Misee 6

1I swaa dakio ye nɛ, Yinni Gusunɔ na gerua. Na nɛɛ, Isireliba, i seewo i ka tii yina guunu ka gungunun wuswaaɔ. 2Bɛɛ guunu, i swaa dakio. Bɛɛ tem kpɛɛkpɛɛku damginu, nɛ, Yinni Gusunɔ na nɛn tɔmbu taarɛ wɛ̃ɛmɔ. Na kĩ n bu siribu soku. 3Bɛɛ Isireliba, bɛɛ nɛn tɔmbu, kɔ̃sa mba na bɛɛ kua. Ma sɔɔra na dera i wasira. I man wisio. 4I man taarɛ wɛ̃ɛmɔ yèn sɔ̃ na bɛɛ Isireliba yara saa Egibitin di? Ǹ kun mɛ yèn sɔ̃ na bɛɛ yara saa yorun di? Ǹ kun mɛ yèn sɔ̃ na bɛɛ kparo beni gɔriama, Mɔwisi ka Aroni ka Mariamu? 5Bɛɛ nɛn tɔmbu, i yaayo kɔ̃sa ye Balaki Mɔabun sina boko u bwisika u bɛɛ kua. I maa yaayo ye Balamu Beorin bii u nùn wisa. Na bɛɛ yɔ̃siri bɛɛn sanum sɔɔ saa Sitimun di sere Giligaliɔ. Ma i nɛn durom wa mɛ nɛ, Yinni Gusunɔ na bɛɛ kua. 6Kɛ̃ɛ terà kon ka Yinni Gusunɔ wi, wi u kpuro kere daawa nà n dɔɔ win sãa yerɔ. Kɛ̃ɛ terà ko na n nɛni n ka nùn yiira. Naa wɔ̃ɔ tiagia kon ka nùn yãku dɔ̃ɔ mwaararugiru kua? 7Yinni Gusunɔ u yãa kinɛ dabi dabinun bukata mɔ? Gum kotosun bukatawa u mɔ? Nɛn bii gbiikoowa kon nùn wɛ̃ u sere man nɛn toranu suuru kua? 8Aawo, Yinni Gusunɔ u tɔmbu gea sɔ̃ɔsi ye u ra kã. Ye u bu kanamɔ bu ko, yera bu ben berusebu wɛ̃ ye n sãa begia. Kpa bu bu kĩru sɔ̃ɔsi. Kpa bu wi, Gusunɔ ben Yinni swĩi ka tii kawabu. 9Yinni Gusunɔ u ka Yerusalɛmugibu yã. Wi u bwisi mɔ, u koo nùn nasia. Bɛɛ Yudaba, i de nɛn siribu bu bɛɛ yeeri. 10Kon wura tɔn kɔ̃so u dukia gure win dirɔ ka gbɛna? Kpa u n sakaku mɔ ge na ǹ kĩ? 11I tamaa wi u kilo weesugia mɔ u dɛɛre? 12Wee bɛɛn gobigibu ba tɔmbu dam dɔremɔ, ba ra n weesu mɔ̀. Kpa ba n gabu nɔni wɔ̃kumɔ ka ben gari. 13Tɛ̃, na sɔɔru kpa n ka bɛɛ sɛ̃suku bɛɛn durum sɔ̃, kpa i kam ko. 14I ko i di, adama i ǹ debumɔ. I ko i nɔɔgiru sua gɔ̃ɔrun sɔ̃. Mɛya n ǹ koorɔ i gãanu bere. Ì n maa gãanu berua, taba kon ka ye kam koosia. 15I ko i duure, adama i ǹ gɛ̃ɛmɔ. I ko i olifi gama, adama i ǹ wasi i yen gum sawa. I ko i resɛm tam wĩa, adama i ǹ wasi i mu nɔ. 16Domi i sina boko Omirin daa kɔ̃sa saarimɔ ka sere maa Akabugia. I ben daa saarimɔwa mam mam. Yen sɔ̃na kon de bɛɛn wuu gu ko bansu. Kpa n de bu bɛɛ yɛ̃ɛ. I ko i sekuru wa bɛɛ kpuro nge mɛ nɛn tɔmbu ba ra wa.

will be added

X\