Gbaburu 17

1Yinni Gusunɔ u Mɔwisi sɔ̃ɔwa u nɛɛ, 2a Eleasaa, Aroni yãku kowon bii sɔ̃ɔwɔ a nɛɛ, u tɔmbu goobu ka weeraaku ten dɔ̃ɔ guratii yi wunɔ saa dɔ̃ɔn di. Domi yi sãawa Yinni Gusunɔgii. Adama u yin dɔ̃ɔ yɛ̃ɛ guro u ka da u yari n toma. 3Kpa u de bu dɔ̃ɔ guratii yi so yi ko fɛrɛ fɛrɛ kpa bu ka yi yãku yeru wukiri. Domi Yinni Gusunɔwa ba ka yi turare dɔ̃ɔ dokea, kpa ye kpuro ya n sãa yaayatia Isireliban mi. 4Ma yãku kowo Eleasaa u dɔ̃ɔ guratii yi ba kua ka sii gandu mi gura, ba ka yãku yerun wukiritii kua. 5Ma ya kua yaayatia Isireliban sɔ̃ ye ya bu sɔ̃ɔmɔ ma goo kun kpɛ̃ u Yinni Gusunɔ turare dɔ̃ɔ dokea, ma n kun mɔ be ba sãa Aronin bibun bweseru. Wi u maa yina u kua mɛ, ba koo yɛ̃ro kuawa nge mɛ ba Kore ka wigibu kua. Domi mɛya Yinni Gusunɔ u Aroni sɔ̃ɔwa, saa win sɔm kowo Mɔwisin nɔɔn di. 6Yera sisiru bururu Isireliba kpuro ba ka Mɔwisi ka Aroni wɔki ba mɔ̀, wee i dera Yinni Gusunɔn tɔmba gu. 7Sanam mɛ tɔn be kpuro ba mɛnnamɔ bu ka Mɔwisi ka Aroni seesi, yera ba mɛɛra Yinni Gusunɔn kurun bera gia, ma ba wa guru wii wuroru ta tu wukiri. Ma Yinni Gusunɔn yiiko ya sɔ̃ɔsira. 8Mɔwisi ka Aroni ba da kuu ten mi. 9Ma Yinni Gusunɔ u Mɔwisi sɔ̃ɔwa u nɛɛ, 10i yario tɔn ben suunu sɔɔn di. Kon bu gowa nɔni kpaki teeru. Ma Mɔwisi ka Aroni ba yiira ba wuswaa tem girari. 11Mɔwisi u Aroni sɔ̃ɔwa u nɛɛ, a dɔ̃ɔ guratia ye suo, kpa a dɔ̃ɔ sua yãku yerun di a doke ye sɔɔ, kpa a turare doke mi, kpa a da tɔn ben mi gia fuuku a bu dɛɛrasiabun wororu koosi. Domi Yinni Gusunɔn mɔru ya seewa. Kɛ̃si kɛ̃si bararu ta torua. 12Aroni u dɔ̃ɔ guratia ye sua nge mɛ Mɔwisi u gerua. U da tɔn ben mi. Ma u deema kɛ̃si kɛ̃si bararu ta torua tɔn ben suunu sɔɔ. Ma u turare dɔ̃ɔ doke, u bu dɛɛrasiabun wororu koosi. 13Ma u yɔ̃ra be ba gu ka be ba wasin baa sɔɔ. Ma bara te, ta yɔ̃ra. 14Tɔmbu nɔrɔbun suba wɔkura nnɛ ka nata ka wunɔbuwa ba gu yen dɔma te (14.700), be ba gu Koren torarun sɔ̃ baasi. 15Yen biru Aroni u gɔsira u da Mɔwisin mi, Yinni Gusunɔn kuu ten kɔnnɔwɔ. Ma bara te, ta yɔ̃ra. 16Yinni Gusunɔ u Mɔwisi sɔ̃ɔwa u nɛɛ, 17a Isireliba sɔ̃ɔwɔ a nɛɛ, ben bwese kɛra baayeren wirugii u ka dɛka tia na, 18kpa a ben baawuren yĩsiru yore win dɛka sɔɔ, kpa a Aronin yĩsiru yore Lefin bwese kɛran dɛka sɔɔ. Domi bwese kɛra baayeren wirugii u ko n win dɛka mɔwa. 19Yen biru kpa a dɛki yi yi nɛn kuu bekurugirɔ, mi na ra ka bɛɛ yinnɛ. 20Wi na gɔsa, win dɛka ya koo kpara. Saa yera kon Isireliba marisia wɔki ni ba bɛɛ koosimɔ min sɔ̃. 21Mɔwisi u Isireliba kpuro ye sɔ̃ɔwa. Ma bwese kɛra baayeren wirugii u dɛka tia wɛ̃. Ma yi kpuro yi kua dɛki wɔkura yiru. Ma Aronin dɛka ya wãa begiin suunu sɔɔ. 22Mɔwisi u ka dɛki yi da Yinni Gusunɔn wuswaaɔ kuu bekurugiru mi. 23Bururu yam sãreru Mɔwisi u dua kuru mi, ma u deema Aronin dɛka ye ya sãa Lefiban dɛka, ya kpara ya wɛ̃su kua sere ya binu mara nu ye. 24Ma Mɔwisi u dɛki yi gura Yinni Gusunɔn wuswaan di, u ka da Isireliba kpuron wuswaaɔ bu ka wa kpa ben baawure u win dɛka sua. 25Yinni Gusunɔ u Mɔwisi sɔ̃ɔwa u nɛɛ, a ka Aronin dɛka wuro a yi woodan kpakoro ten wuswaaɔ, ya n ka sãa seeda Isireliban sɔ̃ be ba man seesi. Nge mɛya ba ǹ maa ka man wɔkimɔ n sere bu go. 26Ma Mɔwisi u kua kpuro nge mɛ Yinni Gusunɔ u nùn sɔ̃ɔwa. 27Yera Isireliba ba na ba Mɔwisi sɔ̃ɔwa ba nɛɛ, wee, sa gbimɔ sa dɔɔ. 28Wi u gesi Yinni Gusunɔn kuu te susi, u ra gbiwa. Mɛya sa ko n gbimɔ sa n dɔɔ?

will be added

X\