wura win temɔ. 29Wooda beniwa ba ko n da swĩi, be ka ben bibun bweseru yam kpuro mi ba wãa. 30Goo ù n tɔnu go, tɔn dabira ba koo yen seeda di bu sere yɛ̃ro go. Tɔn turon seeda dibu kun tura bu ka tɔnu taarɛ wɛ̃ bu go. 31Bu ku nɔm biran kɛ̃ru mwa bu ka tɔn gowo deri. N weenɛ u gbiwa kam kam. 32Ba ǹ maa nɔm biran kɛ̃ru mwaamɔ bu ka de u da wuu gèn mi ba ra kpikiru de, kpa u wura win temɔ yãku kowo tɔnwero ù n gu. 33Bu ku raa tɔnu go, domi yera ya koo ben tem disi doke. N ǹ maa koorɔ bu mɛ dɛɛrasia ma n kun mɔ ba yɛ̃ro go, wi u tɔnu go mi. 34Bu ku raa tem mɛ disi doke mɛ̀ sɔɔ ba ko n wãa, domi nɛ Yinni Gusunɔ, ko na n wãa ka be, nɛ wi na ra n wãa be Isireliban suunu sɔɔ.

will be added

X\