1 Sɔ̃ɔ teeru Isireliba ba ka Yinni Gusunɔ wɔki. Ye u nu nua, ya ǹ nùn dore. Ma u ka bu mɔru kua, u dera dɔ̃ɔ u na u ben sansanin bee tia mwa. 2 Yera Isireli be, ba Mɔwisi wuri koosi. Ma u Yinni Gusunɔ kana. Ma dɔ̃ɔ wi, u yɔ̃ra. 3 Ma ba yam mi yĩsiru kã Tabera, yèn sɔ̃ dɔ̃ɔ u yabura ben suunu sɔɔ. 4 Sɔ̃ɔ teeru tɔn tukobu be ba Isireliba swĩima ben gbɛnubu seewa, ka sere maa Isireliban tii ba wɔkinu torua ba mɔ̀, wara u koo sun yaa wɛ̃ su tem. 5 Domi sa yaaye swɛ̃ɛ yi sa ra raa wa su tem faara ka gbɛsɛnu ka wĩaru ka ayo ka alumasanu ka alumasanu ganu. 6 Wee tɛ̃ sa gberamɔ sa ǹ maa gãanu waamɔ sa dimɔ ma n kun mɔ manna. 7 Manna ye, dĩa bim kpika ya ka weenɛ. 8 Wɔ̃kuru Gusunɔ u ra dewa yu sarama ka kakoru kpa sisiru bururu tɔmbu bu yarima bu gura. Ba ra ye namwa, ǹ kun mɛ bu suni soru sɔɔ. Kpa bu ye swɛ̃ wekerɔ. Ba ra maa ka ye kiraru ko. Manna ye, ya ra n numɔwa nge kira te ba sɔnwa. 10 Mɔwisi u nua ma Isireliba ba wɔki yɛnu ka yɛnu, bwese kɛra ka bwese kɛra. Ma Yinni Gusunɔn mɔru seewa gem gem. 11 Yera Mɔwisin nukura sankira, u Yinni Gusunɔ sɔ̃ɔwa u nɛɛ, mban sɔ̃na a ǹ ka man nɔnu geu mɛɛra. Mban sɔ̃na a ka man nuki sankumɔ mɛ, ye a ka man tɔn be nɔmu bɛria. 12 Nɛna na tɔn ben gura sua? Nɛna na bu mara? Mban sɔ̃na a man sɔ̃ɔmɔ n bu bɔkio nge mɛ bii mɛro u ra win bii bɔki, kpa n ka bu da sere mi a ben baababa nɔɔ mwɛɛru kua. 13 Mana kon yaa wa n tɔn beni kpuro wɛ̃. Domi wee ba man wuri koosimɔ, ba mɔ̀, n bu yaa wɛ̃ɛyɔ bu tem. 14 Nɛ turo na ǹ kpɛ̃ n bu sɔbe. Domi sɔmu ni, nu bunu. 15 Na nun kanamɔ, à n ka man nɔnu geu mɛɛra, ye kaa ka man deri mɛsum, a man goowo. A ku de na n wãa nɔni swãaru sɔɔ. 16 Yinni Gusunɔ u Mɔwisi sɔ̃ɔwa u nɛɛ, a man Isireliban guro gurobu wata ka wɔku te ta sãa wirugibu mɛnnama. A de bu na nɛn kuu ten mi ka wunɛ sannu. 17 Miya nɛn tii kon na n gari ko. Kon Hunde wi u wãa wunɛ sɔɔn dam sukum wuna n bu wɛ̃ kpa bu wa bu nun somi a ka tɔn be kpara. Kpa ba kun sãa wunɛ turon sɔmunu. 18 Kaa Isireliba sɔ̃ a nɛɛ, bu tii dɛɛrasio sian sɔ̃. Ba koo yaa tem domi na ben wɔkinu nua ni ba man koosimɔ. Ba mɔ̀, wara u koo bu yaa wɛ̃ bu tem, domi sanam mɛ ba wãa Egibitiɔ ba ye kpuro mɔ. Adama tɛ̃ nɛ, Yinni Gusunɔ kon bu yaa wɛ̃. 19 N ǹ sɔ̃ɔ teeru tɔna ba koo ye tem, ǹ kun mɛ, sɔ̃ɔ yiru, ǹ kun mɛ, sɔ̃ɔ nɔɔbu, ǹ kun mɛ sɔ̃ɔ wɔkuru, ǹ kun mɛ, sɔ̃ɔ yɛndu. 20 Suru gira ba koo ye tem sere yu yari ben wɛ̃run di, yu bu tusi. Domi ba nɛ, Yinni Gusunɔ yina, nɛ wi na wãa ben suunu sɔɔ. Ba man wɔkisi ba mɔ̀, mban sɔ̃na ba yara Egibitin di. 21 Mɔwisi u Yinni Gusunɔ wisa u nɛɛ, tɔn durɔbu nɔrɔbun suba natawa (600.000) Isireliba ba sãa, bèn suunu sɔɔ na wãa. Yera a nɛɛ, kaa bu yaa wɛ̃ bu tem sere suru gira mam mam? 22 Domi wee, baa sà n bɛsɛn yãanu ka kɛtɛba kpuro go, ǹ kun mɛ su nim wɔ̃kun swɛ̃ɛ kpuro mwɛɛri, ye kpuro ya ǹ bu turi. 23 Yinni Gusunɔ u Mɔwisi wisa u nɛɛ, a tamaa nɛ nɔm kpiribugiiwa? Tɛ̃ kaa wa ye na nun sɔ̃ɔwa yà kun koo koora. 24 Ma Mɔwisi u yara u da u Yinni Gusunɔn gari yi tɔn be sɔ̃ɔwa. U Isireliban guro gurobu wata ka wɔkuru mɛnna. Ma u dera ba sina ba ka kuu te sikerena. 25 Yinni Gusunɔ u sarama guru wii wuroru sɔɔ. Ma u ka Mɔwisi gari kua. Ma u Hunde ye u Mɔwisi wɛ̃n dam sukum sua u guro guro be wɛ̃. Ma guro guro be, ba sãaru wɔri nge Gusunɔn sɔmɔbu, adama n ǹ ka tɛ. 26 Ben yiru gabu Ɛlidadi ka Mɛdadi ba sina ben sansaniɔ, ba ǹ de Yinni Gusunɔn kuu ten mi. Adama ka mɛ, Hunde u bu yɔɔwa. Ma ba maa sãaru mɔ̀ sansani mi. 27 Yera aluwaasi goo u seewa u da u ye Mɔwisi sɔ̃ɔwa u nɛɛ, wee Ɛlidadi ka Mɛdadi ba sãaru mɔ̀ nge Gusunɔn sɔmɔbu bɛsɛn sansaniɔ. 28 Yera Yosue Nunin bii, wi u sãa Mɔwisin sɔm kowo saa win aluwaasi piiburun di, u Mɔwisi sɔ̃ɔwa u nɛɛ, nɛn yinni, a bu yinario bu sãa te ko. 29 Mɔwisi u nùn sɔ̃ɔwa u nɛɛ, a nisinu mɔ̀wa nɛn sɔ̃? Gusunɔ u de win Hunde yu du Isireliba kpuro sɔɔ, kpa bu ko win sɔmɔbu. 30 Yen biru Mɔwisi ka guro guro be, ba doona sansani yen min di. 31 Yera Yinni Gusunɔ u woo seeya saa nim wɔ̃kun di. Ma woo ge, ga ka kusunu na nu tɛria sansani ye sɔɔ kpuro nge sɔ̃ɔ teerun sanum saka. Kusu ni, nu tem wukiriwa gɔm soonu yirun saka. 32 Tɔ̃ɔ te, ba kusunu gurawa sere ka wɔ̃kurɔ. Yen sisiru ba maa gura. Be ba gura fiiko, bera ba kilo nɔrɔm nɔrɔm suba dabinu gura. Ma ba kusu ni tɛria ba ka ben sansani sikerena. 33 Sanam mɛ ba kusu ni nɔɔ kpɛ̃ɛ, yera Yinni Gusunɔn mɔru seewa ma u Isireliba nɔni swãa bakaru kpɛ̃ɛ. 34 Ma ba yam mi yĩsiru kã kɔdɛn sikiru. Domi miya ba bu sika be ba binɛ kua too yaa ye sɔɔ. 35 Saa min diya Isireliba ba seewa ba da Haserɔtuɔ. Ma ba yɔ̃ra mi.
