Gbaburu 20

1Wɔ̃ɔn suru gbiikoo sɔɔra Isireliba kpuro ba tunuma gbaburɔ te ba sokumɔ Sini, ma ba sina Kadɛsiɔ. Miya Mariamu u gu, ma ba nùn sika. 2Saa ye sɔɔra Isireliba ba nim bia ma ba Mɔwisi ka Aroni seesi. 3Ma tɔn be, ba ka Mɔwisi wɔki ba nɛɛ, mban sɔ̃na a ǹ dere Yinni Gusunɔ u yande sun go sanam mɛ u bɛsɛgibu goomɔ. 4Mban sɔ̃na a ka bɛsɛ Gusunɔn tɔmbu na gbaburu sɔɔ mini su ka gbi bɛsɛ ka bɛsɛn yaa sabenu. 5Mban sɔ̃na a sun yarama Egibitin di ma a ka sun na yam kɔ̃sum mini, mi sa ǹ kpɛ̃ su dĩanu ganu duure. Dãa ye ba mɔ̀ figie sari mini, resɛm maa sari, gerenadi maa sari. Mɛya nim kun mam wãa mɛ sa ko nɔ. 6Ma Mɔwisi ka Aroni ba tɔn be deri ba da Yinni Gusunɔn kurun kɔnnɔwɔ. Ma ba yiira ba wuswaa tem girari. Ma Yinni Gusunɔn yiiko ya sɔ̃ɔsira. 7Yinni Gusunɔ u Mɔwisi sɔ̃ɔwa u nɛɛ, 8a wunɛn dɛka suo kpa wunɛ ka wunɛn mɔɔ Aroni i Isireliba mɛnna kpa i ka kpee te gari ko be kpuron wuswaaɔ. Ta koo nim yara i nɔ bɛɛ ka bɛɛn yaa sabenu. 9Ma Mɔwisi u dɛka ye sua ye ya wãa Yinni Gusunɔn sãa yerɔ nge mɛ Yinni Gusunɔn tii u nùn sɔ̃ɔwa. 10Ma wi ka Aroni ba Isireliba kpuro soka ba da kpee ten mi. Yera Mɔwisi u nɛɛ, i swaa dakio i nɔ bɛɛ mɛm nɔɔ sariba. Kpee tenin min diya sa ko de nim mu yari? 11Yera Mɔwisi u kpee te so ka win dɛka ye, nɔn yiru ma nim mu yara n kpã kpee ten min di. Ma tɔn be kpuro ka ben yaa sabenu ba nim mɛ nɔra. 12Yera Yinni Gusunɔ u Mɔwisi sɔ̃ɔwa u nɛɛ, yèn sɔ̃ i man naanɛ bira i ǹ man bɛɛrɛ wɛ̃ Isireliban wuswaaɔ, yen sɔ̃na na ǹ derimɔ i ka bu du tem mɛ sɔɔ, mɛ na bu nɔɔ mwɛɛru kua. 13Gari yinin sɔ̃na ba ra nim mɛ soku Mɛriban nim. Yen tubusiana sannɔn nim. Domi miya Isireliba ba Yinni Gusunɔ wɔkisi ma u bu win dɛɛraru sɔ̃ɔsi. 14Saa Kadɛsi min diya Mɔwisi u Edɔmun sunɔ gɔria bu nùn sɔ̃ nge mɛ be Isireliba ba wahala kua. 15U nɛɛ, yellu, bɛsɛn baababa ba da Egibitiɔ. Miya bɛsɛn bwesera sina n ka tɛ. Ma Egibitigibu ba sun nɔni sɔ̃ɔwa bɛsɛ ka bɛsɛn baaba be. 16Saa ye sɔɔra sa Yinni Gusunɔ nɔɔgiru sue sa nùn somiru kana. Ma u bɛsɛn nɔɔ nua u win gɔrado gɔrima u sun yara Egibitin di. Wee tɛ̃ sa wãa Kadɛsi mini wunɛn tem nɔɔ bura yerɔ. 17Yen sɔ̃, sa nun kanamɔ a de su wunɛn tem bukiana. Sa ǹ kpeeyɔ ka bɛɛn gbea gia, sa ǹ bɛɛn resɛm gbaanu duɔ, sa ǹ maa bɛɛn dɔkɔban nim nɔrumɔ. Swaa baka sa ko mwa sa ǹ gɛramɔ gam sere su ka bɛɛn tem sara. 18Adama Edɔmun sina boko wi, u nɛɛ, i ǹ nɛn tem bukianamɔ. Ì n maa yina i na, kon ka bɛɛ tabu ko. 19Ma Isireliba ba nùn wisa ba nɛɛ, sa ko kpewa ka swaa baka. Bɛsɛ ka bɛsɛn yaa sabenu sà n wunɛn dɔkɔban nim nɔra sa ko yen gobi kɔsia. A gesi de su wunɛn tem bukiana su doona. 20Ma Edɔmun sina boko wi, u nɛɛ, na ǹ wurewa i nɛn tem bukiana. Yera Edɔmuban tabu kowobu ba seewa ba da ba ka Isireliba yinna. 21Ma ba yina Isireliba bu ben tem mɛ bukiana bu doona. Saa ye sɔɔra Isireliba ba gɔsira, ba kpa gam gian di. 22- 23Isireliba kpuro, ba seewa Kadɛsi min di ba da Horin guurɔ, Edɔmun tem nɔɔ bura yerɔ. Miya Yinni Gusunɔ u ka Mɔwisi ka Aroni gari kua u nɛɛ, 24wee Aroni u koo gbi. U ǹ duɔ tem mɛ sɔɔ mɛ kon Isireliba wɛ̃ yèn sɔ̃ i ǹ nɛn wooda mɛm nɔɔwɛ ye na bɛɛ wɛ̃ Mɛribaɔ. 25Wunɛ Mɔwisi, a Aroni ka win bii Eleasaa suo a ka bu da Horin guu ten wɔllɔ. 26Kpa a Aronin sãa yãnu pota a nu Eleasaa sebusia. Domi miya Aroni u koo gbi. 27Ma Mɔwisi u kua ye Yinni Gusunɔ u nùn sɔ̃ɔwa. Wi ka Aroni ka Eleasaa ba yɔɔwa guu ten wɔllɔ Isireliba kpuron nɔni biru. 28Ye ba tura mi, u Aronin sãa yãa ni pota u nu Eleasaa sebusia. Yen biru, Aroni u kpuna u gu guu ten mi. Ma Mɔwisi ka Eleasaa ba sarama. 29Ye Isireliba ba wa ma Aroni u guwa, yera be kpuro ba win gɔɔ swĩ sɔ̃ɔ tɛna.

will be added

X\