Gbaburu 12

1Mɔwisi u kurɔ goo sua wi u sãa Etiopigii. Yera Mariamu ka Aroni ba Mɔwisi wĩimɔ. 2Ba nɛɛ, Mɔwisi tɔnan min diya Yinni Gusunɔ u ra ka Isireliba gari ko? Aawo! U ra maa ka bu gari ko saa bɛsɛn min di. Yera Yinni Gusunɔ u gari yi nua. 3N deema Mɔwisi u suuru mɔ too. Goo sari wi u nùn suuru kere handunia ye sɔɔ. 4Ma Yinni Gusunɔ u Mɔwisi ka Aroni ka Mariamu sɔ̃ɔwa u nɛɛ, bɛɛ kpuro i doo nɛn kuu bekurugirɔ. Ma ba da mi. 5Ma Yinni Gusunɔn tii u sarama guru wii wuro te sɔɔ, u na u yɔ̃ra win kuu ten kɔnnɔwɔ. Ma u Aroni ka Mariamu soka. Ma be yiru ye, ba na. 6Ma u bu sɔ̃ɔwa u nɛɛ, i nɛn gari swaa dakio. Nɛn sɔmɔ be ba wãa bɛɛn suunu sɔɔ, kãsiru sɔɔra na ra bu tii sɔ̃ɔsi, kpa n ka bu gari ko dosu sɔɔ. 7Adama n ǹ mɛ na ra ka Mɔwisi nɛn sɔm kowo gari ko. Domi u sãawa naanɛgii nɛn tɔmbu sɔɔ. 8Nɔɔ ka nɔɔwa na ra ka nùn gari ko, n ǹ maa mɔ kãsiru sɔɔ na ra nùn tii sɔ̃ɔsi. U ra man wawa sãa sãa nge mɛ na sãa. Ǹ n mɛn na, mban sɔ̃na i ǹ bɛrum kue i ka nɛn sɔm kowo Mɔwisi wĩi. 9Ma Yinni Gusunɔ u ka bu mɔru kua. Yen biru u doona. 10Yera guru wii wuro te, ta doona. Ma Gusunɔ u dera bara disigira Mariamu wɔri u bau kpikisu yara nge wɛ̃su. Ma Aroni u Mariamu mɛɛra u deema bara disigira ta nùn mwa. 11Yera Aroni u Mɔwisi sɔ̃ɔwa u nɛɛ, a man suuru kuo. A ku de su bɛsɛn torarun are wa te sa kua nge gari bakasu. 12A ku de Mariamu u n sãa nge bii wi ba mara goru ma win wasin bee tia ya kɔ̃sa. 13Yera Mɔwisi u Yinni Gusunɔ nɔɔgiru sue u nɛɛ, a nùn bɛkio. 14Ma Yinni Gusunɔ u nɛɛ, Mariamun tundo ù n nùn yãatam sie wuswaaɔ ba ǹ koo nùn kɛnusi gina sɔ̃ɔ nɔɔba yiru sekurun sɔ̃? Ǹ n mɛn na, bu nùn yaro sansanin di sɔ̃ɔ nɔɔba yiru, yen biru kpa bu ka nùn wurama yɛnuɔ. 15Ma ba Mariamu yara sɔ̃ɔ nɔɔba yiru sansanin biruɔ. Adama Isireliba ba ǹ doonɛ sere ye Mariamu u wurama. 16Yeniban biru Isireliba ba seewa Haserɔtun di ba da ba sina Paranin gbaburɔ.

will be added

X\