Gbaburu 21

1Aradin sunɔ Kananigii wi u wãa sɔ̃ɔ yɛ̃san nɔm dwaru gia u nua ma Isireliba ba wee ka Atarimun swaa. Yera u da u bu tabu wɔri, ma u ben gabu yoru mwɛɛra. 2Yera Isireliba ba Yinni Gusunɔ nɔɔ mwɛɛ teni kua ba nɛɛ, Yinni Gusunɔ, à n sun tɔn beni nɔmu bɛria, sa ko ben wusu kpeerasiawa mam mam. 3Ma u Isireliban gari yi wura u bu Kanani be nɔmu bɛria. Ma ba Kanani be, ka ben wusu kpeerasia. Yera ba yam mi yĩsiru kã Hɔɔma. Yen tubusiana bansu. 4Yeniban biru, Isireliba ba seewa Horin guurun di ma ba kpa ka nim wɔ̃ku ge ba mɔ̀ Naa yarin swaaɔ kpa bu ka Edɔmun tem bɛwa. Adama ba tɛmanabu kpana swaaɔ. 5Ma ba Yinni Gusunɔ ka Mɔwisi wɔkisim wɔri ba mɔ̀, mban sɔ̃na i sun yarama Egibitin di. Su ka gbi gbaburɔ? Domi dĩanu ka nim sari mini. Manna ye wee, ya sun tusa. Dĩa kamwa. 6Yera Yinni Gusunɔ u bu wɛɛ dɛ̃ɛgii sure ma ben dabira gu. 7Yera be ba tie ba na ba Mɔwisi sɔ̃ɔwa ba nɛɛ, wee sa tora sa wunɛ ka Gusunɔ wɔkisi. Tɛ̃, a Gusunɔ kanɔ u sun wɛɛ yi gira yi tonda. Ma Mɔwisi u kanaru kua tɔn ben sɔ̃. 8Yera Yinni Gusunɔ u nùn sɔ̃ɔwa u nɛɛ, a waan weenasia koowo kpa a ye bwɛ̃ dɛkan wɔllɔ. Wi waa ya dɔma ma u waan weenasia ye mɛɛra, u ǹ maa gbimɔ. 9Ma Mɔwisi u waa sii gandugia ye kua u ye bwɛ̃ dɛkan wɔllɔ. Wi waa ya dɔma kpuro ma u waa sii gandugia ye mɛɛra, u ku ra maa gbi. 10Yeniban biru, Isireliba ba swaa wɔri ma ba da ba ben sansani gira Obɔtuɔ. 11Saa Obɔtun di, ba maa seewa ba da ba ben sansani gira Iye Abarimun gbaburɔ, Mɔabun deedeeru, sɔ̃ɔ yari yeru gia. 12Saa min di, ba maa seewa ba da ba ben sansani gira Serɛdin wɔwaɔ. 13Saa Serɛdin di, ba maa da ba ben sansani gira Aanɔɔn daarun guru giɔ, tèn nim mu kokumɔ Amɔreban tem di mu dɔɔ gbaburu gia. Domi Aanɔɔ ya sãawa Mɔabu ka Amɔreban tem nɔɔ bura yeru. 14Yen sɔ̃na Yinni Gusunɔn tabun tireru sɔɔ ba Fahɛbun gari mɔ̀ ye ya wãa Sufan temɔ ka yen daa tori ka Aanɔɔ 15ka yen daa tori yi yi wãa Arin bera ma yi da yi girari Mɔabun tem nɔɔ bura yerɔ. 16Saa min di, ba da Beriɔ. Beri miya Yinni Gusunɔ u Mɔwisi sɔ̃ɔwa u nɛɛ, a tɔn be mɛnnɔ kpa n bu nim wɛ̃. 17Yera Isireliba ba womu geni kua ba nɛɛ, nim, a yarima dɔkɔn di kpa su taki ko. 18Sinamba ba dɔkɔ ye gba. Damgiba ba ye gba ka ben sina dɛki. Yen biruwa Isireliba ba seewa gbabu ten min di ba da Matanaɔ. 19Saa Matanan di, ba da Nahaliɛliɔ. Saa Nahaliɛlin di, ba da Bamɔtuɔ. 20Saa Bamɔtun di, ba maa da wɔwa gaan mi, Mɔabun temɔ, guu te ba mɔ̀ Pisigan wɔllɔ gbaburun deedeeru. 21Isireliba ba Sihoni Amɔreban sina boko sɔmɔbu gɔria ba nɛɛ, 22a de su wunɛn tem bukiana. Sa ǹ kpeeyɔ ka bɛɛn gbea gia, sa ǹ bɛɛn resɛm gbaanu duɔ, sa ǹ maa bɛɛn dɔkɔban nim nɔrumɔ. Swaa baka sa ko mwa, sa ǹ gam gɛramɔ sere su ka bɛɛn tem yari. 23Adama Sihoni u yina Isireliba bu kpe saa win tem di. Yera u win tabu kowobu mɛnna ba da ba Isireliba wɔri Yahasiɔ gbaburɔ. 24Ma Isireliba ba bu go go ba ben tem mwa saa daa te ba mɔ̀ Aanɔɔn di n ka da daa te ba mɔ̀ Yabɔkuɔ, sere n ka girari Amɔniban tem nɔɔ bura yerɔ. N deema Amɔni be, ba ben tem nɔɔ bura yerɔ tem kɔ̃sobu yii. 25Ma Isireliba ba Amɔreban wusu kpuro mwɛɛra ba sina mi ka Hɛsiboniɔ ka gen baru kpaanɔ. 26Hɛsiboni ye, ya sãawa Sihonin tiin wuu. Sihoni wi, u raa ka Mɔabuba tabu kua ma u bu tabu di sere u Mɔabuban tem mwa u ka na sere daa te ba mɔ̀ Aanɔɔwɔ. 27Yen sɔ̃na wom kowobu ba ra mɔndu ko bu nɛɛ, i na i Hɛsiboni bani. I na i Sihonin wuu bani i gu gbãraru toosi. 28Domi dɔ̃ɔ u yara Hɛsibonin di. Dɔ̃ɔ yara ya yara Sihonin wuun di. Ma u wuu ge ba mɔ̀ Ari Mɔabu di ka bũu ni nu wãa Aanɔɔn gungunu wɔllɔ. 29Mɔabu, a kam kuawa! Bɛɛ be i maa bũu wi ba mɔ̀ Kemɔsi sãamɔ, i kɔ̃ɔrawa! Domi u dera Amɔreban sina boko Sihoni u tɔn durɔbu ka tɔn kurɔbu yoru mwɛɛra. 30Adama sa Amɔreba sɛ̃ɛnu twee. Ma Hɛsiboni ya wɔruka. Ma tem mɛ kpuro mu kam kua sere Diboniɔ n ka girari Nɔfaɔ, ka Mɛdebaɔ. Sa ye kpuro kam koosiawa mam mam. 31Nge mɛya Isireliba ba ka sina Amɔreban tem sɔɔ. 32Ma Mɔwisi u gɔra bu da bu Yasɛɛn saria mɛɛri. Yen biru ba ye mwa ka yen baru kpaanu ma ba Amɔre be ba wãa mi gira. 33Yen biru ba swaa kɔsa ba da Basani gia. Yera Ogu Basanin sunɔ u seewa ka win tabu kowobu u bu tabu wɔrim da Edɛɛɔ. 34Yera Yinni Gusunɔ u Mɔwisi sɔ̃ɔwa u nɛɛ, a ku win bɛrum ko, domi kon nun nùn nɔmu sɔndia, wi ka win tɔmbu ka ben tem kpuro, kpa a bu kua nge mɛ a Sihoni, Amɔreban sunɔ kua wi u wãa Hɛsiboniɔ. 35Ma Isireliba ba bu go, wi ka win bibu ka sere win tɔmbu. Baa tɔn turo, ba ǹ deri. Ma ba win tem mwa.

will be added

X\