Gbaburu 29

1Suru nɔɔba yirusen tɔ̃ɔ gbiikiru sɔɔ, i ku sɔmburu garu ko. I ko i mɛnnawa i Yinni Gusunɔ takaru ko. I ko i tɔ̃ɔ te diwa i n kɔbi soomɔ. 2I ko Yinni Gusunɔ yãku dɔ̃ɔ mwaararuginu kua ni nu koo nùn nuburu dore, ka kɛtɛ kpɛma, ka yãa kinɛru, ka yãa kinɛ kpɛmminu wɔ̃ɔ tia tiaginu nɔɔba yiru. Yaa sabe ni kpuro nu ko n sãawa ni nu ǹ alebu gaa mɔ. 3I ko i ka yaa sabe ten baatere yãkuru kowa ka som mɛ ba burina ka gum. Ì n yãkuru mɔ̀ ka kɛtɛ, som kilo nɔɔba nnɛwa i ko i ka ko. Ì n mɔ̀ ka yãa kinɛru, som kilo nɔɔba tia i ko i ka ko. 4Ì n maa mɔ̀ ka yãa kinɛ kpɛmbu, som kilo itawa i ko i ka ko. 5I ko i maa torarun yãkuru ko ka boo kinɛru. 6Yãku niniwa i ko i n da ko suru baawuren tɔ̃ɔ gbiikiruginu ka tɔ̃ɔ baatereginu ka nin som ka tam baasi. I ko nu kowa nge mɛ ba nin wooda yi. Nu ko n sãawa yãku dɔ̃ɔ mwaararuginu ni nu koo nɛ, Yinni Gusunɔ nuburu dore. 7Suru nɔɔba yirusen sɔ̃ɔ wɔkuruse sɔɔ, i ku sɔmburu garu ko. I ko i mɛnnawa i Yinni Gusunɔ sã kpa i nɔɔ bɔke. 8I ko i Yinni Gusunɔ yãku dɔ̃ɔ mwaararuginu kuawa ni nu koo nùn nuburu dore, ka naa kpɛma, ka yãa kinɛ kpɛmminu wɔ̃ɔ tia tiaginu nɔɔba yiru. Yaa sabe ni kpuro nu ko n sãawa ni nu ǹ alebu gaa mɔ. 9Ì n yãkuru mɔ̀, i ko i nu kowa ka som mɛ ba burina ka gum. Ì n yãkuru mɔ̀ ka naa, som kilo nɔɔba nnɛwa i ko i ka ko. Ì n mɔ̀ ka yãa kinɛru som kilo nɔɔba tia i ko i ka ko. 10Ì n maa mɔ̀ ka yãa kinɛ kpɛmbu, som kilo itawa i ko i ka ko. 11Yãku ninin biru, i ko i yãkuru ko ka boo kinɛru bu ka bɛɛ bɛɛn durum wɔka, torarun yãkuru ka tɔ̃ɔ baateregiru ka nin som ka tam baasi. 12Suru nɔɔba yirusen sɔ̃ɔ wɔkura nɔɔbuse sɔɔ, i bɛɛn sɔma derio ye i ra ko, kpa i mɛnna i nɛ, Yinni Gusunɔ sã kpa i man tɔ̃ɔ bakaru diiya sɔ̃ɔ nɔɔba yiru. 13Tɔ̃ɔ baka ten tɔ̃ɔ gbiikiru sɔɔ, i ko i nɛ, Yinni Gusunɔ yãku dɔ̃ɔ mwaararuginu kuawa ni nu koo man nuburu dore. I ko i nu kowa ka naa kpɛmi wɔkura ita ka yãa kinɛnu yiru, ka yãa kinɛ kpɛmminu wɔkura nnɛ ni nu wɔ̃ɔ tia tia mɔ. Yaa sabe ni kpuro nu ko n sãawa ni nu ǹ alebu gaa mɔ. 14I ko i ka yaa sabe nin baatere yãkuru kowa ka som mɛ ba burina ka gum. Ì n yãkuru mɔ̀ ka naa, som kilo nɔɔba nnɛwa i ko i ka ko. Ì n mɔ̀ ka yãa kinɛru, som kilo nɔɔba tia i ko i ka ko. 15Ì n maa mɔ̀ ka yãa kinɛ kpɛmbu, som kilo itawa i ko i ka ko. 16I ko i maa yãkuru ko ka boo kinɛru bu ka bɛɛ bɛɛn durum wɔka, tɔ̃ɔ baateren yãku dɔ̃ɔ mwaararugii te i ra ko ka som ka tam sannu baasi. 17- 34Tɔ̃ɔ baateren yãku ni baasi, i ko i maa yãkunu ko ka yaa sabe ni nu ǹ alebu gaa mɔ ka maa som mɛ ba burina ka gum, nge mɛ i ra ko saa tɔ̃ɔ baka ten sɔ̃ɔ yirusen di n ka girari ten sɔ̃ɔ nɔɔba yiruse. Nge mɛniwa i ko i yãku ni koosina. Sɔ̃ɔ yiruse sɔɔ, i ko i yãkuru kowa ka kɛtɛ kinɛ kpɛnnu wɔkura yiru ka yãa kinɛnu yiru, ka yãa kinɛ kpɛmminu wɔkura nnɛ wɔ̃ɔ tia tiaginu ka maa boo kinɛru. Sɔ̃ɔ itase sɔɔ, i ko i yãkuru kowa ka kɛtɛ kinɛ kpɛnnu wɔkura tia ka yãa kinɛnu yiru, ka yãa kinɛ kpɛmminu wɔkura nnɛ, wɔ̃ɔ tia tiaginu ka maa boo kinɛru. Sɔ̃ɔ nnɛse sɔɔ, i ko i yãkuru kowa ka kɛtɛ kinɛ kpɛnnu wɔkuru, ka yãa kinɛnu yiru ka yãa kinɛ kpɛmminu wɔkura nnɛ, wɔ̃ɔ tia tiaginu, ka boo kinɛru. Sɔ̃ɔ nɔɔbuse sɔɔ, i ko i yãkuru kowa ka kɛtɛ kinɛ kpɛnnu nɔɔba nnɛ ka yãa kinɛnu yiru, ka yãa kinɛ kpɛmminu wɔkura nnɛ, wɔ̃ɔ tia tiaginu, ka boo kinɛru. Sɔ̃ɔ nɔɔba tiase, i ko i yãkuru kowa ka kɛtɛ kinɛ kpɛnnu nɔɔba ita ka yãa kinɛnu yiru ka yãa kinɛ kpɛmminu wɔkura nnɛ, wɔ̃ɔ tia tiaginu, ka boo kinɛru. Sɔ̃ɔ nɔɔba yiruse sɔɔ, i ko i yãkuru kowa ka kɛtɛ kinɛ kpɛnnu nɔɔba yiru, ka yãa kinɛnu yiru, ka yãa kinɛ kpɛmminu wɔkura nnɛ, wɔ̃ɔ tia tiaginu, ka boo kinɛru. 35Tɔ̃ɔ baka ten sɔ̃ɔ nɔɔba itase sɔɔ, i bɛɛn sɔma derio ye i ra ko, kpa i mɛnna i ka nɛ, Yinni Gusunɔ sã, 36kpa i man yãku dɔ̃ɔ mwaararuginu kua ni nu koo man nuburu dore, ka kɛtɛ kinɛru, ka yãa kinɛru ka yãa kinɛ kpɛmminu nɔɔba yiru wɔ̃ɔ tia tiaginu. Yaa sabe ni kpuro nu ko n sãawa ni nu ǹ alebu gaa mɔ. 37I ko i yãku nin baatere kowa ka som ka tam nge mɛ ba yen wooda yi. 38Kpa i maa yãkuru ko ka boo kinɛru bu ka bɛɛ bɛɛn durum wɔka, tɔ̃ɔ baateren yãku dɔ̃ɔ mwaararugiru ka ten som ka tam baasi. 39Yãku nini kpurowa i ko i nɛ, Yinni Gusunɔ kua tɔ̃ɔ baka te sɔɔ, ka sere maa yãku ni i ra ko baadomma. Niya yãku dɔ̃ɔ mwaararuginu ni i ra ko ka som ka tam, ka siarabun yãkunu, ka kɛ̃nu, ka sere maa ni i ra ko nɔɔ mwɛɛrun sɔ̃.

will be added

X\