Gbaburu 15

1Yinni Gusunɔ u Mɔwisi sɔ̃ɔwa u nɛɛ, 2a Isireliba sɔ̃ɔwɔ a nɛɛ, ì n dua tem mɛ̀n nɔɔ mwɛɛru na bɛɛ kua sɔɔ, i ka sina, 3ma i nɛ, Yinni Gusunɔ yãku dɔ̃ɔ mwaararugiru kuammɛ, ǹ kun mɛ nɔɔ mwɛɛrun yãkuru, ǹ kun mɛ kɛ̃ru garu te i kua ka kĩru, ǹ kun mɛ tɔ̃ɔ bakarun yãkuru, i ko i tu kowa ka yãaru, ǹ kun mɛ ka kɛtɛ, ǹ kun mɛ ka boo, kpa yãku ten nuburu tu man dore. 4Wi u koo ka yaa saberu garu yãkuru na, u koo som sɔndimawa kilo ita mɛ ba burina ka gum ditiri tia ka bɔnu. 5Ǹ n maa yãarun na ba ka yãku dɔ̃ɔ mwaararugiru mɔ̀, ǹ kun mɛ siarabun yãkuru, ba koo tam ditiri tia ka bɔnu sɔndiwa te sɔɔ. 6Ǹ n maa yãa kinɛrun na, ba ka yãkuru mɔ̀, ba koo som sɔndimawa kilo nɔɔba tia, mɛ ba burina ka gum ditiri yiru, 7ka sere tam ditiri yiru. Bà n ye kpuro dɔ̃ɔ doke, yen nuburu ta koo man dore. 8Ǹ n maa kɛtɛn na, ba ka yãku dɔ̃ɔ mwaararugiru mɔ̀, ǹ kun mɛ siarabun yãkuru, ǹ kun mɛ nɔɔ mwɛɛrun yãkuru, ǹ kun mɛ yãkuru garu, 9ba koo som kilo nɔɔba nnɛ mɛ ba burina ka gum ditiri ita sɔndiwa yaa ye sɔɔ, 10ka sere tam ditiri ita. Saa ye sɔɔ, bà n ye kpuro dɔ̃ɔ doke, yen nuburu ta koo man dore. 11Nge mɛya ba ko n da ko bà n ka kɛtɛ yãkuru mɔ̀, ǹ kun mɛ yãa kinɛru, ǹ kun mɛ yãa kpɛmbu, ǹ kun mɛ boo kpɛmbu. 12Yãkuru baaterewa i ko i n da kue mɛ, nge mɛ ten wooda ya gerua. 13Isireli baawurewa u ko n da ko mɛ, ù n yãkuru mɔ̀ tèn nubura koo man dore. 14Sɔbu be ba wãa saa fiiko, ǹ kun mɛ be ba tɛ mi, bà n yãkuru mɔ̀ tèn nubura koo nɛ, Yinni Gusunɔ dore, ba koo kowa nge mɛ. 15Wooda tia yera baawure u koo swĩi. Ya ko n maa wãawa sere ka bɛɛn bibun bweserɔ. Nɛ, Yinni Gusunɔ, na ǹ bɛɛ Isireliba ka sɔbu wunanamɔ. 16Wooda tia yera i ko i swĩi bɛɛ kpuro. 17Yinni Gusunɔ u Mɔwisi sɔ̃ɔwa u nɛɛ, 18a Isireliba wooda yeni sɔ̃ɔwɔ a nɛɛ, sanam mɛ i ko i du tem mɛ sɔɔ, mi na ka bɛɛ dɔɔ, 19ma i dĩanu kua i ka di i ko i yen sukum suawa i man wɛ̃. 20I ko i som buri kpa i man kiraru kua i ka na kpa i tu sɔ̃ɔsi beri berika, nge mɛ i ra ka bɛɛn dĩa gbiikinu nɛ i sɔ̃ɔsi. 21Nge mɛya i ko i ka man kira gbiikiru wɛ̃ te i wɔ̃ɔwa. Yeni ya ko n sãawa wooda sere ka baadommaɔ. 22- 23Yinni Gusunɔ u maa Mɔwisi sɔ̃ɔwa u nɛɛ, tɛ̃wa? Ǹ kun mɛ siawa? Ì n nɛn wooda gaa sara i ǹ ka baaru, ye na bɛɛ ka bɛɛn bibun bweseru wɛ̃ saa wunɛn min di, 24ma goo kun tora te wa, bɛɛ kpurowa i ko i man yãku dɔ̃ɔ mwaararugiru kua ka naa kinɛ kpɛmbu tèn nubura koo man dore. Kpa i som ka tam mɛ ba ra sɔndi mi, doke ka sere maa boo kinɛru, tora ten suurun sɔ̃. 25Yãku kowowa u koo Isireliba kpuro dɛɛrasiabun wororu koosi. Kpa be kpuro bu ben torarun suuru wa. Domi ba torawa ba ǹ ka baaru, ma ba ka ben yãku dɔ̃ɔ mwaararugiru na ka torarun yãkuru nɛ, Yinni Gusunɔn wuswaaɔ. 26Kon bu ben tora te suuru kua ka maa sɔɔ be ba wãa ben suunu sɔɔ. Domi ba torawa ba ǹ ka baaru. 27Ǹ n maa tɔn turon na u tora u ǹ ka baaru, u koo boo niu wɔ̃ɔ tiaguu gowa win tora ten sɔ̃. 28Yãku kowowa u koo nùn dɛɛrasiabun wororu kua. Ù n tu kua u kpa yɛ̃ro u koo suuru wa. 29Isireliba ka sɔbu kpuro wooda tia yera ba ko n mɔ ben goo ù n tora u ǹ ka baaru. 30Adama ben goo ù n yɛ̃ ma torara u ka mɔ̀, u man torariwa. Ba koo nùn yarawa win tɔmbun min di. 31Domi u nɛn gari gɛma, ma u nɛn woodaba sara. Ba koo nùn yarawa win tɔmbun min di kpa u win torarun are sɔbe. 32Sanam mɛ Isireliba ba wãa gbaburɔ ba goo mwa u dãa guramɔ tɔ̃ɔ wɛ̃rarugiru sɔɔ. 33Be ba nùn wa, ba ka nùn da Mɔwisi ka Aronin mi ka Isireliba kpuron mi. 34Ma ba nùn kɛnusi dirɔ gina, domi ba ǹ yɛ̃ ye ba koo nùn kua. 35Yinni Gusunɔ u Mɔwisi sɔ̃ɔwa u nɛɛ, ba koo yɛ̃ro yarawa sansanin di kpa bu nùn kpenu kasuku bu go. 36Ma ba nùn yara sansanin di ba kpenu kasuka ba go, nge mɛ Yinni Gusunɔ u Mɔwisi sɔ̃ɔwa. 37Yinni Gusunɔ u Mɔwisi sɔ̃ɔwa u nɛɛ, 38a Isireliba sɔ̃ɔwɔ a nɛɛ, bu tii sari kuo yi n sãare ben yabenun swaa buaɔ kpa bu yi wɛ̃ɛ gaaduragii sɔ̃re. 39Bà n sari yi wa, yi sãare, ba koo nɛn woodaba yaaya bu ye mɛm nɔɔwa. Saa ye, ba ǹ maa ben tiin gɔ̃ru kĩru mɔ̀ bu sere ko naanɛ sarirugibu, bu da bu bũnu gasiri. 40Nge mɛya ba koo ka nɛn woodaba yaaya, kpa bu ka ye mɛm nɔɔwa kpa ba n sãa nɛnɛm nɛn sɔ̃. 41Nɛna na sãa Gusunɔ wi u bu yara Egibitin di na n ka sãa ben Yinni.

will be added

X\