1 Bɛɛ Yudaba, wee goo u na guunu wɔllɔ u bɔri yɛndun labaari gea kparamɔ. Yen sɔ̃, i bɛɛn tɔ̃ɔ baka ni i ra raa di Yinni Gusunɔn sɔ̃ dio. I bɛɛn nɔɔ mwɛɛnu yibio. Domi tɔn kɔ̃so wi, u ǹ maa wee bɛɛn suunu sɔɔ. Na nùn kpeerasiawa mam mam. 2 Bɛɛ Ninifugibu, kam koosio u bɛɛ wɔrim wee. Yen sɔ̃, i bɛɛn gbãraru maruo, kpa i bɛɛn swɛɛ kɔ̃su. I sɔɔru koowo, kpa i wɔrugɔru sɔ̃ɔsi ka bɛɛn dam kpuro. 3 Wee Yinni Gusunɔ u Yakɔbun bweseru, Isireliba ben bɛɛrɛ wesiamɔ, be, be yibɛrɛba ba wɔri ba ben yãnu gura nge mɛ ba ra resɛm kãasi yakiri. 4 Ninifun yibɛrɛban tabu durɔ damgibun tɛrɛnu nu sɔ̃ri. Ma ba yãa wunɔmginu doke. Tabun tɔ̃ru tà n tura, ben tabu kɛkɛ be dumi gawe yi ra kuramɛwa yi n ballimɔ nge dɔ̃ɔ buri, kpa ba n yaasi fĩamɔ. 5 Ba tabu kɛkɛba yakiamɔ swɛɛ sɔɔ nge wiirobu. Ba daamɔ batuma kpuro sɔɔ ka dam. À n bu wa, a ra n tamaa dɔ̃ɔ yariya. Kpa ba n duki mɔ̀ nge guru maakinu. 6 Ninifun sina boko u win tabu durɔ damgibu yaaya u sokumɔ. Adama be wee, ba sĩimɔ ba bãarimɔ. Ben yibɛrɛba ba sɛnde ba ka dɔɔ wuun gbãraru gia. Ma ba tii kuku yenu kua. 7 Subaru sɔɔ, ba daanun swɛɛ kɛnia, ma sina kpaara wɔruka. 8 Ba Ninifu ye mwa ba yen yãnu gura ba ka doona. Yen tɔn kurɔbu ba sumɔ nge kparukonu, ma ba toronu soomɔ. 9 Ninifu ye, ya sãawa nge nim bwee bakaru tèn nim mu gɛ̃ɛra mu doona. Ma nɔɔgira nɔɔramɔ ta mɔ̀, i yɔ̃ro, i yɔ̃ro. Adama goo kun yɔ̃re. 10 I sii geesu ka wura guro. Ben dukia ya ǹ nɔru mɔ. Dukia bwese bwesekawa ba mɔ. 11 Ba guramɔ, ba goomɔ, ba sankumɔ. Tɔmbu kpuron gɔma dwiiya. Ben dũunu soonamɔ, ma ben dam doona. Be kpuron wuswaa burisinɛ. 12 Mana Ninifu ye, ya wãa tɛ̃, ye, ye ya raa sãa nge gbee sinansun wãa yeru, mi gbee sunɔ dwaa ka ninu ka binu nu ra n bɔsu, goo ku ra maa nu nare, 13 kpa dwaa ye, yu yen kurɔbu ka yen binu yaa goowa, kpa yu wãa yee te yaa yibia. 14 Gusunɔ wɔllu ka tem Yinni u nɛɛ, nɛ wee. Nɛna na sãa yen yibɛrɛ. Kon de yen tabu kɛkɛba bu dɔ̃ɔ mwaara. Kon de bu yen bibu go tabu sɔɔ. Kon de yu ku maa tɔmbun yãnu gura. Goo kun maa yen sɔmɔbun nɔɔ nɔɔmɔ.
