Nɛɛmi 5

1Sɔ̃ɔ teeru, Yuuban tɔn durɔbu ka ben tɔn kurɔbu ba ka begibu gabu mɔru mɔ̀. 2Gaba gerumɔ ba mɔ̀, bɛsɛ ka bɛsɛn bibu, sa dabi. Yen sɔ̃, sa alikaman bukata mɔ ye sa ko di sa n ka wãa. 3Gaba maa gerumɔ ba mɔ̀, sa bɛsɛn gbea ka bɛsɛn resɛm gbaanu ka mam bɛsɛn dia tɔruba yiimɔ su ka alikama wa gɔ̃ɔrun saa. 4Gaba maa gerumɔ ba mɔ̀ sa gobi bɔkurawa bɛsɛn gbean dĩanu sɔɔ su ka wa su Babilonin sina bokon wɔ̃ɔ gobi kɔsia. 5Adama bɛsɛ kpuro sa sãawa bwese teeru. Bɛsɛn bibu ka ben bibu tia yera. Adama ba sun tilasi mɔ̀ su ka bɛsɛn bibu yoru kpɛ̃ɛ. Bɛsɛn bii wɔndia dabiru ta mam wãa yoo te sɔɔ kɔ. Sa ǹ maa kpɛ̃ su gãanu ko domi wee ba bɛsɛn gbea ka bɛsɛn resɛm gbaanu tɔruba mwa. 6Sanam mɛ na ye kpuro nua, ka tɔn ben weewee ni ba mɔ̀, yera mɔru man mwa gem gem. 7Ma na gɔ̃ru doke n bukuro be, ka siri kowo be gerusi. Ma na be kpuro sokusia ba mɛnna. Na bu bikia na nɛɛ, amɔna i ka bɛɛn mɛro bisibu gãanu bɔkuramɔ i nim dokemɔ. 8Ma na bu sɔ̃ɔwa na nɛɛ, sa bɛɛn mɛro bisi be ba tii tɔn tukobu dɔre yakia ka dam mɛ sa mɔ. Yera bɛɛn tii i maa bu dɔramɔ bɛɛn tii tiinɛ sɔɔ? Ma ba mari ba ǹ maa gãanu wisa. 9Na maa wure na nɛɛ, ye i mɔ̀ mi, ya ǹ wã. Ya weenɛ i n Gusunɔ nasie, kpa bwese tukunu nu ku sun wɔmɛ. 10Nɛn tii ka nɛn tundo bisibu ka nɛn sɔm kowobu sa tɔn be gobi ka alikama bɔkura. Adama su bu ye kpuro deria. 11Ǹ n mɛn na, i doo saa gisɔn di i ben gbea ka ben resɛm gbaanu ka ben dia ye i tɔruba mwa wesia. Kpa i maa are yin tii bu wesia yi i bu mwaari gobi yi i bu bɔkura sɔɔ ka alikama sɔɔ ka tam sɔɔ ka sere maa gum sɔɔ. 12Ma ba man wisa ba nɛɛ, sa ko ye wesia. Sa ǹ maa bu gãanu mwaarimɔ. Sa ko kowa nge mɛ a gerua. N deema na yãku kowobu sokusia. Ben wuswaaɔra ba nɔɔ mwɛɛ ni kua ka bɔ̃ri. 13Yen biru na nɛn yaberu nɛnua na kpara ma na nɛɛ, wi u kun win nɔɔ mwɛɛru yibie, Gusunɔ u yɛ̃ro kparo nge mɛsum kpa u yɛ̃ro yara win yɛnun di. U de yɛ̃ron dukia yu doona kpa u yɔ̃ra nɔm dira. Ma be kpuro ba wura ba nɛɛ, ami, n yɛ̃ro koowo mɛsum. Ma be kpuro ba Yinni Gusunɔ siara. Yen biru ba ben nɔɔ mwɛɛ ni yibia. 14Saa sina boko Aatasɛsin bandun wɔ̃ɔ yɛndun diya u man kua Yudaban kparo sere n ka girari win bandun wɔ̃ɔ tɛna ka yiru. N kuawa mi wɔ̃ɔ wɔkura yiru. Saa ye kpuro sɔɔ, nɛ ka nɛn mɛro bisibu sa ǹ tem yɛ̃rorun gãanu mwaare. 15Adama n sere tunuma mi, kparo be ba raa wãa mi, ba ra tɔmbu wɔ̃ɔ gobi burewa n kpã kpa bu bu dĩanu mwaari ka tam ka sere maa sii geesun gobi weeru. Yen biru, ben sɔm kowobu ba ra n tɔmbu dam dɔremɔwa. Adama nɛ, na ǹ kue mɛ, yèn sɔ̃ na Gusunɔ nasie. 16Bɛsɛn tiiwa sa sɔmburu kua sa ka gbãra te sɔnwa. Sa ǹ maa gberu garu dwa bɛsɛn tiin sɔ̃. Nɛn sɔm kowobu kpurowa ba ka man sɔmbu te kua. 17Ka mɛ, Yuuba ka ben wirugibu be ba ra di nɛn yɛnuɔ, ba sãawa wunaa weeru ka wɔkuru ka sere maa sɔɔ be sa ra wa tem tukum di. 18Tɔ̃ɔ baatere naa na ra de bu go ka yãanu nɔɔba tia ni nu gea sãa ka sere maa gue. Yen biru sɔ̃ɔ wɔkuru ka sɔ̃ɔ wɔkura, ba ra ka man tam naawɛ. Ka mɛ, ye kpuro sɔɔ, na ǹ tɔmbu tem yɛ̃rorun gãanu bikiare. Domi ben ye ba mɔ̀ ya kpã kɔ. 19Yinni Gusunɔ, a man yaayo ye na tɔn be kuan sɔ̃, kpa a ka man nɔnu geu mɛɛri.

will be added

X\