1 Selofadi, wi u sãa Hefɛɛ ka Galadi ka Makiri ka Manasen sikadobu Yosɛfun bweseru sɔɔ, u bii tɔn kurɔbu nɔɔbu mara. Bera Mala ka Nɔa ka Hogula ka Milika ka Tirisa 2 ma be, ba na Mɔwisi ka yãku kowo Eleasaan mi, ka wirugibun mi ka sere Isireliba kpuron mi Yinni Gusunɔn sãa yerun kɔnnɔwɔ ba nɛɛ, 3 bɛsɛn tundo u guwa gbaburɔ. U ǹ wãa Koren bibun wuuru sɔɔ be ba Yinni Gusunɔ seesi. U guwa win tii tiin toranun sɔ̃. Adama u ǹ bii tɔn durɔ mɔ. 4 N weenɛ bu win bwese kɛra deri yèn sɔ̃ u ǹ bii tɔn durɔ mɔ? I sun tem wɛ̃ɛyɔ bɛsɛn tundon maabu ka wɔnɔbun suunu sɔɔ. 5 Ma Mɔwisi u Yinni Gusunɔ kana ben gari yin sɔ̃. 6 Ma Yinni Gusunɔ u nùn wisa u nɛɛ. 7 Selofadin bii be, ba gem mɔ. A bu tem wɛ̃ɛyɔ mɛ ben tundo u ko n daa mɔ. Kaa bu mu wɛ̃wa ben tundon maabu ka wɔnɔbun suunu sɔɔ. 8 Yen biru, kpa a Isireliba sɔ̃ a nɛɛ, goo ù n gu ma u ǹ bii tɔn durɔ mɔ, win bii tɔn kurɔwa u koo win arumani sua u tubi di. 9 Ù kun maa bii tɔn kurɔ mɔ, win maabu ka wɔnɔba ba koo win arumani sua bu tubi di. 10 Ù kun maa maabu ka wɔnɔbu mɔ, win tundon maabu ka wɔnɔba ba koo win arumani sua bu tubi di. 11 Win tundo ù kun maa maabu ka wɔnɔbu mɔ, win mɛro bisi wi u fɛ̃ɛ fɛ̃ɛ bo wiya u koo win arumani tubi di. Yeni ya ko n sãawa wooda Isireliba sɔɔ nge mɛ nɛ, Yinni Gusunɔ na ye Mɔwisi wɛ̃. 12 Yinni Gusunɔ u Mɔwisi sɔ̃ɔwa u nɛɛ, a yɔɔwo Abarimun guu tenin wii kpiirɔ, kpa a nɔni seeya a tem mɛ mɛɛri mɛ kon Isireliba wɛ̃. 13 Yen biru, kpa a kpuna a gbi nge mɛ wunɛn mɔɔ Aroni u gu. 14 Domi i ǹ woodaba mɛm nɔɔwɛ Sinin gbaburɔ, sanam mɛ Isireliba ba man seesi. I ǹ maa man bɛɛrɛ wɛ̃ ben wuswaaɔ sanam mɛ ba nim kanamɔ. Yera n dera na Mɛriban nim mɛ soka Sannɔn nim Kadɛsiɔ, Sinin gbaburɔ. 15 Ma Mɔwisi u Yinni Gusunɔ sɔ̃ɔwa u nɛɛ, 16 Yinni Gusunɔ, wunɛ wi a taka koora kpuro hunde wɛ̃, a goo gɔsio, a nùn ko wirugii wi u koo kpĩ u wunɛn tɔmbu kpara kpa ba kun ka sãa nge yãa ni nu ǹ kparo mɔ. 18 Ma Yinni Gusunɔ u Mɔwisi wisa u nɛɛ, Yosue Nunin bii wee, wì sɔɔ nɛn Hunde u yiba. A nùn suo kpa a nùn nɔma sɔndi. 19 Kaa ka nùn dawa yãku kowo Eleasaan wuswaaɔ, kpa a nùn ko wunɛn kɔsire Isireliba kpuron nɔni biru. 20 A nùn wunɛn yiikon bɔnu wɛ̃ɛyɔ kpa Isireliba kpuro bu nùn mɛm nɔɔwa. 21 Yãku kowo Eleasaawa u ko n da wa kpa Eleasaa u man kana win sɔ̃ ka woro te ba ra ko ka urimu. Win gariya Yosue ka Isireliba kpuro ba ko n da ka sɔmburu ko. 22 Ma Mɔwisi u kua ye Yinni Gusunɔ u nùn sɔ̃ɔwa. U Yosue sua ma u ka nùn da yãku kowo Eleasaan wuswaaɔ Isireliba kpuron nɔni biru. 23 Ma u nùn nɔma sɔndi u nùn kua win kɔsire nge mɛ Yinni Gusunɔ u nùn sɔ̃ɔwa.
