Misee 7

1Misee u nɛɛ, wee na wɔnwɔndu soore nge wi u dãa binu kunɔnu mɔ̀. Ma u ǹ gãanu wa u di. U ǹ maa resɛm yeba wa ye win gɔ̃ru ga kĩ u di. 2Domi tem mɛ sɔɔ, goo sari wi u Gusunɔ mɛm nɔɔwammɛ. Goo kun mɔ̀ dee dee. Be kpuro ba bwisikumɔwa bu tɔmbu go. Ma ba sãkirianammɛ. 3Ba kɔ̃san kobun yɛ̃ru mɔ. Ma sinambu ka siri kowobu ba tɔmbu nɔm biram kɛ̃nu mwaarimɔ. Ben damgibu ba ben binɛ sɔ̃ɔsimɔ. Ma be kpuro ba nɔɔ tia sãa bu ka ko ye ba kĩ. 4Ben wi u sanɔ bo, u sãawa nge sãka. Ben wi u dɛɛre, u awĩi kɔ̃si kere. Yen sɔ̃ tɛ̃, tɔ̃ɔ te Gusunɔn sɔmɔbu ba bu nɔɔsia tè sɔɔ ba koo bu sɛɛyasia ta tunuma. Wee ba burisinɛ kɔ nuku sankiranun sɔ̃. 5Yen sɔ̃, a ku wunɛn berusebu naanɛ ko. A de a wunɛn yara nɛnɛ wunɛn tiin kurɔn wuswaaɔ. 6Domi bii u ra win tundo wɔmɛ, kpa bii wɔndia u win mɛro seesi, kpa bigii kurɔ u win dwaa mɛro seesi. Baawure u ra n win yibɛrɛ mɔwa win tiin yɛnu sɔɔ. 7Adama nɛ, Yinni Gusunɔwa ko na n mɛɛra. Wiya ko na n naanɛ sãa. Domi u ra man faaba ko. Wiya u koo man wisi. 8Bɛɛ be i sãa bɛsɛn yibɛrɛba, i ku yɛ̃ɛ ye ya sun deeman sɔ̃. Baa sà n wɔruma, sa ko se. Sà n maa wãa yam wɔ̃kuru sɔɔ, Yinni Gusunɔwa u ko n sãa bɛsɛn yam bururam. 9Sa ko Yinni Gusunɔn mɔru sɔbe, domi sa nùn tora. Adama saa gaa sisi yè sɔɔ u koo ka sun yina, kpa u sun gem wɛ̃. U koo ka sun na yam bururam sɔɔ kpa u sun durom kua. 10Bɛsɛn yibɛrɛba ba koo ye wa. Saa ye sɔɔra ba koo sekuru wa, be, be ba ra raa bikie bu nɛɛ, mana Gusunɔ bɛsɛn Yinni u wãa. Ba koo bu taaku nge pɔtɔkɔ, kpa su bu yɛ̃ɛ. 11Tɔ̃ru gara sisi tè sɔɔ ba koo Yerusalɛmun gani seeya, kpa bu bɛsɛn tem nɔɔ bura yeru yasiasia tu tonda. 12Saa ye sɔɔ, bɛsɛgii be ba wãa Asiriɔ ka Egibitiɔ ka daa ni ba mɔ̀ Nilu ka Efaratin goorɔ, ka sere maa be ba wãa nim wɔ̃kun goorɔ ka guunɔ, ba koo wurama bɛsɛn temɔ. 13Kpa tem mɛ mu tie dunia sɔɔ mu ko bansu, tɔn be ba wãa min kom kɔ̃sum sɔ̃. 14Yinni Gusunɔ, a wunɛn tɔn be a gɔsa kparo ka wunɛn kpara dɛka. Be wee ba wãa be tɔna dãa sɔ̃ɔwɔ mi tem gem wãa. A bu kparo Basani ka Galadin kpara yenɔ nge yellu. 15A sɔm maamaakigia koowo nge mɛ a kua sanam mɛ a sun yarama saa Egibitin di. 16Bwesenu nu koo maamaaki ye wa. Kpa nu sekuru wa baa mɛ nu dam mɔ. Nu koo nɔɔ nɔma wukiri, nu yɔ̃ra nu kun gari gerua, kpa nu kun gãanu nua. 17Kpa nu tua di nge waa, ǹ kun mɛ nge yɛɛ yi yi kabirimɔ. Nu koo yari saa nin kuku yerun di ka bɛrum, nu na wunɛ Yinni Gusunɔn mi, nu n diirimɔ, kpa nu n nun nasie wunɛn dam sɔ̃. 18Wara u ka nun weenɛ. Wee, a ra ka bɛsɛ wunɛn tɔmbun bweserun sukum mɛ mu tie tɛmanɛ bɛsɛ be sa sãa wunɛn arumani kpa a sun bɛsɛn toranu suuru kua. Wunɛn mɔru ku ra tɛ. Domi kĩra a ra sun sɔ̃ɔsi. 19Kaa maa bɛsɛn wɔnwɔndu wa. Kpa a ku bɛsɛn toranu garisi. Kpa a bɛsɛn durum wuna a kɔ̃ yu da sere nim wɔ̃kun temɔ. 20Kaa bɛsɛ be sa sãa Aburahamu ka Yakɔbun sikadominu kĩru ka bɔrɔkiniru sɔ̃ɔsi nge mɛ a bɛsɛn sikadoba nɔɔ mwɛɛru kua saa yellun di.

will be added

X\