Nahumu 1

1Gari wee yi Yinni Gusunɔ u gerua wuu ge ba mɔ̀ Ninifun sɔ̃. Nahumu Ɛlikosigiiwa Gusunɔ u dera u yi wa kãsiru sɔɔ ma u yorua. 2Yinni Gusunɔ u sãawa nisinugii. U ra mɔru kɔsie. Win mɔru ya kpã. U ra win yibɛrɛba mɔru kɔsie. U ku ra bu suuru kue. 3U ku ra toro deri u kun nùn sɛɛyasie. Adama u ku ra mɔru se fuuku. Win dam mu kpã. Ù n sĩimɔ, woo guna ya ra n seewawa, kpa guru winu nu n sãa nge win naasun tua. 4Ù n nim wɔ̃ku gbãre, ga ra gberewa. U ra daanu kpuron nim gberasiewa, kpa yaka si su wãa Basaniɔ ka Kaamɛlin gãanɔ su gbera, kpa dãa wɛ̃ɛ si su wãa Libaniɔ su dɛlla. 5U dera guunu bãarimɔ. Ma gungunu diirimɔ. Ma tem ka mɛn tɔmbu ba yiiyaramɔ win wuswaaɔ. 6Wara u koo kpĩ u yɔ̃ra u win mɔru ma. Wara u koo ka win mɔru gabirina. Win mɔru ya ra pusiwa nge dɔ̃ɔ. Wee ya kpenu bɛsukumɔ. 7Yinni Gusunɔ u sãawa tɔn geo. U sãawa be ba wãa wahala sɔɔn kuku yeru. Be ba nùn naanɛ sãa, bera u ra nɔɔri. 8U koo Ninifu kpeerasia mam mam ka nim bakam, kpa u win yibɛrɛba naa gira sere gɔribun wãa yerɔ yam wɔ̃kuru sɔɔ. 9Mba i Yinni Gusunɔ bwisikusimɔ. Wiya u ra kam koosie mam mam. Ba ku ra nɔni swãaru wa nɔn yiruse. 10Yibɛrɛ be, ba sãa nge sãki kɔkɔnu, ba ra tam nɔ sere mu bu go. Ka mɛ, ba koo dɔ̃ɔ mwaarawa mam mam nge yaka gbebusu. 11Ninifu, wunɛn min diya goo u yara wi u Gusunɔ kɔ̃sa bwisikusimɔ, ma u kĩ u nùn seesi. 12Yinni Gusunɔ u Yudaba sɔ̃ɔwa u nɛɛ, baa bɛɛn yibɛrɛba bà n dabi amɔ, ma ba dam mɔ amɔ, ka mɛ, kon bu gowa mam mam. Na bɛɛ sekuru doke. Na ǹ maa wuremɔ n bɛɛ kua nge mɛ. 13Kon ben yoo te ba bɛɛ diisiamɔ kpeerasia. Kon ten yɔni kasuku. 14Bɛɛ Ninifugibu, wee ye nɛ, Yinni Gusunɔ na gerua bɛɛn sɔ̃. Na nɛɛ, i ǹ bweseru wasi te ta koo bɛɛn yĩsiru sɔbe. Kon bɛɛn bwãaroku dãaginu ka sisuginu kpuro wuna bɛɛn bũu dirun di, kpa n bɛɛn sika sɔɔru ko. Domi i ǹ sãa gãanu.

will be added

X\