Gbaburu 24

1Ye Balamu u wa ma Yinni Gusunɔ u yɔ̃rariwa u Isireliba domaru kua, yera u ǹ maa bikiaru kue Yinni Gusunɔn mi nge mɛ u ra raa ko yellu. Adama u win wuswaa tĩiwa gbaburun bera gia. 2Ye u nɔni seeya u wa Isireliba ba ben sansani gire bwese kɛra ka bwese kɛra, yera Gusunɔn Hunde nùn yɔɔwa. 3Ma u gari gerubu wɔri u nɛɛ, nɛ, Balamu, Beorin bii, wee ye na gerumɔ. Na ra yam wa. 4Na ra Gusunɔn nɔɔ nɔ. Wi, Dam kpurogii u ra de n kãsinu wa. Domi u ra man tii sɔ̃ɔsi nà n nùn sãamɔ. 5Bɛɛ Isireliba Yakɔbun bweseru, bɛɛn kunu nu wã. 6Nu tɛrie nge wɔwa ma nu sãa nge gbaa te ta wãa daarun bɔkuɔ. Ma nu gire nge dãa ni ba mɔ̀ sɛduru ni Yinni Gusunɔ u duura daarun bɔkuɔ ka sere dãa kiki si ba mɔ̀ aloɛsi. 7Ba nim mɔ mu yiba mu yarimɔ mu dãa gbaaru nim yɛ̃kamɔ. Isireliban sina boko u koo Agagi tabu di kpa win bandu tu dam ko. 8Gusunɔwa u bu yara Egibitin di ka win dam bakam nge kɛtɛ gbeekiru. Wiya u ra de bu bwese tukunu kamia nɔni kpaki teeru kpa bu nu sɛ̃ɛnu twee bu nin kukunu kɔsuku bu go. 9Be wee ba kpunamɔ nge gbee sinansu. Wara u koo kpĩ u bu seeya. Bɛɛ, Isireliba, wi u bɛɛ domaru kua, u koo domaru wa. Wi u maa bɛɛ bɔ̃rusi, u koo bɔ̃ri wa. 10Yera Balakin mɔru ya seewa sere u nɔma yɛ̃kana. Ma u nɛɛ, Balamu, na nun sokawa a ka nɛn yibɛrɛba bɔ̃rusi. Adama wee a bu domaru kua nɔn ita. 11Yen sɔ̃, a doonɔ minin di tɛ̃, a wura wunɛn yɛnuɔ. Na raa nɛɛ, kon nun gãanu kɛ̃, adama Yinni Gusunɔ kun wure a ye wa. 12Ma Balamu u Balaki wisa u nɛɛ, na ǹ daa wunɛn gɔro be sɔ̃ɔwa na nɛɛ, 13baa à n man wunɛn diru kã, te ta wura ka sii geesu yiba na ǹ kpɛ̃ n gea ǹ kun mɛ kɔ̃sa gere ma n kun mɔ ye Yinni Gusunɔn u man sɔ̃ɔwa? 14Tɛ̃ wee na gɔsirɔ nɛn tɔmbun mi. Adama a na a nɔ yè Isireliba ba koo wunɛn tɔmbu kua sia. 15Ma u maa nɛɛ, wee ye nɛ Balamu Beorin bii na gerumɔ, nɛ wi na ra yam wa. 16Na ra Yinni Gusunɔn nɔɔ nɔ. Na maa wi, Wɔrukoon himba yɛ̃. Na ra wi Dam kpurogiin kãsinu wa, domi u ra man tii sɔ̃ɔsi nà n nùn sãamɔ. 17Na wa ye ya sisi, adama n ǹ mɔ gisɔ. Na wa ye ya koo koora, adama n ǹ tɛ̃. Wee kpera gaa yara Yakɔbun bweserun di. Sina boko goo u yara Isireliban suunu sɔɔn di, be, be ba sãa Yakɔbun bweseru. Ma u ka win sina dɛka Mɔabuba soomɔ baa saburosɔ. Ma ya be ba tii suen bweserun winu kɔsukumɔ. 18U maa Edɔmu be ba sãa win yibɛrɛban tem mwa mɛ ba mɔ̀ Seiri. Ma Isireliba ba nasara sua. 19Sina boko wi, u win yibɛrɛba taare. Ma u be ba raa tie go u kpeerasia mam mam. 20Ye Balamu u Amalɛkiba wa, yera u nɛɛ, Amalɛkibara ba dam bo dunia sɔɔ. Adama ba koo bu kam koosia sɔ̃ɔ teeru. 21Ye Balamu u maa Keniba wa, yera u nɛɛ, bɛɛ Keniba, wee bɛɛn wãa yera naanɛ mɔ nge gunɔ sokuru te ta yii kpee baa sɔɔ. 22Adama Asirigibu ba koo bɛɛ yoru mwɛɛri kpa bu bɛɛn wãa yenu kɔsuku. 23Ma Balamu u maa nɛɛ, Gusunɔ ù n goon gɔɔn saa yi, yɛ̃ro u koo kpĩ u n wãa? 24Goo nimkusu su koo na saa Kitimun di kpa yibɛrɛba bu Asirigibu ka Ebɛɛn bweseru sekuru doke. Adama yibɛrɛ ben tii ba koo kam kowa. 25Yeniban biru, Balamu u gɔsira u da win wuuɔ, ma Balaki u maa wura win yɛnuɔ.

will be added

X\