Gbaburu 25

1Saa ye Isireliba ba wãa Sitimuɔ, yera ba ka Mɔabuban wɔndiaba sakararu torua. 2Ma wɔndia be, ba dera Isireli be, ba ben bũu sãaru wɔri, ba ka bu di, ba ka bu nɔra. Ma ba ben bũnu yiira ba sãwa. 3Ba tii bũu wi ba mɔ̀ Baali Peorigii wɛ̃. Ma Yinni Gusunɔ u ka bu mɔru kua. 4U Mɔwisi sɔ̃ɔwa u nɛɛ, a Isireliban wirugibu kpuro mɛnnɔ, kpa a de bu be ba taarɛ mɔ go sɔ̃ɔ sɔɔ nɛn wuswaaɔ. Saa yera nɛn mɔru ya koo sure. 5Ma Mɔwisi u Isireliban wirugibu sɔ̃ɔwa u nɛɛ, ben baawure u mɛɛrio win tɔmbu sɔɔ be ba Mɔabuban bũu wi ba mɔ̀ Baali Peorigii sãamɔ, kpa u bu go. 6Saa yè sɔɔ Isireliba ba wuri mɔ̀ Yinni Gusunɔn kurun kɔnnɔwɔ, saa yera ben turo u ka kurɔ Madiani goo na wigibun mi, Isireliba kpuron wuswaaɔ ka Mɔwisin wuswaaɔ. 7Ye Finɛɛsi, Eleasaan bii, Aronin debubu u wa mɛ, yera u seewa tɔn ben suunu sɔɔn di u yaasa sua. 8Ma u Isireli wi swĩi sere win kurɔ ma u bu yaasa sɔkura ben bɔsɔnɔ. Saa yera wahala ya yɔ̃ra Isireliba sɔɔ. 9Yen dɔma te, tɔmbu nɔrɔbun suba yɛnda nnɛwa (24.000) ba gu. 10Yinni Gusunɔ u maa Mɔwisi sɔ̃ɔwa u nɛɛ, 11wee yãku kowo Finɛɛsi, Eleasaan bii, Aronin debubu, u nɛn mɔru suresia ye u ka man sanna, Isireliban suunu sɔɔ. Yen sɔ̃na na ǹ bu kpeerasie. 12Yen sɔ̃, a nùn sɔ̃ɔwɔ a nɛɛ, wee na ka nùn arukawani bɔkumɔ ye ya sãa bɔri yɛndugia. 13Arukawani ye, ya koo de wi ka win bibun bweseru ba n sãa yãku kowobu sere ka baadommaɔ. Domi u nɛ, Gusunɔ win Yinni sanna. Ma ya dera Isireliba ba ben torarun suuru wa. 14Isireli wi ba go ka kurɔ Madiani wi sannu, win yĩsira Simiri, Salun bii. U sãawa Simɛɔn bwese kɛra tian wirugii. 15Kurɔ Madiani win yĩsira maa Kosibi. Win tundon yĩsira Suri. U sãawa Madianiban bwese kɛra tian wirugii. 16Yinni Gusunɔ u maa Mɔwisi sɔ̃ɔwa u nɛɛ, 17i Madianiba wɔrio, kpa i bu go. 18Domi ba sãawa bɛɛn yibɛrɛba be ba bɛɛ torasia ben bũu Baali Peorigiin sɔ̃ ka Kosibi, ben wirugii turon bii wɔndian sɔ̃, wi ba go sanam mɛ wahala ya seewa Peoriɔ.

will be added

X\