Malasi 3

1Ma Gusunɔ wɔllu ka tem Yinni u wisa u nɛɛ, wee kon nɛn sɔmɔ gɔrima. U koo nɛn swaa sɔmɛ. Kpa Yinni wi i kasu mi, u du win sãa yerɔ subaru sɔɔ. Wee sɔmɔ wi i kĩ mi, u sisi u ka nɛn arukawanin gari kpara. 2Wara koo kpĩ u yɔ̃ra u nùn ma win naarun tɔ̃ɔ te sɔɔ. Nge wara koo kpĩ u yɔ̃ra sanam mɛ u koo kurama. Domi u ko n sãawa nge dɔ̃ɔ wi u ra sisu yaniɛ. Kpa u n sãa nge werem mɛ mu do. 3U koo sina u sun dɛɛrasia nge mɛ ba ra sii geesu yaniɛ bu dɛɛrasie. U koo yãku kowobun bweseru Lefiba dɛɛrasia nge mɛ ba ra wura ka sii geesu dɛɛrasie. Kpa bu Yinni Gusunɔ yãkunu kua nge mɛ wooda ya gerua. 4Saa ye sɔɔ, Yudaba ka Yerusalɛmugibun kɛ̃nu nu koo nɛ Yinni Gusunɔ wɛ̃re nge yellu. 5Kon susima bɛɛn bɔkuɔ n bɛɛ siri. Kpa n dobo dobogibu seesi ka sakara kowobu ka be ba ra bɔ̃re weesu sɔɔ ka be ba ra sɔm kowobun gobi tɛɛsi ka be ba ra gɔminibu ka gobekuba ka sɔbu dam dɔre, ma ba ǹ man nasie. Nɛ, Gusunɔ wɔllu ka tem Yinniwa na yeni gerua. 6Nɛna na Yinni Gusunɔ wi u ra n wãa. Na ku ra kɔsi. Yen sɔ̃na bɛɛ, Yakɔbun bweseru, ba ǹ bɛɛ kpeerasie. 7Saa bɛɛn baababan waatin diya i nɛn woodaba gɛrari. I ǹ ye mɛm nɔɔwɛ. Yen sɔ̃na nɛ Gusunɔ wɔllu ka tem Yinni, na nɛɛ, i gɔsirama nɛn mi, kpa n maa gɔsira bɛɛn mi. Adama i gerumɔ i mɔ̀, amɔna sa ko koosina su ka gɔsira wunɛn mi. 8Ma na bikia na nɛɛ, tɔnu u ra nɛ Gusunɔ nɔni wɔ̃ke? Domi wee, i man nɔni wɔ̃kumɔ. Ma i gerumɔ i mɔ̀, yen yere sɔɔra sa nun nɔni wɔ̃kumɔ. Ma na wisa na nɛɛ, kɛ̃nu wɛ̃ɛbu sɔɔ ka tia tia ye i ra man wɛ̃ wɔkuru baateren wɔllɔ. 9Bɔ̃ruroba i sãa bɛɛ Isireliba kpuro, domi i man nɔni wɔ̃kumɔ. 10I bɛɛn ye i mɔ kpuro subuo suba wɔkuru, kpa i ka man yen sube teeru naawa i doke nɛn arumanin beru yerɔ. Kpa dĩanu nu n wãa nɛn sãa yerɔ. I nɛn laakari mɛɛrio, kpa i wa nà kun kon bɛɛ wɔllu kɛnia n bɛɛ doma bakaru kua. 11Na kon twee gira bɛɛn tem di. Kpa yi ku maa bɛɛn dãa binu sanku. Kon de resɛm ye ya ku ra raa ma yu ma bɛɛn gbeaɔ. Nɛ, Gusunɔ wɔllu ka tem Yinniwa na yeni gerua. 12Bwesenu kpuro nu koo nɛɛ, doo nɔɔrugiba bɛɛ. Domi bɛɛn tem mu ko n doo nɔɔru mɔ. Nɛ Gusunɔ wɔllu ka tem Yinniwa na yeni gerua. 13Yinni Gusunɔ u nɛɛ, bɛɛn gari kun do yi i man gerusimɔ. Ma i mɔ̀, mba i man gerusi. 14I gerua i nɛɛ, kam sɔɔra i man sãamɔ. Arufaani yerà i wa ye i nɛn woodaba mɛm nɔɔwa, ma i nuki sankira i nɔɔ bɔkua i ka nɛ Gusunɔ wɔllu ka tem Yinnin nɔnu geu wa. 15Wee tɛ̃, i tamaa be ba tii sue, bera ba dobu nɔɔmɔ. Mɛya i maa nɛɛ, tɔn kɔ̃sobun arumani ya maa kuuramɔ. Baa bà n Gusunɔ seesi, u ra bu deriwa u kun kɔ̃sa gaa kue. 16Yera be ba Yinni Gusunɔ nasie, ba gerunamɔ. Ma Yinni Gusunɔ u win laakari wesia ben mi, u bu swaa daki. Ma ba be ba nùn nasie ma ba nùn bɛɛrɛ wɛ̃ɛmɔn yĩsa yorua tireru garu sɔɔ win wuswaaɔ. 17Ma Gusunɔ wɔllu ka tem Yinni u nɛɛ, beya ba koo ko nɛgibu tɔ̃ɔ te kon nɛn yiiko sɔ̃ɔsi. Kon bu wɔnwɔndu kua nge mɛ tɔnu u ra win bii wi u nùn nɔɔrimɔ wɔnwɔndu kue. 18Saa yera i ko i wa ye ya gemgii ka tɔn kɔ̃so wunanɛ ka ye ya maa wi u Gusunɔ sãamɔ ka wi u kun nùn sãamɔ wunanɛ. 19Wee tɔ̃ra sisi. Ta sum nge dɔ̃ɔ boko. Saa ye sɔɔ, be ba tii sue ka tɔn kɔ̃sobu ba koo dɔ̃ɔ mwaarawa nge yakasu. Gãanu kun bu tiarammɛ. Nɛ Gusunɔ wɔllu ka tem Yinniwa na yeni gerua. 20Adama bɛɛ be i man nasie, wee ye na bɛɛ sɔ̃ɔmɔ. Kon de nɛn dam mu sɔ̃ɔsira nge sɔ̃ɔ mu bɛɛ faaba ko. Saa ye sɔɔ, i ko i n tii mɔ kpa i n yɔ̃ɔkumɔ ka nuku dobu nge kɛtɛ kpɛmi yi yi yarimɔ saa gɔ̃ɔn di. 21Tɔ̃ɔ te sɔɔ, te kon nɛn yiiko sɔ̃ɔsi, i ko i tɔn kɔ̃sobu taaku. Domi ba ko n sãawa nge torom bɛɛn naasɔ. Nɛ Gusunɔ wɔllu ka tem Yinniwa na yeni gerua. 22I de i nɛn sɔmɔ Mɔwisin yiirebu ka win woodaba mɛm nɔɔwa be na nùn wɛ̃ bɛɛ Isireliba kpuron sɔ̃ Horɛbun guurɔ. 23Nɛ, Yinni Gusunɔn tɔ̃ɔ te, ta kpã, ma ta nanum mɔ. Adama tu sere tunuma, kon bɛɛ nɛn sɔmɔ Eli gɔriama. 24U koo de baababa ka ben bibu bu dora. Ma n kun mɛ, kon na n bɛɛn tem kpeerasia.

will be added

X\