Nɛɛmi 4

1Sanam mɛ Sambala ka Tobiya ka Daarububa ka Amɔniba ka Asidɔdugibu ba nua ma Yerusalɛmun gbãra ten sɔmbura sĩimɔ, ba maa ten kuu dabinu kɔrumɔ, yera ba mɔru bɛsira too. 2Ma ba nɔɔ tia kua bu ka Yerusalɛmu wɔri kpa bu yen tɔmbu burisina. 3Yera sa Gusunɔ bɛsɛn Yinni kana ma sa gbãra te kɔ̃su sɔ̃ɔ sɔɔ ka wɔ̃kuru. Sa yibɛrɛ be mara. 4Adama Yudaba ba gerumɔ ba mɔ̀, gbãra ten wɔrumaan tem kusanu nu kpã sere bɛsɛn sɔm kowoba wasira ka nin gurabu. Sa ǹ kpɛ̃ su tu bani. 5Ma bɛsɛn yibɛrɛba ba tamaa sa ǹ ben baaru nɔɔmɔwa, sa ǹ maa bu wasi sere dɔma te ba koo sun wɔri bu go kpa bu bɛsɛn sɔmbu te yɔ̃rasia. 6Yuu be ba wãa bɛsɛn yibɛrɛban suunu sɔɔ ba na ba sun sɔ̃ɔwa nɔn dabinu kari ye ya wee saa yibɛrɛ ben min di ka sere mìn di ba koo sun wɔrima. 7Yen sɔ̃na na tɔmbu tabu yãnu wɛ̃ ben baawure ka win takobi ka win yaasa ka win tɛndu. Ma na bu yi yi bwese kɛra ka bwese kɛra gbãrarun biruɔ mi ba ǹ gina banɛ. 8Ma na seewa na bukurobu ka siri kowobu ka tɔn be ba tie sɔ̃ɔwa na nɛɛ, i ku ben bɛrum ko. I yaayo ma Yinni Gusunɔ u kpã. Wiya ba koo nasia. I tabu koowo bɛɛn mɛro bisibun sɔ̃ ka bɛɛn bibun sɔ̃ ka bɛɛn kurɔbun sɔ̃ ka sere bɛɛn yɛnusun sɔ̃. 9Yen biru, bɛsɛn yibɛrɛba ba nua ma ba sun sɔ̃ɔwa ye ba mɔ̀ kpuro. Gusunɔ u maa ben himbaba kam koosia. Ma baawure u wura mi u raa sɔmburu mɔ̀. 10Saa dɔma ten di, nɛn sɔm kowobun sukum mu ra n sɔmburu mɔ̀wa kpa be ba tie ba n yaasi ka tɛrɛnu ka tɛnnu bɛki kpa ba n yabe tarakpenu doke. Kpa bɛsɛn wirugibu ba n sun dam kɛ̃mɔ. 11Be ba maa gbãra te banimɔ ka be ba kpenu guramɔ, ba ra n nɔm teuɔ tabu yãnu nɛniwa kpa ba n ka teu sɔmburu mɔ̀. 12Ben baawure u ra n win takobi sãrusiewa pɔraɔ. Wi u ra kɔba so, wiya u ra n man swĩi. 13Ma na bukurobu ka siri kowobu ka sere tɔn be ba tie mi sɔ̃ɔwa na nɛɛ, bɛsɛn sɔmbu te, ta kpã. Wee sa yarinɛ baama kpuro. Goo kun ka goo turuku gbãra ten sɔmburu sɔɔ. 14Yen sɔ̃, ì n kɔban swĩi nua, i mɛnnama nɛn mi bera gee i yen swĩi yi nua. Gusunɔ bɛsɛn Yinni u koo sun sanna. 15Nge mɛya sa ka sɔmbu te mɔ̀. Bɛsɛn sukum mu yaasi nɛni saa bururun di sere ka wɔ̃kurɔ. 16Na maa wure na bu sɔ̃ɔwa na nɛɛ, baawure u kpunɔ Yerusalɛmun nukurɔ ka win sɔm kowobu kpa su dom se wɔ̃kuru sa n yibɛrɛba mara. Kpa su sɔmburu ko sɔ̃ɔ sɔɔ. 17Ma nɛ Nɛɛmi ka nɛn mɛro bisibu ka nɛn sɔm kowobu ka nɛn kɔ̃sobu be ba man swĩi, bɛsɛ kpuro sa ǹ bɛsɛn yãnu potira. Ma baawure u win tabu yãnu ka win nim nɛni.

will be added

X\