Nɛɛmi 9

1Suru nɔɔba yiruse, yen sɔ̃ɔ yɛnda nnɛse sɔɔra Isireliba kpuro ba mɛnna bu ka nɔɔ bɔke. Ma ba saaki deewa ba tii tua wisi wirɔ nuku sankirarun sɔ̃. 2Be ba sãa Yuuba gesi, ba tii wĩa tɔn tukobun suunu sɔɔn di ba na ba ben durum ka ben sikadobagia tuuba kua. 3Yen biru, ba bu Yinni Gusunɔn gari garia kɔba itan saka ba yɔ̃ ba swaa daki. Ma ba yiira wi, ben Yinnin wuswaaɔ ba suuru kana sere kɔba ita maa. 4Yera Yosue ka Bani ka Kadimiɛli ka Sebania ka Buni ka Serebia ka Bani goo ka Kenani ba yɔɔwa tura ten mi. Ma ba nɔɔgiru sua Gusunɔ ben Yinnin mi gia ba somiru kana. 5Yera Lefi beni, Yosue ka Kadimiɛli ka Bani ka Asabinia ka Serebia ka Hodiya ka Sebania ka Petaya ba nɛɛ, i seewo i Gusunɔ bɛsɛn Yinni siara sere ka baadommaɔ. Baawure u nùn siaro win yĩsi bɛɛrɛgirun sɔ̃, baa mɛ i ǹ gari yɛ̃ yi i ko i ka nùn siara. 6Ma Isireliba ba kana teni kua ba nɛɛ, Yinni, wunɛ turowa a sãa Gusunɔ. Wuna a wɔllu kua ta kpã. Wuna a maa kperi kua too. Wuna a tem taka kua ka ye ya wãa mɛ sɔɔ. Wuna a nim wɔ̃ku kua ka ye ya wãa ge sɔɔ. Wuna a hunde koni kpuro wãaru wɛ̃. Ma kperi ka suru ka sɔ̃ɔ, ye kpuro ya nun bɛɛrɛ wɛ̃ɛmɔ. 7Yinni Gusunɔ, wuna a Aburamu gɔsa. Ma a dera u seewa Urin di, Kaladen temɔ. Yen biru, ma a nùn yĩsi kpaaru kã Aburahamu. 8A wa ma u sãa naanɛgii, ma a ka nùn arukawani bɔkua a nɛɛ, kaa nùn tem mɛ wɛ̃ mɛ̀ sɔɔ Kananiba ka Hɛtiba ka Amɔreba ka Feresiba ka Yebusiba ka Girigasiba ba wãa, kpa win bibun bweseru tu sina mi. Mɛya a maa wunɛn arukawani ye yibia. Domi a sãawa naanɛgii. 9Sanam mɛ bɛsɛn baababa ba wãa Egibitiɔ, a ben nɔni swãaru wa. Ba nun somiru kana, ma a ben wuri nua nim wɔ̃ku ge ba mɔ̀ Naa yariɔ. 10A yɛ̃ nge mɛ Egibitigibu ba bɛsɛn baababa dam dɔre ka nuku kɔ̃suru. Ma a sɔm maamaakiginu kua a ka ben sunɔ ka win sina asakpɔbu ka win tɔmbu kpuro seesi. Ma a yĩsiru yara sere ka gisɔn gisɔ. 11A dera nim mu burana bɛsɛn baaba ben wuswaaɔ. Ma ba tɔbura tem gbebum sɔɔ. Adama Egibitigii be ba bu naa gire, a bu sure nim bwerɔ. Ma ba numa nge kpee te ba kare nim sɔɔ. 12Sɔ̃ɔ sɔɔ, guru wii wurora a ra ka wunɛn tɔn be kpare. Wɔ̃kuru maa, kpa ta n ka dɔ̃ɔ yari bakaru weenɛ, ta n bu yam bururasie swaa sɔɔ. 13A sarama saa wɔllun di, ma a ka bu gari kua Sinain guurɔ. A bu wooda gea ka sɔ̃ɔsi geenu wɛ̃. 14A dera wunɛn sɔm kowo Mɔwisi u bu tɔ̃ɔ wɛ̃rarugiru wɛ̃ te ta sãa nɛnɛm wunɛn sɔ̃. Ma a dera u bu wooda ye ya tie sɔ̃ɔsi. 15A bu dĩanu wɛ̃ɛma saa wɔllun di sanam mɛ gɔ̃ɔra bu mɔ̀. Ma a dera nim mu yara kpee baan di sanam mɛ nim nɔru ga bu mɔ̀. Ma a nɛɛ, bu doo bu tem mɛ mwa mɛ̀n nɔɔ mwɛɛru a bu kua ka bɔ̃ri. 16Adama bɛsɛn baaba be, ba tii sua ba nun seesi. Ba ǹ wunɛn woodaba mɛm nɔɔwɛ. 17Ba swaa taaya ba wunɛn sɔm maamaakigii ni duari ni a bu kua. Ma ba nun seesi ba tii kparo kua bu ka wura mi ba raa yoru di. Adama ka mɛ, a ǹ bu deri. Domi a sãawa Yinni wi u ra tɔnu suuru kue. A wɔnwɔndu ka durom mɔ. Wunɛn mɔru ku ra fuuku se. Wunɛn kĩru ta ǹ kpeemɔ sere ka baadommaɔ. 18Ka mɛ kpuro, ba tii bũu wuraguu kua. Ma ba nɔɔgiru sua ba nɛɛ, gera ga sãa ben yinni wi u bu yarama Egibitin di. Nge mɛya ba kua ba ka nun wɔnwa. 19Adama wunɛn kĩi bakarun sɔ̃, a ǹ bu deri gbaburɔ. Guru wii wuro te ta bu swaa gbiiye mi, wɔ̃kuru ka sɔ̃ɔ sɔɔ, ta ǹ bu deri. 20Wunɛn kĩrun saabu, a bu wunɛn Hunde wɛ̃ ba n ka bwisi mɔ. Baadomma a ra bu dĩanu wɛ̃ ni ba ra soku manna bu di, kpa a bu nim wɛ̃ bu nɔ. 21A bu nɔɔri gbaburɔ wɔ̃ɔ weeru, ba ǹ gãanu biare, ben yãnu kun gɛ̃ɛkirare, ben naasu kun maa mɔsire. 22A bu bwese tukunu ka nin sinambu nɔmu sɔndia ka be ba ka bu sikerenɛn tem. Mɛya Hɛsibonin tem mi Sihoni u bandu dii ka Basanin tem mi Ogu u bandu dii. 23A dera ba bibu mara ba dabia nge kperi. Ma a dera ba dua Kananin temɔ mɛ a ben baababa nɔɔ mwɛɛru kua. 24Ma ba Kananiba kamia ba bu taare ba ben tem mɛ mwa. Ma ba bera min sinambu ka min bwesenu kpuro kua nge mɛ ba kĩ. 25Ba wuu gbãrarugisu mwɛɛra ka mi tem gem wãa, ka yɛnu si su dukia mɔ, ka dɔkɔba ka resɛm gbaanu, ka olifiba ka dãa dabi dabinu nìn marum ba ra di. Yinni Gusunɔ, wunɛn kĩrun saabuwa ba ka di ba deba ba bɔria. Ma ba wãa doo nɔɔru sɔɔ. 26Adama ka mɛ, ba ǹ nun mɛm nɔɔwɛ. Ba nun seesiwa, ba wunɛn woodaba biru kisi. Ma ba wunɛn sɔmɔbu go go be ba bu kirɔ kua bu ka gɔ̃ru gɔsia bu ben daa kɔ̃sa deri kpa bu wurama wunɛn mi. Adama ba ben daa kɔ̃sa sosiwa. 27Saa yera a bu yibɛrɛba nɔmu sɔndia, ma ba bu dam dɔre. Adama ben nɔni swãaru sɔɔ, ba nun nɔɔgiru sue. Ma a ben nɔɔ nua saa wɔllun di. A bu tɔmbu seeya bu ka bu wɔra saa yibɛrɛ ben nɔman di wunɛn kĩi bakarun sɔ̃. 28Adama ye ba wãa bɔri yɛndu sɔɔ, ba maa wɔri ben durum sɔɔ. Ma a bu biru kisi, a bu yibɛrɛba nɔmu sɔndia. Yera ba maa kpam nɔɔgiru sua ba nun somiru kana. Ma a ben nɔɔ nua wɔllun di, a bu wɔra nɔn dabinu wunɛn kĩrun saabu. 29Yen biru, a bu kirɔ kua bu wunɛn woodaba mɛm nɔɔwa. Adama ba tii sua ba ǹ ye mɛm nɔɔwɛ, baa mɛ yera ya ra tɔnu wãaru wɛ̃ wi u ye mɛm nɔɔwa. Ba swaa taayawa ba ye yina mam mam. 30A ka bu tɛmana wɔ̃ɔ dabinu. A wunɛn sɔmɔbu wunɛn Hunde wɛ̃ ba n ka bu kirɔ mɔ̀. Adama ba ǹ swaa daki. Ma a bu bwese tukunu nɔmu bɛria. 31Adama wunɛn kĩi bakarun sɔ̃, a ǹ bu go, a ǹ maa bu deri, domi a sãawa Yinni wɔnwɔndugii ka duromgii. 32Gusunɔ bɛsɛn Yinni, a kpã, a maa dam mɔ. Wuna a durom bakam mɔ. Ma a wunɛn arukawani nɛni ye a ka sun bɔkua. A bɛsɛn wahala mɛɛrio ye sa mɔ̀ bɛsɛ ka bɛsɛn sinambu ka ben sina asakpɔbu ka wunɛn sɔmɔbu ka bɛsɛn yãku kowobu saa Asirin sinambun waatin di sere n ka gisɔ girari. 33A sãawa naanɛgii. A maa kuawa dee dee gãa ni nu sun deema sɔɔ. Adama bɛsɛ, sa kuawa naanɛ sarirugibu. 34Bɛsɛn sinambu ka ben sina asakpɔbu ka bɛsɛn yãku kowobu ka bɛsɛn baababa ba ǹ wunɛn woodaba mɛm nɔɔwɛ. Ba wunɛn kirɔba atafiiru kuawa. 35Ba ǹ nun sãwa. Ba ǹ maa ben daa kɔ̃sa deri, baa mɛ a bu tem bakam wɛ̃ mɛ mu gea sãa, ba kua mɛn sinambu. Ma a bu nɔɔri ba wãa doo nɔɔru sɔɔ. 36Yen sɔ̃, bɛsɛ wee sa yoru dimɔ gisɔ tem mɛ a bu wɛ̃ sɔɔ bu ka mɛn dĩa geenu di. 37Dĩa gee ni, nu kua sinam be ba sun yoru diisiamɔginu. Ba sun mɔ bɛsɛ ka bɛsɛn yaa sabenu. Ba ka sun mɔ̀ nge mɛ ba kĩ bɛsɛn durum sɔ̃. Ma sa wãa nuku sankira bakanu sɔɔ.

will be added

X\