1 Yinni Gusunɔ u nɛɛ, wunɛ Bɛtelehɛmu, Efaratagibun wuu, wuna a piiburu bo Yudan wusu sɔɔ. Adama wunɛn min diya kparo koo yari wi u koo nɛn tɔmbu Isireliba kpara. U wãawa saa yee yellun di. 2 Adama ko na n gina nɛn tɔn be deriwa ben yibɛrɛban nɔma sɔɔ sere kurɔ wì u koo kparo wi ma, u ka ma. Be ba kpikiru da, ba koo gɔsirama bu Isireli be ba tie deema. 3 Kpa kparo wi na bɛɛ nɔɔ mwɛɛru kua mi, u bɛɛ nɛn tɔmbu mɛnna u kpara mam mam ka nɛ, Yinni Gusunɔn dam ka nɛn yiiko. Win tɔmbu ba ko n wãa bɔri yɛndu sɔɔ. Kpa u yĩsiru yari handunian goonu nnɛ ye sɔɔ. 4 Wiya u koo ka bɔri yɛndu na. Asirigibu bà n na, ba bɛsɛn tem wɔri ba dua sere bɛsɛn sina kpaarɔ, sa ko bɛsɛn kparo be ba dam bo seeya bu bu wɔri. 5 Ben tabu yãnun sɔ̃, ba koo Asirigibu ka Nimurodugii be taare, kpa bu sun wɔra Asirigibu bà n bɛsɛn tem wɔrima. 6 Isireli be ba tiara ba ko n wãa tɔn dabinun suunu sɔɔ nge kako arufaanigiru te Yinni Gusunɔ u dera ta wɔruma, ǹ kun mɛ nge gura ye ya nɛmɔ tɛɛru, ya ǹ gãanu yĩiyɔ tɔnun min di. 7 Isireli be ba tiara ba ko n wãa tɔmbun suunu sɔɔ, kpa ba n dam mɔ nge gbee sunɔ ge ga wãa gbeeku yɛɛn suunu sɔɔ, ǹ kun mɛ yãa gɔ̃ɔ sɔɔ. Mi ga dua kpuro, ga ra yaa kasukuwa gu mwɛ. Goo kun maa kpɛ̃ u gu mwaari. 8 Isireliba, i seewo i bɛɛn yibɛrɛba wɔri. Kpa i bu go mam mam. 9 Yinni Gusunɔ u nɛɛ, tɔ̃ru gara sisi tè sɔɔ kon bɛɛn dumi ka bɛɛn tabu kɛkɛba kpeerasia. 10 Kpa n bɛɛn wusu kam koosia. Kpa n bɛɛn gbãranu suriri. 11 Kon bɛɛn dobo dobogibu go. I ǹ maa ben dobo dobo wasi bɛɛn suunu sɔɔ. 12 Kon bwãarokunu ka kpee ni i gira kɔsuku. I ǹ maa nu sãamɔ. 13 Kon bũu wi ba mɔ̀ Asitaaten sãa yerun dãnu wukiri. Kpa n bɛɛn wusu kɔsuku. 14 Nɛn mɔru koo se, kpa n nɛn dam sɔ̃ɔsi bwese ni nu ǹ man mɛm nɔɔwammɛn mi.
