Gbaburu 19

1Yinni Gusunɔ u Mɔwisi ka Aroni sɔ̃ɔwa u nɛɛ, 2i Isireliba sɔ̃ɔwɔ i nɛɛ, wee ye nɛ, Yinni Gusunɔ na gerua. Na nɛɛ, bu ka naa nia swãa na ye ya kun bau mɔ, kpa ya kun alebu gaa mɔ, kpa ba kun ka ye sɔmburu koore. 3Kpa bu ye yãku kowo Eleasaa nɔmu bɛria. U ko de bu ka ye dawa sansanin biruɔ kpa bu ye saka win wuswaaɔ. 4Eleasaa wi, u koo naa yen yɛm dɛkawa ka win niki bia kpa u mu yɛ̃ka nɔn nɔɔba yiru nɛn kurun kɔnnɔ gia. 5Kpa u de bu naa gira ye dɔ̃ɔ mɛni win nɔni biru ka yen gɔna ka yen yɛm ka yen bisu kpuro. 6Saa ye sɔɔra u koo sɛdurun dãa ka dãa kiku ge ba mɔ̀ isɔpu doke dɔ̃ɔ wi sɔɔ, ka wɛ̃ɛ wunɔmgii kpa ye kpuro yu dɔ̃ɔ mwaara ka naa ye sannu. 7Yen biru Eleasaa wi, u koo win yãnu teawa kpa win tii u wobure. Yen biru kpa u gɔsira u wura sansaniɔ. Adama ka mɛ, u ko n disi mɔwa sere ka yokaɔ. 8Wi u naa ye dɔ̃ɔ mɛni, u koo maa win yãnu teawa kpa u wobure. Win tii u ko n maa disi mɔwa sere ka yokaɔ. 9Wi u dɛɛre wiya u koo da u yen torom gura kpa u mu yi sansanin biruɔ mi disi kun wãa. Miya ba koo ka mu Isireliba dɛɛrasiabun nim kua. Nim mɛ, mu ko n sãawa nge yãkuru torarun sɔ̃. 10Wi u torom mɛ gura, u koo win yãnu teawa. Ka mɛ, u ko n disi mɔwa sere ka yokaɔ. Yeni ya ko n sãawa wooda sere ka baadommaɔ Isireliban sɔ̃, ka sere maa sɔɔ be ba wãa ben suunu sɔɔn sɔ̃. 11Wi u tɔn goru baba u ko n disi mɔwa sere sɔ̃ɔ nɔɔba yiru. 12Dɛɛrasiabun nim mɛya ba koo nùn yɛ̃ka sɔ̃ɔ itase ka maa sɔ̃ɔ nɔɔba yiruse, kpa u sere dɛɛra. Adama ù kun tii dɛɛrasie sɔ̃ɔ itase ka maa sɔ̃ɔ nɔɔba yiruse te, u ko n disi mɔwa. 13Wi u tɔn goru baba, ma u ǹ tii dɛɛrasie, u nɛn kuru disi dokewa mi. Ba koo nùn yarawa Isireliban suunu sɔɔn di. Domi ba ǹ nùn dɛɛrasiabun nim mɛ yɛ̃ke. Yɛ̃ro u gina disi mɔwa mi. 14Wooda gaa wee maa. Goo ù n gu win kurɔ, be ba wãa kuu te sɔɔ, u ka gu ka be ba dua mi, be kpuro ba disi duurawa mi, sere sɔ̃ɔ nɔɔba yiru. 15Weke te ta maa wãa kuru mi, ma ta ǹ wukiri, ten tii ta disi duurawa mi. 16Wi u goru baba yakasɔ wi ba go ka takobi, ǹ kun mɛ wi u gɔɔ diro gu, ka maa wi u tɔnun kukunu ǹ kun mɛ sikiru baba, be kpuro ba disi duurawa mi sere sɔ̃ɔ nɔɔba yiru. 17Bu ka wi u disi duura dɛɛrasia, naa swãa yen torom mɛya ba koo doke gbɛ̃ɛru sɔɔ bu nim gem doke. 18Wi u dɛɛre wiya u koo dãa kiku ge ba mɔ̀ isɔpu sua kpa u ge wasi nim mɛ sɔɔ u kuu te yɛ̃ka ka sere dendi yãa ni nu wãa mi ka tɔn be ba wãa mi. Nim mɛya ba koo maa ka tɔnu baawure yɛ̃ka wi u tɔn goru ǹ kun mɛ tɔn kukunu ǹ kun mɛ, sikiru baba. 19Ba koo nùn nim mɛ yɛ̃kawa sɔ̃ɔ itase ka sɔ̃ɔ nɔɔba yiruse. Yen biru wi ba mu yɛ̃ka mi, u koo win yãnu teawa kpa u wobure. Saa yoka yen diya u dɛɛra. 20Adama goo ù n disi mɔ, ma ba ǹ nùn dɛɛrasiabun nim mɛ yɛ̃ke u ka dɛɛra, ba koo nùn yarawa Isireliban suunu sɔɔn di, yèn sɔ̃ u nɛn kuru disi doke. 21Yeni ya ko n sãawa wooda sere ka baadommaɔ Isireliban sɔ̃. Wi u tɔnu dɛɛrasiabun nim mɛ yɛ̃ka, u koo maa win yãnu teawa. Wi u maa nim mɛ baba kpuro u ko n disi mɔwa sere ka yokaɔ. 22Tɔnu wi u disi mɔ, gãa ni u baba kpuro nu disi duurawa mi. Wi u maa nu baba, yɛ̃ron tii u disi duurawa mi, sere ka yokaɔ.

will be added

X\