1 Sambala ka Tobiya ka Gesɛmu wi u sãa Daarubu ka sere bɛsɛn yibɛrɛ be ba tie ba nua ma sa gbãra te kpuro sɔnwa, ten gambobara ba tie. 2 Yera Sambala ka Gesɛmu ba man gɔria ba nɛɛ, n na su wesianɔ ko Kefirimuɔ Onɔɔn wɔwaɔ. N deema kɔ̃sa tɔn be, ba bwisika bu man kua. 3 Yera na maa bu gɔria na nɛɛ, na sɔmburu mɔ̀ ta kpã, na ǹ kpɛ̃ n tu deri n na. Domi nà n tu deri ta koo yɔ̃ra. 4 Yera ba man gɔria mɛsum sere nɔn nnɛ. Adama gari tee yiya na ra bu wisi. 5 Yera Sambala u maa man win sɔm kowo gɔria nɔn nɔɔbuse. Sɔm kowo wi, u tireru nɛni te ba ǹ wukiri. 6 Wee ye ya yorua tire te sɔɔ. Ta nɛɛ, Gesɛmu u nɛɛ, labaari gaa ya nɔɔramɔ bwesenu sɔɔ. Yera wunɛ ka wunɛgibu i be sɔɔru kpa i ka tii yina. Yen sɔ̃na a gbãra te seeyamɔ. Wunɛn tii a kĩ a be ko ben sina boko. 7 A mam be Gusunɔn sɔmɔbu gɔsa be ba koo kpara Yerusalɛmuɔ ma a kua Yudaban sina boko. Tɛ̃, a n yɛ̃ ma n ǹ tɛɛmɔ sina boko u ka labaari ye nɔ. Yen sɔ̃, a na su wesiana sannu. 8 Ma na Sambala wisa na nɛɛ, weesa a mɔ̀. Wuna a wunɛn gari sekumɔ. 9 Bɛsɛn yibɛrɛ be, ba kookari kua bu ka sun nandasia. Ba tamaa sa ko mwia kpanawa su sɔmbu te deri. Tɛ̃, Yinni Gusunɔ a man dam kɛ̃ɛyɔ sɔmbu te sɔɔ. 10 Yen biru, na wura na Semaya Delayan bii Mɛhetabɛlin debubu deema. N deema u raa tii kɛnusi ma u nɛɛ, su da sannu Yinni Gusunɔn sãa yerɔ sere sɔɔwɔ su kuke. Kpa su tii gamboba kɛnusi. Domi yibɛrɛ be, ba wee bu nɛ, Nɛɛmi go wɔ̃kuru. 11 Ma na nùn wisa na nɛɛ, tɔnu wi sãa nge nɛ u koo maa duka su yibɛrɛban wuswaaɔ? Nge wara u koo du Yinni Gusunɔn sãa yerɔ u yari wasiru. Na ǹ duɔ mi. 12 Domi na tuba ma n ǹ Gusunɔ u nùn gɔrima. Adama u win gari geruawa yèn sɔ̃ Sambala ka Tobiya ba nùn gobi kɔsia u ka ye ko. 13 Tɔn be, ba tamaa ù n kua mɛ, kon bɛrum ko kpa n win gere swĩi n wɔri durum sɔɔ, kpa bu nɛn yĩsiru sanku n bɛɛrɛ bia. 14 Yinni Gusunɔ, a de a n yaaye ye Tobiya ka Sambala ka Gusunɔn sɔmɔ Nɔadia tɔn kurɔ wi, ba kua ka sere Gusunɔn sɔmɔ be ba tie ba kasu bu man bɛrum tia. 15 Sa gbãra ten bana kpawa suru wi ba mɔ̀ Elulun sɔ̃ɔ yɛnda nɔɔbuse sɔɔ. Sa sɔmbu te kuawa sɔ̃ɔ weeraakuru ka yiru. 16 Sanam mɛ bɛsɛn yibɛrɛba ka bwese ni nu ka sun sikerenɛ ba nua sa gbãra te seeya, yera ba bɛrum soora. Ma sekura bu mwa. Saa ye sɔɔra ba tuba ma Yinni Gusunɔwa u dera sɔmbu te, ta koora. 17 Sanam mɛ sa bana ye mɔ̀, Yudan wirugibu gabu ka Tobiya ba ra n tirenu kuanammɛwa kiri kiri. 18 Domi Yuu dabira ta nɔɔ tia kua ka wi, ka bɔ̃ri yèn sɔ̃ u Yuu wi ba mɔ̀ Sekania, Aran biin bii wɔndia sue kurɔ. Mɛya maa Tobiyan bii Yokanani u Yuu wi ba mɔ̀ Berekia, Mɛsulamun biin bii wɔndia sue kurɔ. 19 Ba ra n mam wi, Tobiyan gea gerumɔwa nɛn wuswaaɔ kpa bu da bu nùn nɛn gari swaa gurea. Tobiya wi, u ra n man tirenu kuammɛwa u ka man nandasia.
