Nɛɛmi 2

1Ye Aatasɛsi u kua wɔ̃ɔ yɛndu bandu sɔɔ, wɔ̃ɔn suru gbiikoon tɔ̃ru garu, u sɔ̃ u dimɔ, ma na tam sua na nùn wɛ̃. Adama saa ye sɔɔ, na nuki sankire too. Na ǹ nuki sankirare nge mɛ. 2Yera sina boko u man bikia u nɛɛ, amɔna nɛn wuswaa ya ka burisinɛ mɛ. Na barɔwa? Nuku sankira nirà na mɔ mɛ. Yera na nanda too. 3Adama ka mɛ, na kpĩa na nùn sɔ̃ɔwa na nɛɛ, yinni, wunɛn wãaru tu dakaa da. Na ǹ kpɛ̃ na kun nuki sankire. Domi wuu gèn mi ba nɛn sikadoba sika ga kua bansu. Ma gen gbãrarun gamboba ba dɔ̃ɔ mwaakira. 4Sina boko u man bikia u nɛɛ, mba na kĩ u man kua. Yera na yande Wɔrukoo kana. 5Ma na nùn wisa na nɛɛ, yinni, à n ka man nɔnu geu mɛɛra, a de n wura Yudaban temɔ wuu gèn mi ba nɛn sikadoba sika kpa n gu bani n seeya. 6N deema sina boko ka win kurɔwa ba sɔ̃ dɔma te. Yera u maa man bikia u nɛɛ, sɔ̃ɔ nyewa kon ko mi. Saa yerà kon wurama. Ma na nùn sɔ̃ɔwa saa ye kon wurama. Ma u wura n da. 7Yen biru, na nɛɛ, sina boko, na nun kanamɔ, a man tireru wɛ̃ɛyɔ tem yɛ̃ro be ba wãa Efaratin sɔ̃ɔ duu yeru gian sɔ̃ bu ka man deri n turi Yudaɔ. 8Mɛya na maa kĩ a man tireru garu wɛ̃ Asafun sɔ̃ wi u sãa sina bokon dãa kɔ̃so kpa u man dãa kɛ̃ n ka dii te ta wãa sãa yerun bɔkuɔn gamboba ko ka wuu gen gbãrarun gamboba ka sere diru mi nɛn tii ko na n wãa. Yera sina boko u man tire ni kpuro wɛ̃. Domi Gusunɔ u wãa ka nɛ. 9Ma u tabu sinambu ka maasɔbu gɔsa bu ka man yɔ̃siri. Yera na seewa na da na tem yɛ̃ro be deema be ba wãa sɔ̃ɔ duu yeru gia mi. Ma na bu sina bokon tire ni wɛ̃. 10Sanam mɛ Sambala wi u sãa Horoni ka win sɔm kowo Tobiya wi u sãa Amɔni ba nua ma na wee n ka Isireliba gea kua, yera ben nuki sankira too. 11Sanam mɛ nɛ Nɛɛmi na tunuma Yerusalɛmuɔ, na sinawa gina sɔ̃ɔ ita. 12Na ǹ goo sɔ̃ɔwa ye Gusunɔ nɛn Yinni u man sɔ̃ɔwa n ko Yerusalɛmun sɔ̃. Yen biru, na seewa wɔ̃kuru ka tɔmbu gabu. Na ǹ yaa saberu garu sue ma n kun mɔ kɛtɛku ge na sɔni. 13Wɔ̃ku suunu sɔɔ, na yara saa kɔnnɔ ge ga wãa wɔwa gian di na da bwiaɔ ye ba mɔ̀ Yaa gɔba ka maa sere kɔnnɔwɔ mi ba ra kubanu yari. Ma na Yerusalɛmun gbãra te mɛɛra mɛɛra, na wa ta kurunu mɔ. Ma ten gamboba ba dɔ̃ɔ mwaakira. 14Ma na da kɔnnɔ ge ga wãa bwia ye ba gban bɔkuɔ ka sere sina bokon bwiaɔ. Adama ayeru garu sari mi nɛn kɛtɛku ga koo ka sara. 15Ma na kpa ka Sedoronin wɔwa gia na ka gbãra te mɛɛri mɛɛrimɔ sere na ka tunuma kɔnnɔ ge ga wãa wɔwa giaɔ mìn di na raa ka yara. 16Saa ye sɔɔ, wuun siri kowobu ba ǹ yɛ̃ mi na da ka ye na mɔ̀. Domi na ǹ Yuu goo gãanu sɔ̃ɔwa baa ka yãku kowobu ka wuun bukurobu ka sere tem mɛn kparobu. 17Adama ye na wurama na bu sɔ̃ɔwa na nɛɛ, bɛɛn tii i wa nge mɛ Yerusalɛmu ya sãa. Wee ya bansu kua. Ma yen gbãrarun gamboba ba dɔ̃ɔ mwaakira. Yen sɔ̃, su yen gbãra te seeya kpa sa kun maa wãa sekuru sɔɔ. 18Ma na bu sɔ̃ɔwa nge mɛ Gusunɔ nɛn Yinni u man kɔ̃su ka ye sina boko Aatasɛsi u man kua. Yera be kpuro ba yande nɔɔgiru sua ba nɛɛ, su se su gbãra te bani. Ma ba dam kɛ̃ɛna ka gari yi. 19Adama Sambala wi u sãa Horoni ka win sɔm kowo Tobiya wi u sãa Amɔni ka Gesɛmu wi u sãa Daarubu ba yen labaari nua. Yera ba sun yaakoru torua. Ma ba sun bikia ka gɛndu mba sa mɔ̀ mi. Sa kasuwa su sina boko seesi? 20Ma na bu wisa na nɛɛ, Yinni wi u wãa wɔllɔ wiya u koo sun nasara wɛ̃. Bɛsɛ win sɔm kowobu sa ko sewa su wuu ge bani. Adama bɛɛ, i ǹ baa mɔ ge sɔɔ, i ǹ maa gãanu mɔ i gere mi. I ǹ ko mam bweseru garu deri tèn sɔ̃ ba koo bɛɛ yaaya.

will be added

X\