Misee 4

1Saa gaa sisi yè sɔɔ guu tèn mi Yinni Gusunɔn sãa yera raa gire, ta koo guu ni nu tie bɛɛrɛ kera. Kpa bwese dabinu nu na mi, 2nu nɛɛ, i na su da Yerusalɛmuɔ Yinni Gusunɔn guurɔ mi Isireliba ba ra nùn sã, kpa u sun win swɛɛ sɔ̃ɔsi su sĩ yi sɔɔ. Min diya u koo win wooda yara kpa u gari geruma. 3U koo bwese dabinu siri, ni nu dam mɔ nu na tontonden di. Kpa bwese ni, nu nin takobiba bɔɔri nu ka tebonu seku. Mɛya nu koo nin yaasi bɔɔri nu woba so. Bweseru gara kun garu seesimɔ. Ba ǹ maa tabun gari mɔ̀ ben suunu sɔɔ. 4Baawure u ko n wãa win gberu kpaanɛɔ bɔri yɛndu sɔɔ. Goo kun maa nùn nandasiamɔ. Gusunɔ wɔllu ka tem Yinniwa u yeni gerua. 5Bweseru baatere ta ra kãwa tu ten bũu mɛm nɔɔwa. Adama bɛsɛ, Gusunɔ bɛsɛn Yinniwa sa ko mɛm nɔɔwa sere ka baadommaɔ. 6Tɔ̃ru gara sisi tè sɔɔ kon be ba mɛɛra kua mɛnna, kpa n be ba kpikiru sua sokusiama, be, be na raa nɔni sɔ̃ɔwa mi. 7Kon be ba mɛɛra kua mi mɛnna. Kpa be, ba n sãa nɛn tɔmbun sukum mɛ mu tie. Kpa n be, be ba raa kpikiru sua mi ko bwese damgiru. Kpa nɛ, Yinni Gusunɔ na n sãa ben sunɔ Siɔniɔ sere ka baadommaɔ. 8Wunɛ Yerusalɛmun guuru, wunɛ wi a sãa nge wuu kɔ̃sobun diru, a tɔmbu kɔ̃su, kaa maa wunɛn bɛɛrɛ wa nge yellu. Domi Yerusalɛmu ya koo kpam ko Isireliban wuu maro. 9Mban sɔ̃na i kuuki mɔ̀ bɛɛ Yerusalɛmugibu. Mban sɔ̃na i tii tɛ̃birimɔ nge tɔn kurɔ wi kĩ u ma. Mana bɛɛn sunɔ u wãa. Mana bɛɛn bwisi kɛ̃ɔbu ba da. 10Bɛɛ Yerusalɛmugibu, i wuri koowo nge tɔn kurɔ wi u yiire u kĩ u ma. Domi tɛ̃, i ko i yari Yerusalɛmun di. Kpa i da i n wãa yakasɔ. Ba koo ka bɛɛ da sere Babiloniɔ. Adama Yinni Gusunɔ u koo ra bɛɛ yakiama min di. Kpa u bɛɛ wɔra bɛɛn yibɛrɛban nɔman di. 11Tɛ̃, bwese dabinu nu mɛnnamɔ nu ka bɛɛ seesi. Nu mɔ̀, su de ben wuu Yerusalɛmu ye, yu bɛɛrɛ bia, yu ko bansu. Kpa sa n su mɛɛra. 12Adama tɔn be, ba ǹ yɛ̃ himba ye Yinni Gusunɔ u yi win tɔmbun sɔ̃. Ba ǹ win bwisikunu yɛ̃. U kĩ u bu mɛnna nge alikama ye ba suba mi ba ra ye so. 13Yinni Gusunɔ u nɛɛ, bɛɛ Yerusalɛmugibu, i seewo i bɛɛn yibɛrɛba so nge alikama. Kon de i n dam mɔ nge kɛtɛn kɔba ye ya dam mɔ nge sisu. Ma yen naa konnu nu dam mɔ nge sii gandu. I ko i bwese dabinu munkuwa. Kpa i ben arumani gea mwa i nɛ Gusunɔ tem kpuron Yinni yiiya. 14Adama bɛɛ Yerusalɛmugibu, i bɛɛn tabu kowobu mɛnnama. Wee ba bɛɛ tarusi. Ma ba bɛɛn sina boko soomɔ baanɔ ka bokunu.

will be added

X\