1 Rubɛnin bwese kɛra ka Gadin bwese kɛran tɔmbu ba yaa sabenu mɔ nu dabi too. Ma ba wa ma Yasɛɛn tem ka Galadin tem mu gea sãa ben yaa sabenun sɔ̃. 2 Yera ba da ba Mɔwisi ka yãku kowo Eleasaa ka Isireliban wirugibu deema, ba nɛɛ, 3 wuu sini, Atarɔtu ka Diboni ka Yasɛɛ ka Nimura ka Hɛsiboni ka Eleale ka Sebamu ka Nɛbo ka sere Beoni, 4 si Yinni Gusunɔ u dera bɛsɛ Isireliba sa kamia, sin tem mu gea sãa yaa sabenun sɔ̃. Wee sa maa yaa sabenu mɔ nu dabi. 5 Yen sɔ̃, à n ka sun nɔnu geu mɛɛran na, a de bu sun tem mɛ wɛ̃ bɛsɛ wunɛn sɔm kowobu. A ku de su Yuudɛni tɔbura. 6 Ma Mɔwisi u bu wisa u nɛɛ, bɛɛn mɛro bisibu ba koo dawa ba n tabu mɔ̀ kpa bɛɛ i n sɔ̃ mini? 7 I ǹ yɛ̃ ma i ko i bu mwia kpanasiawa kpa ba kun kĩ bu da tem mɛ Yinni Gusunɔ u bu wɛ̃ sɔɔ? 8 Nge mɛya bɛɛn baababa ba kua yellu sanam mɛ sa wãa Kadɛsi Baanɛaɔ, ye na bu gɔra ba da ba Kananin tem saria mɛɛra. Ye ba da ba tura sere Ɛsikolin wɔwaɔ ma ba tem mɛn saria mɛɛra. 9 Ye ba gɔsirama, ma ba begibu Isireliba mwia kpanasia bu ku ka da tem mɛ Yinni Gusunɔ u bu wɛ̃ sɔɔ. 10 Yen tɔ̃ɔ te sɔɔ, Yinni Gusunɔ u mɔru bɛsira ma u bɔ̃rua u nɛɛ, 11 tɔn be ba yarima Egibitin di mi, be ba wɔ̃ɔ yɛndu mɔ ka be ba kere mɛ, ben goo kun duɔ tem mɛ sɔɔ, mɛ u nɔɔ mwɛɛru kua u Aburahamu ka Isaki ka Yakɔbu wɛ̃. Domi ba yina bu win gere mɛm nɔɔwa. 12 Kalɛbu, Yɛfunɛn bii, Kenasin bweseru sɔɔ, ka sere Yosue, Nunin bii, be tɔnawa ba koo du tem mɛ sɔɔ yèn sɔ̃ ba nùn mɛm nɔɔwa mam mam. 13 Yinni Gusunɔ u ka bɛɛn baababa mɔru kua ma u dera ba yaayaare kua gbaburɔ wɔ̃ɔ weeru sere be kpuro ba ka kpeera, be, be ba kua ye ya ǹ nùn wɛ̃re. 14 Wee, tɛ̃ bɛɛ, i kĩ i bɛɛn baaba ben yira swĩi, kpa i de Yinni Gusunɔ u kpam mɔru bɛsira ka bɛɛ Isireliba. 15 Domi ì n gɛra win swaan di, u koo de bɛɛ kpuro i kpam tɛ gbaburɔ. Saa ye sɔɔ, kpa i de bɛɛgibu bu kam ko. 16 Ma ba Mɔwisi wisa ba nɛɛ, aawo. Sa ko bɛsɛn yaa sabenu karaba kua kpa su maa wusu bani su gbãranu toosi bɛsɛn kurɔbu ka bibun sɔ̃. 17 Yen biru, sa ko tabu yãnu sua kpa sa n gbia su ka bɛsɛgibu duusia ben temɔ, mɛ ba bu wɛ̃. Sa ye sɔɔ, sa ko bɛsɛn kurɔbu ka bibu deriwa ba n wãa wuu gbãranugii si sɔɔ, tem mɛn tɔmbun sɔ̃. 18 Sa ǹ wurɔ bɛsɛn yɛnusɔ ma n kun mɔ Isireli baawure u win tem mwa. 19 Sà n tem mɛni wa guru gee sɔ̃ɔ yari yeru mi, sa ǹ maa tem gam kĩ Yuudɛnin guru giɔ. 20 Ma Mɔwisi u bu sɔ̃ɔwa u nɛɛ, ǹ n mɛn na, i de i bɛɛn nɔɔ mwɛɛru yibia. I tabu yãnu suo kpa i da i tabu ko ka wɛrɔbu nge mɛ Yinni Gusunɔ u bɛɛ yiire. 21 Bɛɛ kpuro, i Yuudɛni tɔburo nge mɛ Gusunɔ u kĩ kpa i n wãa mi sere u ka win yibɛrɛba gira win wuswaan di, 22 kpa u tem mɛ mwa. Saa ye sɔɔ, i ǹ ko i n maa taarɛ gaa mɔ. I ko i kpĩ i wurama bɛɛn temɔ, kpa mu n sãa bɛɛgim. 23 Adama ì kun kue mɛ, i Yinni Gusunɔ torariwa mi. Kpa i n yɛ̃ ma bɛɛya i ko i tora ten are sɔbe. 24 I doo i wusu bani bɛɛn kurɔbu ka bibun sɔ̃, kpa i maa karaba ko bɛɛn yaa sabenun sɔ̃. Yen biru kpa i na i bɛɛn nɔɔ mwɛɛru yibia. 25 Ma Gadigibu ka Rubɛni be, ba Mɔwisi wisa ba nɛɛ, Yinni, ye a gerua mi kpuro, sa wura. 26 Sa ko bɛsɛn kurɔbu ka bɛsɛn bibu ka bɛsɛn yaa sabenu deri Galadi mini. 27 Kpa bɛsɛ kpuro su Yuudɛni tɔbura sa n tabu yãnu nɛni su ka tabu ko Yinni Gusunɔn wuswaaɔ nge mɛ a gerua. 28 Yera Mɔwisi u yãku kowo Eleasaa ka Yosue Nunin bii, ka Isireliban bwese kɛra baayeren wirugii wooda wɛ̃ ben sɔ̃. 29 U nɛɛ, Gadin bwese kɛra ka Rubɛnigia bà n tabu yãnu sua ma ba Yuudɛni tɔbura ka bɛɛ sannu bu ka tabu ko Yinni Gusunɔn wuswaaɔ, ma ba bɛɛ somi i ka tem mɛ mwa, i bu Galadin tem wɛ̃ɛyɔ mu ko begim. 30 Adama bà kun kue mɛ, i ko i bu tem wɛ̃wa bɛɛn suunu sɔɔ Kananin temɔ. 31 Ma Gadigibu ka Rubɛni be, ba kpam nɛɛ, ye Yinni Gusunɔ u nun sɔ̃ɔwa kpuro, sa wura. 32 Sa ko tabu yãnu sua su Kananin tem wɔri nge mɛ Yinni Gusunɔ u gerua kpa sa n bɛsɛn tem mɔ Yuudɛnin bera gee. 33 Ma Mɔwisi u Gadigii be ka Rubɛni be, ka Manase, Yosɛfun biin bwese kɛran bɔnu Amɔreba ka Basanigibun tem kpuro wɛ̃, mɛn wuu marosu ka mɛn baru kpaanu, mi Sihoni ka Ogu ba raa bandu dii. 34 Wuu si Gadigiba ba bana, siya Diboni ka Atarɔtu ka Aroɛɛ, 35 ka Atarɔtu Sofani ka Yasɛɛ ka Yogbea, 36 ka Bɛti Nimura ka Bɛti Harani. Ma ba su gbãranu toosi. Ba maa ben yaa sabenu karaba kua. 37 Wuu si Rubɛniba maa bana, siya Hɛsiboni, 38 ka Eleale ka Kiriataimu ka Nɛbo ka Baali Mɛɔni ka Sibima. Ma ba si kpuro yĩsinu kɔsa. 39 Makiri Manasen biin sikadominu, beya ba Galadin tem wɔri ba Amɔreba gira tem mɛn di ma ba mu mwa. 40 Ma Mɔwisi u bu tem mɛ wɛ̃ ba sina mi. 41 Manasen bii wi ba maa mɔ̀ Yairi, win sikadomina nu da nu Amɔreban baru kpaanu wɔri nu mwa, ma nu nu soka Yairin wusu. 42 Yen biru Nɔbaki u Kenati wɔri u mwa, ka yen baru kpaanu ma u ye soka ka win tiin yĩsiru, Nɔbaki.
