Gbaburu 31

1Yinni Gusunɔ u Mɔwisi sɔ̃ɔwa u nɛɛ, 2a doo a Madianiba mɔru kɔsia kɔ̃sa ye ba Isireliba kuan sɔ̃. Yen biruwa kon de a kpuna a gbi a wunɛn baababa deema. 3Ma Mɔwisi u tɔn be sɔ̃ɔwa u nɛɛ, gabu bu ben tabu yãnu sebuo bu da bu Madianiba wɔri kpa bu bu mɔru kɔsia nge mɛ Yinni Gusunɔ u gerua. 4Yen sɔ̃, bwese kɛra baayere yu tabu kowobu nɔrɔbu (1.000) gɔsio. 5Ma Isireliban bwese kɛra baayere ya tɔmbu nɔrɔbu gɔsa. Ma ben geera kua tabu kowobu nɔrɔbun suba wɔkura yiru (12.000). 6Ma Mɔwisi u tabu kowobu nɔrɔbun suba wɔkura yiru ye tabu gɔra. Ba dawa ka Finɛɛsi, yãku kowo Eleasaan bii, u Yinni Gusunɔn kurun dendi yãnu nɛni ka kɔbi sannu. 7Ma ba Madianiba tabu wɔri nge mɛ Yinni Gusunɔ u raa Mɔwisi sɔ̃ɔwa, ma ba ben tɔn durɔbu kpuro go. 8Ma ba ben sinambu nɔɔbu ye go. Bera, Efi ka Rekɛmu ka Suri ka Huri ka Reba. Ba maa Balamu Beorin bii go. 9Adama ba ben kurɔbu ka bibu yoru mwɛɛra ma ba ben yaa sabenu ka ben arumaniba gura. 10Ma ba ben wusu ka ben kpara yenu dɔ̃ɔ mɛni. 11Ma ba ka ye kpuro doona ye ba gura, tɔmbu ka yaa sabenu. 12Ma ba ka ye kpuro na Mɔwisi ka yãku kowo Eleasaa ka Isireliba kpuron mi sansaniɔ, Mɔabun wɔwaɔ, Yuudɛnin bɔkuɔ, Yerikon deedeeru. 13Yera Mɔwisi ka yãku kowo Eleasaa ka Isireliban wirugibu ba yara ben sansanin di ba bu sennɔ da. 14Yera Mɔwisi u ka tabu sinambu mɔru kua, ka nɔrɔm nɔrɔm wirugibu, ka wunɔm wunɔm wirugibu, be ba taa bi da ba wee. 15U nɛɛ, mban sɔ̃na i tɔn kurɔbu deri i ǹ bu go. 16I yɛ̃ ma bera Balamu u bɔrie ma ba dera Isireliba ba Yinni Gusunɔ torari Peorin gari sɔɔ, ma Yinni Gusunɔ u bu kɛ̃si kɛ̃si bararu sure. 17Yen sɔ̃ tɛ̃, i ben bii tɔn durɔbu kpuro goowo ka tɔn kurɔ be ba durɔ yɛ̃. 18Adama i tii wɔndiaba yiiyo be ba ǹ durɔ yɛ̃. 19Be ba maa tɔnu go, ǹ kun mɛ ba goru baba, ba koo yariwa sansanin di sɔ̃ɔ nɔɔba yiru, kpa bu tii dɛɛrasia be ka ben yobu, sɔ̃ɔ itase ka sɔ̃ɔ nɔɔba yiruse. 20I ko i bɛɛn yãnu dɛɛrasiawa ka gãanu kpuro ni ba kua ka yaa gɔna, ka boo sansu, ka sere maa ni ba kua ka dãa. 21Ma yãku kowo Eleasaa u tabu kowo be ba tabu da mi sɔ̃ɔwa u nɛɛ, wee wooda ye Yinni Gusunɔ u Mɔwisi wɛ̃. U nɛɛ, 22wura ka sii geesu ka sii gandu ka sii wɔ̃kusu ka pɛɛrum, 23sii si ba koo gesi kpĩ bu dɔ̃ɔ doke kpuro, i ko i su dɔ̃ɔ dokewa kpa i su dɛɛrasia. Ye ba ǹ maa kpɛ̃ bu dɔ̃ɔ doke i ko i ye wasiwa dɛɛrasiabun nim sɔɔ. 24I ko i bɛɛn yãnu teawa sɔ̃ɔ nɔɔba yiruse kpa i dɛɛra. Yen biru i ko i kpĩ i wurama sansaniɔ. 25Yinni Gusunɔ u Mɔwisi sɔ̃ɔwa u nɛɛ, 26wunɛ ka yãku kowo Eleasaa ka Isireliban yɛnu yɛ̃robu, i arumani ye gario ye Isireliba ba mwaama mi, tɔmbu ka yaa sabenu. 27I ko i ye bɔnu kowa suba yiru ya n kpãaru nɛ, be ba tabu dagia ka be ba ǹ tabu degia. 28Be ba tabu dan bɔnu sɔɔ, wee ye i ko i wuna nɛ Yinni Gusunɔn sɔ̃. Yera nɛɛra wunɔbu (500) baayeren wɔllɔ i tia wuna nɛn sɔ̃, tɔmbu sɔɔ ka kɛtɛba sɔɔ, ka kɛtɛkunu sɔɔ, ka yãanu ka bonu sɔɔ. 29Kpa a ye yãku kowo Eleasaa wɛ̃. 30Be ba ǹ maa tabu den bɔnu sɔɔ, weeraakuru baateren wɔllɔ, kaa tia tia wuna nɛn sɔ̃ tɔmbu sɔɔ ka kɛtɛba sɔɔ ka kɛtɛkunu sɔɔ ka yãanu sɔɔ ka bonu sɔɔ, ka sere yaa sabe ni nu tie sɔɔ, kpa a ye Lefiba wɛ̃ be ba sɔmburu mɔ̀ nɛn sãa yerɔ. 31Ma Mɔwisi ka Eleasaa ba kua ye Yinni Gusunɔ u Mɔwisi yiire. 32Arumani ye ba gura kpuro, yen geeru wee. Yãanu ka bonun geera sãa nɔrɔbun suba nata ka wata ka wɔkura nɔɔbu (675.000). 33Kɛtɛban geera sãa nɔrɔbun suba wata ka wɔkura yiru (72.000). 34Kɛtɛkunun geera sãa nɔrɔbun suba wata ka tia (61.000). 35Wɔndiaban geera maa sãa nɔrɔbun suba tɛna ka yiru, be ba ǹ durɔ yɛ̃ (32.000). 36Be ba tabu dan bɔnu ya kua yãanu nɔrɔbun suba gooba wunɔbu ka tɛna ka nɔɔba yiru ka nɛɛra wunɔbu (337.500). 37Mi sɔɔ, ba nata ka wata ka wɔkura nɔɔbu wuna Yinni Gusunɔn sɔ̃ (675). 38Ben kɛtɛban geera sãa nɔrɔbun suba tɛna ka nɔɔba tia (36.000). Mi sɔɔ, ba wata ka wɔkura yiru wuna Yinni Gusunɔ sɔ̃. 39Ben kɛtɛkunun geera sãa nɔrɔbun suba tɛna ka nɛɛra wunɔbu (30.500). Mi sɔɔ, ba wata ka tia wuna Yinni Gusunɔn sɔ̃. 40Tɔn be ba mwɛɛran geera maa sãa nɔrɔbun suba wɔkura nɔɔbu ka tia (16.000). Mi sɔɔ, ba tɛna ka yiru wuna Yinni Gusunɔn sɔ̃. 41Ma Mɔwisi u Gusunɔgia kpuro yãku kowo Eleasaa wɛ̃ nge mɛ Gusunɔ u nùn sɔ̃ɔwa u ko. 42- 43Bɔnu ye ba Isireli be ba tie wɛ̃ ya nɛwa ka be ba tabu dagia. Ya sãawa nɔrɔbun suba gooba wunɔbu ka tɛna ka nɔɔba yiru ka nɛɛra wunɔbu (337.500), 44ka kɛtɛba nɔrɔbun suba tɛna ka nɔɔba tia (36.000) 45ka kɛtɛkunu nɔrɔbun suba tɛna ka nɛɛra wunɔbu (30.500), 46ka tɔmbu nɔrɔbun suba wɔkura nɔɔbu ka tia (16.000). 47Bɔnu ye Mɔwisi u Isireli be wɛ̃ sɔɔ, ye u wuna Yinni Gusunɔn sɔ̃, yera tia tia weeraakuru baateren wɔllɔ, tɔmbu sɔɔ, ka yaa sabenu sɔɔ. Ma u ye kpuro Lefiba wɛ̃ be ba sɔmburu mɔ̀ sãa yerɔ, nge mɛ Yinni Gusunɔ u nùn wooda wɛ̃. 48Tabu kowobu nɔrɔm nɔrɔm wirugibu ka wunɔm wunɔm wirugibu ba mɛnnama ba na Mɔwisin mi. 49Ma ba nùn sɔ̃ɔwa ba nɛɛ, sa tabu kowobu gara be sa kpare. Baa tɔn turo u ǹ kare be sɔɔ. 50Yen sɔ̃na sa ka Yinni Gusunɔ takarun kɛ̃nu naawa ni ba kua ka wura. Niya sumi ka taaminu ka swaa tonkunu ka yɔni. Kpa nu n sãa nge torarun yãkuru. 51Ma Mɔwisi ka yãku kowo Eleasaa ba kɛ̃ɛ ni kpuro mwa ni ba kua ka wura mi. 52Kɛ̃ɛ ni tabu kowobun wirugii be, ba Yinni Gusunɔ wɛ̃ mi, nin bunum mu koo ko nge kilo wunaa wata ka wɔkurun saka. 53Adama be ba sãa tabu kowobu ba ben arumani ye ba gura tii yiiyawa kpuro. 54Mɔwisi ka Eleasaa ba ka kɛ̃ɛ ni kpuro da ba yi Yinni Gusunɔn kurɔ, Yinni Gusunɔ u n ka win tɔmbu Isireliba yaaye.

will be added

X\