Nahumu 3

1Ninifugiba kua bɔ̃rurobu. Domi ba sãawa tɔn gowobu. Ba weesu yiba. Ma ba kuuramɔ ka gbana. Ba ra n tɔmbun yãnu guramɔwa. 2Wee sɛnan damusu nɔɔramɔ wuu ge sɔɔ. Wee tabu kɛkɛban uruun wɔkinu nɔɔramɔ, ma dumi yi yi gawe yi yɔ̃ɔkumɔ. 3Maasɔbu ba wee, ba takobiba ka yaasi nɛni yi ballimɔ. Wee ba tɔmbu mɛɛra kua, ma gonu tɛrie baama, nu ǹ garirɔ. Ma ba nu wɔrikimɔ. 4Ninifu ya sãawa nge kurɔ sakara kowo kpoko. Ya bwese dabinu yoru diisia yen buram ka yen sɔrorun sɔ̃. 5Yen sɔ̃na nɛ Gusunɔ, wɔllu ka tem Yinni, kon ye wɔrima. Kon yen yaberu gbabia n ka yen wuswaa wukiri, kpa n yen tereru bwesenu sɔ̃ɔsi, kpa yu sekuru wa. 6Kon ye kubanu sure, kpa tɔmbu bu ye ka. 7Saa yera wi u ye wa u koo duka su, kpa u nɛɛ, Ninifu ya kua bansu. Wara u koo ye wɔnwɔndu kua. Mana kon bu wa be ba koo ye nukuru yɛmiasia. 8Tebɛsi ya wãa Nilun nim swɛɛ yi ba gban bɔkuɔ. Nim mu ka ye sikerenɛ. Ma mu sãa yen gbãraru. Ninifu, a tamaa a Tebɛsi ye sanɔ kere? 9Etiopigibu ka Egibitigiba ba sãa yen dam. Putigibu ka Libigibu ba sãawa yen somiɔbu. 10Ka mɛ kpuro, yen tii ya yoru da. Ba ye mwa ma ba yen bibu go swɛɛ kpuro sɔɔ. Ba yen wirugibu tɛtɛ toosi, ma ba yen damgibu mwɛɛra ba yɔni doke. 11Wunɛ Ninifu, kaa nɔni sɔ̃ɔrawa, kpa a n sãa nge wi u tam goore, kpa a kuku yeru kasu yibɛrɛban sɔ̃ a kuke. 12Saa ye sɔɔ, wunɛn gbãranu kpuro nu ko n sãawa nge dãa nìn marum mu ye. Bà n mu sira kpa mu wɔri wi u koo mu din nɔɔwɔ. 13Wee wunɛn tɔmbu ba sãa nge tɔn kurɔbu wunɛn suunu sɔɔ. Wunɛn tem wusun kɔnnɔsu su kɛniara mam mam yibɛrɛban wuswaaɔ. Ma dɔ̃ɔ u sin kɔkɔrɔba di. 14Bɛɛ Ninifugibu, i nim takirio i yi. Domi ba koo bɛɛn wuu tarusi. I bɛɛn gbãrarun dam sosio. I birikiba muro kpa i sɔndu taaku i ka tu bani. 15Baa ì n yeba kpuro kua, ka mɛ, dɔ̃ɔ u koo na u bɛɛ di, ǹ kun mɛ bu bɛɛ go ka takobi. Ba koo bɛɛ kpeerasiawa nge mɛ twee yi ra dãa wurusu di. Wee, i dabia nge twee. 16Bɛɛn tenkuba ba kperi dabiru kere. Adama be kpuro ba doona nge twee yi yi yɔ̃ɔwa. 17Bɛɛn kɔ̃sobu ba dabi nge gbabu swɛ̃ɛ. Bɛɛn sɔm kowobu ba dabi nge twee yi yi sina dãa kikisɔ bururu. Adama ye sɔ̃ɔ u yara ma yi yɔ̃ɔwa yi doona, ba ǹ tuba mi yi da. 18Wunɛ Asirin sina boko, wee wunɛn kparobu ba dom yĩbirimɔ. Wunɛn tabu durɔ damgibu ba ǹ maa wasi. Ma wunɛn tɔmbu ba yarinɛ yam kpuro guunu wɔllɔ, goo sari wi u koo bu kpaasina. 19Goo kun wunɛn mɛɛra ye nɔɔrimɔ. Ya koo nun gowa. Wi u nua ye ya nun deema, u koo taka kowa nuku dobun sɔ̃. Domi goo sari wi a ǹ nɔni sɔ̃ɔwa.

will be added

X\