Misee 3

1Bɛɛ Isireliba Yakɔbun bweserun wirugiba na ka yã. N ǹ bɛɛya n weenɛ i n woodaba yɛ̃? 2Adama wee i ǹ gea kĩ, kɔ̃sa i kĩ. I ra tɔmbu ben gãanu kpuro mwaariwa. Kpa i bu yɔ̃su tereru. 3I ra bu diwa mam mam nge yaa ye ba koka ba kukunu kɔsuka, ma ba ye bɔtira ba doke wekerɔ. 4Yen sɔ̃na ì n Yinni Gusunɔ kana u bɛɛ somi, u ǹ bɛɛ wisimɔ. U koo bɛɛ biru kisiwa kɔ̃sa ye i kua min sɔ̃. 5Misee u nɛɛ, wee ye Yinni Gusunɔ u gerumɔ sɔmɔ be ba win tɔmbu nɔni wɔ̃kumɔn sɔ̃. U nɛɛ, bà n bu gãanu nɔɔ dokea, ba ra nɛɛwa, bɔri yɛnda wee. Bà kun maa bu gãanu wɛ̃, kpa bu nɛɛ, tabu sisi. 6Yen sɔ̃, ba ǹ maa yam wasi. Ba ǹ maa win gari mɔ̀. Yam wɔ̃kura koo ka bu sikerena. Ba ǹ maa gãanu wasi. 7Sɔmɔ be, ba koo ben wuswaa wukiriwa sekurun sɔ̃. Domi Yinni Gusunɔ u ǹ bu wisimɔ. 8Adama nɛ Misee, kon na n dam yibawa. Domi Yinni Gusunɔ u man win Hunde wɛ̃. Na gem ka wɔrugɔru sebua. Ma na Isireliba, be Yakɔbun bweseru ben mɛm nɔɔbu sariru sɔ̃ɔmɔ. 9Bɛɛ Isireliba Yakɔbun bweserun wirugibu, i swaa dakio i nɔ. I ku ra gem kã. I ra mu gɔsiewa kɔ̃sa. 10Wee i tɔmbu goomɔ, i ben dukia suamɔ i ka Yerusalɛmu banimɔ. 11Ma i nɔm biran kɛ̃nu mwaamɔ i sere siri. Yãku kowobu ba ra gina tɔmbu gobi mwaariwa bu sere wooda sɔ̃ɔsi, kpa Gusunɔn sɔmɔbu bu gobi mwa bu sere win gari gere. Kpa ba n sere mɔ̀ ba sãawa Gusunɔn tɔmbu. Gãanu kun bu deemamɔ yèn sɔ̃ u ka bu wãa. 12Tɛ̃, bɛɛn sɔ̃, ba koo Siɔni kɛra nge gbee te ba wuka. Kpa Yerusalɛmu yu ko bansu. Kpa guu te ta wãa sãa yerɔ tu kikisu kpi.

will be added

X\