Misee 2

1Bɔ̃ruroba be ba ra n kɔ̃sa bwisikumɔ wɔ̃kuru mi ba kpĩ. Bà n seewa buru buru kpa bu ye ko yèn sɔ̃ ba yen dam mɔ. 2Bà n goon gberu binɛ kua, kpa bu tu mwa. Bà n goon diru binɛ kua, kpa bu tu mwa. Ba ra yɛ̃ro ka win yɛnugibu dam dɔrewa kpa bu du bu ben dukia kpuro gura. 3Yen sɔ̃na Yinni Gusunɔ u nɛɛ, wee na kɔ̃san sɔɔru mɔ̀ tɔn ben sɔ̃. Ba ǹ maa kpɛ̃ bu ye duka suuri. Mɛya ba ǹ maa kpɛ̃ bu sĩ ba n wĩiru yɔ̃rasie dam dam. Domi tɔ̃ɔ te ta wee mi, tɔ̃ɔ kɔ̃sura. 4Yen tɔ̃ɔ te, ba koo gɔɔ wura yeni ko bu nɛɛ, wee! Ba bu gura kpuro mam mam. Ben tɔmbu ba ǹ maa tem mɔ. Ba bu gira ben gbean di. Ba ye bɔnu kua ben tii tiinɛ sɔɔ. Mban sɔ̃na ba bu gura nge mɛ. 5Adama saa gaa sisi yè sɔɔ ben goo kun maa tem wasi Yinni Gusunɔn tɔmbu bà n tem bɔnu mɔ̀. 6Ben gaba ba seewa ba Misee sɔ̃ɔwa ba nɛɛ, a ku maa gari suni a n mɔ̀, kɔ̃sa ye, ya weewa kam kam. 7Ba Isireliban bweseru bɔ̃rusiwa? Yinni Gusunɔ u suuru kpanawa? Nge mɛya u ra raa sun kue? Adama Misee bu wisa u nɛɛ, gari doriya na gerumɔ be ba kom gem mɔ̀n sɔ̃. 8Adama bɛɛya Yinni Gusunɔ u sɔ̃ɔmɔ u mɔ̀, i kua win tɔmbun yibɛrɛba. I tɔmbu sɛ̃re be ba wee tabu gberun di i ben yãnu potira. 9I ben kurɔbu gira saa yɛnu si ba kĩn min di, ma i dera ben biba kun maa girima wasi sere ka baadommaɔ yè na raa bu wɛ̃. 10I seewo i doona, i ǹ maa bɔri yɛndu wasi tem mɛ sɔɔ. Wahala baka ya bɛɛ mara bɛɛn mɛm nɔɔbu sarirun sɔ̃. 11Domi Gusunɔn sɔmɔ benin bwesera i ra kã be ba ra bɛɛ weesu kue bu nɛɛ, i ko i tam wa i nɔ, yen tam bɔɔbɔm mam. 12Yinni Gusunɔ u nɛɛ, bɛɛ Isireliba, Yakɔbun bweseru, kon bɛɛ be i tie kpuro mɛnna. Kon bɛɛ mɛnna nge yãanu gɔ̃ɔ teu sɔɔ. Kpa i n wãa sannu nge yãanu kpara yerɔ. Bɛɛn tem mu koo tɔmbu yibu. 13Nɛ, Yinni Gusunɔ bɛɛn sina boko, nɛna na bɛɛ kpare. Kon na n bɛɛ swaa gbiiye. Nɛna kon bɛɛ swaa kɛnia i ka yakiara. I ko i swaa gĩa kpa i yari min di.

will be added

X\