Gbaburu 22

1Yen biru, Isireliba ba da ba ben sansani gira Mɔabun wɔwaɔ, Yuudɛnin bɔkuɔ, sɔ̃ɔ yari yeru gia, Yerikon deedeeru. 2Balaki, Siporin bii u wa ye Isireliba ba Amɔreba kua. 3Yera Mɔabuba ba nanda Isireliban dabirun sɔ̃. 4Ma ba Madianiban guro gurobu sɔ̃ɔwa ba nɛɛ, tɔn dabi teni, ta koo sun wɔri tu di nge mɛ nɛɛ yi ra yakasu di. Saa ye sɔɔ, Balakiwa u sãa Mɔabuban sunɔ. 5Yera u sɔmɔbu gɔra Balamu Beorin biin mi, Petoriɔ ye ya wãa Efaratin daarɔ win tɔmbun temɔ, u nùn sɔ̃ɔwa u nɛɛ, wee, bweseru gara yarima saa Egibitin di ma ta handunia kpuro pusi. Ta maa man turuku kooma. 6Yen sɔ̃, na nun kanamɔ a na a man tɔn be bɔ̃rusia. Domi ba man dam kere. À n kua mɛ, sɔrɔkudo kon kpĩ n bu kamia n gira nɛn tem di. Domi na yɛ̃ ma wi a domaru kua u ra domaru wa. Wi a maa bɔ̃rusi, u ra bɔ̃ri wa. 7Ma Mɔabuba ka Madianiban guro guro be, ba da Balamu sɔro win mi, ba kɛ̃nu nɛni. Ye ba tura mi, yera ba nùn Balakin gari yi sɔ̃ɔwa. 8Balamu u bu sɔ̃ɔwa u nɛɛ, i kpunɔ mini wɔ̃ku te, sisiru kpa n bɛɛ sɔ̃ ye Yinni Gusunɔ u man sɔ̃ɔwa. Ma Mɔabun guro guro be, ba sina mi. 9Yera Yinni Gusunɔ u Balamu bikia u nɛɛ, tɔn berà ba wãa wunɛn mi. 10Balamu u Gusunɔ wisa u nɛɛ, Balaki Siporin bii, Mɔabuban sina bokowa u tɔn be gɔrima bu man sɔ̃ bu nɛɛ, 11wee, bweseru gara yarima Egibitin di ma ta handunia pusi. Yen sɔ̃, n be na n tɔn be bɔ̃rusi. Sɔrɔkudo u koo kpĩ u tɔn be wɔri u kamia u gira win tem di. 12Gusunɔ u Balamu sɔ̃ɔwa u nɛɛ, a ku da. A ku tɔn be bɔ̃rusi domi na bu domaru kua. 13Ma Balamu u seewa buru buru u Balakin sɔmɔ be sɔ̃ɔwa u nɛɛ, i wuro bɛɛn temɔ, domi Yinni Gusunɔ u yina n ka bɛɛ da. 14Ma tɔn be, ba seewa ba gɔsira Balakin mi. Ma ba nùn sɔ̃ɔwa ma Balamu u yina u na. 15Yera Balaki u maa wirugibu gabu soka u gɔra be ba gbiikobu dabiru ka bɛɛrɛ kere. 16Ba seewa ba da Balamun mi. Ye ba tura mi, yera ba nùn sɔ̃ɔwa ba nɛɛ, amɛniwa bɛsɛn sina boko Balaki, Siporin bii u gerua. U nɛɛ, u nun kanamɔwa a ku yina a na. 17Domi u koo be nun bɛɛrɛ baka wɛ̃. U koo ko kpuro ye a nùn bikia. A gesi na a nùn tɔn be bɔ̃rusia. 18Yera Balamu u tɔn be wisa u nɛɛ, baa Balaki ù n man win diru kã te ta wura ka sii geesu yiba na ǹ kpɛ̃ n gãanu ko. Domi na ǹ kpɛ̃ n Yinni Gusunɔn gere yina. 19Ka mɛ, i kpunɔ wɔ̃ku te, kpa n bɛɛ sɔ̃ ye u man sɔ̃ɔwa. 20Ma Yinni Gusunɔ u Balamu kure wɔ̃ku te, u nùn sɔ̃ɔwa u nɛɛ, tɛ̃ yèn sɔ̃ tɔn be, ba na bu nun soku, a seewo a ka bu da. Adama kaa kowa ye na nun sɔ̃ɔwa. 21Balamu u seewa buru buru, u win kɛtɛku niu gaari bɔkua ma u ka Mɔabuban guro guro be da. 22Ye Balamu u swaa wɔri u win kɛtɛku sɔni ma win sɔm kowobu yiru ba nùn swĩi, yera Yinni Gusunɔ u ka nùn mɔru kua ma u nùn win gɔrado gɔria u bunana swaaɔ. 23Ye kɛtɛku ge, ga gɔrado wi wa u yɔ̃ swaa suunuɔ u win takobi womɛ, yera ga gɛra ga da yakasɔ. Ma Balamu u gu so, u ka gu swaa sure. 24Ma gɔrado wi, u da u yɔ̃ra swaa kisa gaa sɔɔ, resɛm gbaanu yirun ganin baa sɔɔ. 25Yera kɛtɛku ge, ga maa Yinni Gusunɔn gɔrado wi wa ma ga da ga mani gani yin tiaɔ. Ma ga Balamun naasu ka gana ye baari. Ma u gu so kpam. 26Yera gɔrado wi, u swɛnya u da wuswaaɔ, mi ba ǹ kpɛ̃ bu maa gɛra gam. 27Yera kɛtɛku ge, ga maa gɔrado wi wa ma ga wɔruma. Saa yera Balamu u maa gu soberu wɔri ka mɔru. 28Yera Yinni Gusunɔ u dera kɛtɛku ge, ga nɔɔ wukia ga gari gerua ga nɛɛ, Balamu, mba na nun kua a ka man so mɛ sere nɔn ita. 29Ma u kɛtɛku ge wisa u nɛɛ, a man yaakoru mɔ̀wa. Nà n daa mam takobi nɛni, na n nun go kɔ. 30Ma kɛtɛku ge, ga nùn wisa ga nɛɛ, na sãawa wunɛn kɛtɛku, a ra man sɔni baadomma sere n ka gisɔ girari. Nge mɛya na ra nun kue? Ma Balamu u wisa u nɛɛ, aawo, n ǹ mɛ. 31Saa yera Yinni Gusunɔ u Balamun nɔni wukia ma u Gusunɔn gɔrado wi wa u yɔ̃ swaa suunu sɔɔ u win takobi womɛ. Yera u yiira u wuswaa tem girari. 32Ma gɔrado wi, u nùn bikia u nɛɛ, mban sɔ̃na a ka wunɛn kɛtɛku so mɛ, sere nɔn ita. Na nawa n ka nun yɔ̃rasia. Domi karin swaa a swĩi mi. 33Kɛtɛku ge, ga man wa ma ga gɛra sere nɔn ita. Gà kun daa gɛre mɛ, kon daa nun gowa kpa n gen tii deri. 34Ma Balamu u gɔrado wi sɔ̃ɔwa u nɛɛ, wee na tora. Na ǹ yɛ̃ ma a wãa swaaɔ. Tɛ̃, nɛn sanum mɛ, mù kun ka nun naawɛ, kon gɔsira n wura nɛn yɛnuɔ. 35Ma gɔrado wi, u nɛɛ, aawo. A ka tɔn be doo. Adama gari yi kon nun sɔ̃, yiya kaa gere. Ma Balamu u ka Balakin tɔn be da. 36Sanam mɛ Balaki u nua ma Balamu u wee, yera u nùn sennɔ da sere Mɔabuban wuuɔ ben tem nɔɔ bura yerɔ Aanɔɔn daarɔ. 37Ma Balaki u nùn sɔ̃ɔwa u nɛɛ, mban sɔ̃na a ǹ nɛ sanam mɛ na gbia na nun sɔmɔbu gɔria. A tamaa na ǹ kpɛ̃ n nun gãanu kɛ̃? 38Ma Balamu u Balaki wisa u nɛɛ, geema, wee, na na wunɛn mi tɛ̃, adama na ǹ gɛɛ mɔ n nun sɔ̃. Yinni Gusunɔwa u koo man sɔ̃ ye kon nun sɔ̃. 39Ma Balamu ka Balaki ba swaa wɔrima ba tunuma Kiriati Husɔtuɔ. 40Yera Balaki u kɛtɛba ka yãanu go u ka yãkuru kua. 41Yen sisiru bururu, Balaki u Balamu sua ba yɔɔwa Bamɔtu Baaliɔ. Min diya ba Isireliban sukum waamɔ.

will be added

X\