Nɛɛmi 11

1Isireliban wirugiba da ba sina Yerusalɛmuɔ. Ma ba tɛtɛ toba bu ka tɔn tia tia wuna Isireli be ba tien wɔkuru baateren wɔllɔ. Bera ba koo sina Yerusalɛmu wuu dɛɛrɔ ge sɔɔ, kpa nɔɔba nnɛ be ba tie bu da wuu si su tien mi. 2Be ba gɔ̃ru doke ka kĩru bu ka sina Yerusalɛmu mi, tɔmba bu domaru kua. 3Isireliban berin wirugibu ba da ba sina Yerusalɛmuɔ ma Isireli be ba tie ka yãku kowobu ka Lefiba ka Nɛtiniba ka sere Salomɔɔn sɔm kowobun bibu ba da ba sina Yudan temɔ ben wusɔ. 4- 5Yudaba ka Bɛnyamɛɛba gaba ba sina Yerusalɛmuɔ. Be ba sãa Yudaba bera Ataya ka Maaseya, Osiasin bii. Ataya u sãawa Sakarin debubu. Win sikadobara Sakari ka Amaria ka Sefatia ka Mahalalɛɛli ka Perɛsi. Maaseya u maa sãawa Barukun bii. Win sikadobara Kolohose ka Hasaya ka Adaya ka Yoyaribu ka Sakari ka Siloni. 6Perɛsin sikadominu be ba sina Yerusalɛmuɔ ben geera sãawa tɔmbu nɛɛru ka wata ka nɔɔba ita (468). Ba sãawa tabu durɔ wɔrugɔba. 7- 8Bɛnyamɛɛ be ba sina Yerusalɛmuɔ, bera Salu ka Gabai ka Salai. Salu u sãawa Mɛsulamun bii, Yoɛdin debubu. Win sikadobara Pedaya ka Kolaya ka Maaseya ka Itiɛli ka Esai. Be ba sãa Bɛnyamɛɛn bweseru ba ka sina Yerusalɛmuɔ ben geera sãawa tɔmbu nɛnɛ ka wunaa teeru ka nɔɔba ita (928). 9Yoɛli Sikirin biiwa u sãa ben kparo. Ma Yuda Senuan bii u maa sãa ben wirugii yiruse. 10Yãku kowo be ba maa sina Yerusalɛmuɔ bera Yedaya, Yoyaribun bii ka Yakini, 11- 14ka Seraya, Hilikiyan bii, Mɛsulamun debubu, Sadɔku ka Mɛrayɔtu ka Akitubu wi u raa sãa yãku kowo tɔnweron sikadobu, ka sere tɔmbu wɛnɛ ka yɛnda yiru (822) be ba ra n sɔmburu mɔ̀ Yinni Gusunɔn sãa yerɔ, ka Adaya Yerohamun bii, Pelatian debubu, Amusi ka Sakari ka Pasuri ka Maakiyan sikadobu, ka sere tɔmbu goobu ka weeru ka yiru (242), be kpuro yɛnu yɛ̃robu, ka Amasai, Asarɛlin bii, Akusain debubu, Mɛsilɛmɔtu ka Imɛrin sikadobu, ka tabu durɔ wɔrugɔba wunaa teeru ka nɔɔba ita (128). Sabudiɛli Gedolimun biiwa u sãa ben wirugii. 15Lefi be ba maa da Yerusalɛmuɔ, bera Semaya, Hasubun bii, Asirikamun debubu, Hasabia ka Bunin sikadobu, 16ka Sabetai ka Yosabadi be ba sãa sɔmbu te ba ra ko yaaraɔn guro gurobu, 17ka Matania, Miseen bii, Sabudin debubu, Asafun sikadobu, wi u ra womu gbi bà n Gusunɔ siaramɔ kanarun saa, ka win wɔnɔ turo Bakibukia wi u ra nùn somi, ka Abuda, Samuan bii, Galalin debubu, Yedutum sikadobu. 18Lefi be ba wãa Yerusalɛmuɔ kpuro ben geera sãawa tɔmbu goobu ka wɛnɛ ka nnɛ (284). 19Be ba ra sãa yerun kɔnnɔ kɔ̃su, bera Akubu ka Talumɔɔ ka wigibu. Be kpuron geera sãawa wunaa wata ka wɔkura yiru (172). 20Isireli be ba tie, ka yãku kowobu ka Lefiba ba da ba sinawa Yudan wusu kpuro sɔɔ, ben baawure u wãa win temɔ. 21Nɛtiniba ba da ba sinawa gungunɔ. Ben wirugiba Sisa ka Gisipa. 22Lefiban wirugii wi u sina Yerusalɛmuɔ win yĩsira Usi, Banin bii, Hasabian debubu. Win sikadobara Matania ka Misee, Asafun bweseru sɔɔ. Asafun bwese te, ta sãawa te ta ra womu ko Yinni Gusunɔn sãa yerɔ. 23Sina boko u wom kowo be wooda yiiya ye ba koo swĩi ka sere maa sɔma ye ba ko n da ko tɔ̃ɔ baatere. 24Petaya, Mɛsesabɛlin bii, Serakin debubu, Yudan sikadobu, wiya u sãa Isireliban sɔmɔ Pɛɛsiban sina bokon mi. 25Yudaba ba da ba sina wuu sini ka sin baru kpaanu sɔɔ. Wuu siya Kiriati Ariba ka yen baru kpaanu ka Diboni ka yen baru kpaanu ka Yokasɛɛli ka yen baru kpaanu 26ka Yesua ka Mɔlada ka Bɛti Palɛti 27ka Hasaa Suali ka Beri Seba ka yen baru kpaanu 28ka Sikilagi ka Mɛkɔna ka yen baru kpaanu 29ka Eni Rimɔɔ ka Sorea ka Yaamuti 30ka Sanɔa ka Adulamu ka yen baru kpaanu ka Lakisi ka yen baru kpaanu ka Aseka ka yen baru kpaanu. Ba sinawa Beri Seban di n ka da Hinɔmun wɔwaɔ. 31Bɛnyamɛɛba ba da ba sinawa Geban di n ka da Mikimasiɔ ka Ayaɔ ka Betɛliɔ ka yen baru kpaanɔ 32ka Anatɔtuɔ ka Nɔbuɔ ka Hananiaɔ 33ka Hasoriɔ ka Ramaɔ ka Gitaimuɔ 34ka Hadidiɔ ka Seboimuɔ ka Nɛbalatiɔ 35ka Loduɔ ka Onɔɔ ye ba maa sokumɔ nɔman sɔm kowobun wɔwa. 36Lefiba sɔɔ, be ba wãa Yudaɔ, ben gaba seewa ba wura Bɛnyamɛɛban temɔ.


Copyright
Learn More

will be added

X\