Gbaburu 30

1Yeniwa Mɔwisi u Isireliba kpuro sɔ̃ɔwa nge mɛ Yinni Gusunɔ u nùn yiire. 2Mɔwisi u Isireliban bwese kɛrin wirugibu sɔ̃ɔwa u nɛɛ, wee wooda ye Yinni Gusunɔ u wɛ̃. 3U nɛɛ, goo ù n nɔɔ mwɛɛru kua ma u koo nùn kɛ̃ru wɛ̃, ǹ kun mɛ ù n bɔ̃rua u nɛɛ, u koo tii nɛnɛ gãanu ganun sɔ̃, u ǹ win gari yi kɔbiamɔ. U koo win nɔɔ mwɛɛ te yibiawa. 4Bii wɔndia ù n Yinni Gusunɔ nɔɔ mwɛɛru kua, ǹ kun mɛ, ù n bɔ̃rua sanam mɛ u gina wãa win tundon nɔma sɔɔ, 5ma tundo wi, u ǹ nùn ye yinari sanam mɛ u yen gari nua, saa ye sɔɔ, wɔndia wi, u koo win nɔɔ mwɛɛ te yibiawa. 6Adama win tundo ù n nùn ye yinari sanam mɛ u yen gari nua, saa ye sɔɔ, wɔndia wi, u ǹ maa nɔɔ mwɛɛ te yibiamɔ. Yinni Gusunɔ u koo nùn yen suuru kua, domi win tundowa u nùn ye yinari. 7Wɔndia goo ù n nɔɔ mwɛɛru kua, ǹ kun mɛ ù n bɔ̃rua n deema u ǹ bwisika saa ye u bɔ̃ri yi mɔ̀, yen biru ma u durɔ sua, 8ma win durɔ kun nùn ye yinari sanam mɛ u yen gari nua, u koo win nɔɔ mwɛɛ te yibiawa. 9Adama win durɔ ù n ye yina sanam mɛ u yen gari nua, u ǹ maa nɔɔ mwɛɛ te yibiamɔ te u kua. Yinni Gusunɔ u koo maa nùn suuru kua. 10Tɔn kurɔ wìn durɔ gu, ǹ kun mɛ wi ka durɔ ba yinana, ù n nɔɔ mwɛɛru kua, u koo tu yibiawa. 11Kurɔ mɔro goo ù n nɔɔ mwɛɛru kua, ǹ kun mɛ ù n bɔ̃rua, 12ma win durɔ kun nùn ye yinari sanam mɛ u yen gari nua, kurɔ wi, u koo win nɔɔ mwɛɛ te yibiawa. 13Adama win durɔ ù n nùn ye yinari sanam mɛ̀ sɔɔ u yen gari nua, kurɔ wi, u ǹ maa nɔɔ mwɛɛ te yibiamɔ. Yinni Gusunɔ u koo nùn suuru kua domi win durɔwa u nùn ye yinari. 14Kurɔ mɔro ù n nɔɔ mwɛɛru kua, ǹ kun mɛ ù n bɔ̃rua u nɛɛ, u koo tii nɛnɛ gãanu ganun sɔ̃, win durɔwa u koo de nɔɔ mwɛɛ te, tu koora, ǹ kun mɛ tu wɔruma. 15Sanam mɛ durɔ wi, u gari yi nua, ù kun ye yinɛ, u yi wurawa. Kurɔ wi, u koo nɔɔ mwɛɛ te yibiawa. 16Adama durɔ wi, ù n dera n tɛ u sere nùn ye yinari, durɔ wiya u koo yen taarɛ wa. 17Wooda yeniwa Yinni Gusunɔ u Mɔwisi wɛ̃ wɔndia ka win tundon sɔ̃, ka sere maa kurɔ mɔro ka win durɔn sɔ̃.

will be added

X\