Gbaburu 23

1Ma Balamu u Balaki sɔ̃ɔwa u nɛɛ, u nùn yãku yenu nɔɔba yiru kuo. Yen biru, kpa u kɛtɛ nɔɔba yiru ka yãa kinɛnu nɔɔba yiru kasu. 2Ma Balaki u kua ye Balamu u nùn sɔ̃ɔwa. Ma wi ka Balamu ba kɛtɛ yen tia ka yãa kinɛ teeru go yãku yee nin baateren wɔllɔ. 3Yera Balamu u Balaki sɔ̃ɔwa u nɛɛ, a yɔ̃ro yãku dɔ̃ɔ mwaarugii nin bɔkuɔ kpa nɛ n dɛsira n da gam gum. Sɔrɔkudo Yinni Gusunɔ u koo man kure mi, kpa u man sɔ̃ ye kon nun sɔ̃. Ma Balamu u da gunguru garun wɔllɔ. 4Yera Yinni Gusunɔ u nùn kure ma Balamu u gerua u nɛɛ, wee na yãku yenu nɔɔba yiru kua ma na kɛtɛ ka yãaru go yãku yee nin baateren wɔllɔ. 5Saa yera Yinni Gusunɔ u nùn sɔ̃ɔwa ye u koo Balaki sɔ̃, ma u nɛɛ, u gɔsiro u wura Balakin mi. 6Ma Balamu u wura u da u Balaki deema mi u win yãku ni mɔ̀ ka Mɔabuban wirugibu gabu. 7Saa yera Balamu u gari gerua u nɛɛ, wee Balaki Mɔabun sunɔ u dera na na saa Aramun di. Wiya u dera na sarama saa sɔ̃ɔ yari yerun guunun di. U nɛɛ, n be na n Yakɔbun bweseru bɔ̃rusi. N be na n ka be Isireliba mɔru ko. 8Adama kon tɔnu bɔ̃rusi wi Gusunɔ kun bɔ̃rusi? Amɔna kon ka tɔnu mɔru ko wi Gusunɔ kun ka mɔru mɔ̀. 9Na Isireliba waamɔ guunu wɔllɔ ka gungunu wɔllɔ ba wãa nɛnɛm ba ǹ ka bweseru garu weenɛ. 10Goo kun kpɛ̃ u bu gari. Ba dabi nge yani sɛɛri mini. Wara u koo kpĩ u ben bɔnu nnɛn sube teeru gari. Na kanamɔwa n gbi nge Isireli be, be ba sãa gemgibu. Na kĩwa nɛn wãarun wii goberu ta n sãa nge begiru. 11Yera Balaki u Balamu bikia u nɛɛ, mba a man kuammɛ mɛsum. Na nun sokusiawa a ka nɛn yibɛrɛba bɔ̃rusi. Adama wee domara a bu kuammɛ. 12Ma Balamu u nùn wisa u nɛɛ, ye Yinni Gusunɔ u man sɔ̃ɔwa, n ǹ yera kon gere? 13Balaki u maa Balamu sɔ̃ɔwa u nɛɛ, a man swĩima su da gam gia. Min di kaa ben sukum wa n ǹ be kpuro. Be a wa mi, kpa a bu bɔ̃rusi. 14Ma u ka nùn da sansanin kɔ̃su yeru garun mi, Pisigan guuru wɔllɔ. Miya u maa yãku yenu nɔɔba yiru kua. Ma u naa kinɛru ka yãa kinɛru go yãku yee nin baateren wɔllɔ. 15Ma Balamu u Balaki sɔ̃ɔwa u nɛɛ, a yɔ̃ro mi a yãku dɔ̃ɔ mwaararuginu mɔ̀ mini, kpa n da n nɔ ye Yinni Gusunɔ u koo man sɔ̃. 16Yera Yinni Gusunɔ u na u ka Balamu yinna. Ma u nùn sɔ̃ɔwa ye u koo Balaki sɔ̃. Ma u nɛɛ, u wuro Balaki win mi. 17Ma u wura u da Balakin mi u deema u wãa win yãkunun bɔkuɔ, wi ka Mɔabuban wirugibu. Saa yera u Balamu bikia u nɛɛ, mba Yinni Gusunɔ u nun sɔ̃ɔwa. 18Ma Balamu u nɛɛ, Balaki, a seewo a swaa daki. Wunɛ Siporin bii, a swaa tem kpĩiyɔ a nɔ. 19Gusunɔ kun sãa nge tɔnu u sere weesu ko. U ǹ sãa nge tɔnu u sere kɔbia ye u raa gerua. Ye u gerua, yera u ra ko. Yèn himba u maa yi, ya ra koorewa. 20Wee Gusunɔ u man wooda wɛ̃ n Isireliba domaru kua. Win tiiwa u bu tu kua kɔ. Yen sɔ̃, na ǹ kpɛ̃ n tu yina. 21U ǹ toraru garu wa Isireliba sɔɔ. U sãawa Gusunɔ ben Yinni, u maa wãa ka be. U sãawa ben sina boko. U maa nuku dobu mɔ ben sɔ̃. 22Wiya u bu yara Egibitin di. U bu dam wɛ̃ nge kɛtɛ gbeekiru. 23Sɔroru ta ǹ kpɛ̃ tu Isireliba gãanu kua. Dobo dobo ya ǹ kpɛ̃ yu bu nɔni wɔ̃ke. Saa yà n tura ba koo bu sɔ̃ bu nɛɛ, bu mɛɛrio ye Yinni Gusunɔ u kua. 24Ba sãawa nge gbee sunɔ ge ga ra yaa mwɛ gu tem kpa gu yen yɛm nɔ gu sere da gu kpuna. 25Ma Balaki u Balamu sɔ̃ɔwa u nɛɛ, à kun kĩ a bu bɔ̃rusi, a ku bu domaru kua. 26Yera Balamu u nùn wisa u nɛɛ, na ǹ daa nun sɔ̃ɔwa na nɛɛ, kon kowa ye Yinni Gusunɔ u gerua? 27Balaki u maa Balamu sɔ̃ɔwa u nɛɛ, ǹ n mɛn na, a na su da gam gia. Sɔrɔkudo Yinni Gusunɔ u koo wura a Isireliba bɔ̃rusi nɛn sɔ̃. 28Ma Balaki u ka Balamu da Peorin guuru wɔllɔ tèn min di ba gbaburu mɛɛra. 29Balamu u Balaki sɔ̃ɔwa u nɛɛ, a man yãku yenu nɔɔba yiru kuo, kpa a ka man naa kinɛnu nɔɔba yiru ka yãa kinɛnu nɔɔba yiru naawa, 30ma Balaki u kua ye Balamu u nùn sɔ̃ɔwa mi. U naa kinɛru ka yãa kinɛru go yãku yee nin baateren wɔllɔ.

will be added

X\