Malasi 2

1Nɛ Gusunɔ wɔllu ka tem Yinni, na nɛɛ, bɛɛ yãku kowobu, bɛɛya na wooda yeni wɛ̃ɛmɔ. 2Ì n maa yina i ye mɛm nɔɔwa kpa i kun man bɛɛrɛ wɛ̃, kon bɛɛ bɔ̃rusi. Kpa doma te i raa mɔ, tu gɔsia bɔ̃ri. Domi i ǹ nɛn woodaba garisi gãanu bɛɛn gɔ̃ruɔ. 3Wee kon bɛɛn bibun bweseru kam koosia. Kpa n bɛɛn yaa sabe ni i ka yãkuru mɔ̀n bisu wisi bɛɛn wuswaaɔ. Kpa bu bɛɛ gura bu kuba ka bii si sannu. 4Saa ye sɔɔ, i ko gia ma nɛ, Gusunɔ wɔllu ka tem Yinniwa na bɛɛ kirɔ ye kua n ka nɛn arukawani sire ye na ka yãku kowobu be ba sãa Lefin bweseru bɔkua. 5Arukawani ye na ka bu bɔkua ya sãawa wãaru ka bɔri yɛndugia. Ma na bu wãa te, ka bɔri yɛn te wɛ̃ kpa bu ka man nasia. Mɛya ba maa man nasia. Ma ba diira nɛn yĩsirun sɔ̃. 6Gema ba ra gere. Kɔ̃sa gaa sari ben nɔɔ sɔɔ. Bɔri yɛndu ka gem sɔɔra ba sĩa nɛn swaa sɔɔ. Ma ba tɔn dabinu gbara kɔ̃san di. 7N weenɛwa yãku kowobu bu tɔmbu Gusunɔn swaa sɔ̃ɔsi. Domi ben min diya ba ra nɔ ye u kĩ yèn sɔ̃ ba sãa wi, wɔllu ka tem Yinnin sɔmɔbu. 8Adama bɛɛ yãku kowobu Lefiba i swaa ye deri. Ma bɛɛn sɔ̃ɔsira dera tɔn dabinu kɔ̃ɔra. I ǹ arukawani ye yibie ye na ka bɛɛ bɔkua. Nɛ, Gusunɔ wɔllu ka tem Yinniwa na yeni gerua. 9Yen sɔ̃, kon de bu bɛɛ gɛm kpa i bɛɛrɛ bia Isireliban suunu sɔɔ yèn sɔ̃ i ǹ nɛn woodaba mɛm nɔɔwɛ, i ku ra maa nɛn tɔmbu garisi tia ì n bu siriammɛ. 10N ǹ tundo turo bɛsɛ kpuro sa mɔ ro? N ǹ Gusunɔ turo u sun taka kua ro? Mban sɔ̃na sa ǹ naanɛ mɔɔsinɛ. Ma sa bɛsɛn baababan arukawani kusiamɔ ye ba ka Gusunɔ bɔkua. 11Yudaba ba kua naanɛ sariba. Ma ba durum baka kua Yerusalɛmuɔ ka Isirelin tem kpuro sɔɔ. Domi ba Yinni Gusunɔn sãa yee te u kĩ too disi doke. Ma ba da ba bũugibun wɔndiaba sua kurɔbu. 12Wi u yenin bweseru mɔ̀, Gusunɔ wɔllu ka tem Yinni u koo yɛ̃ro wuna Yakɔbun bweserun di, baa yɛ̃ro ù n ka kɛ̃nu daamɔ yãku yerɔ. 13Wee ye i kpam mɔ̀. I sumɔ, i weeweenu mɔ̀, ma i Yinni Gusunɔn yãku yeru nɔni yĩresu wisimɔ yèn sɔ̃ u ǹ maa bɛɛn yãkunu mwaamɔ, u ǹ maa kĩ u kɛ̃ru garu mwa bɛɛn nɔman di. 14Ma i gerumɔ i mɔ̀, mban sɔ̃na n sãa mɛ. N sãa mɛ yèn sɔ̃ bɛɛn baawure u ǹ win arukawani yibie ye u ka win kurɔ gbiikoo bɔkua Yinni Gusunɔn wuswaaɔ. 15Yinni Gusunɔ u ǹ bɛɛ kue tia wasi sɔɔ ka bwisikunu sɔɔ? Mba i naa gire sannu. N ǹ Gusunɔ u bɛɛ bibu kɛ̃? Ǹ n mɛn na, i n tii sɛ kpa bɛɛn baawure u ku win kurɔ gbiikoo yina. 16Domi Gusunɔ Isireliban Yinni u kurɔ yinabu ka maa bɔbunu tusa. Yen sɔ̃, i n tii sɛ, kpa bɛɛn goo u ku raa win kurɔ gbiikoo tɔnu kandu kua u nùn yina. 17I dera Yinni Gusunɔ u wasira bɛɛn garin sɔ̃. Adama i gerumɔ i mɔ̀, yen yere sɔɔra i dera u wasira. Yera sanam mɛ̀ sɔɔ i gerumɔ i mɔ̀, wi u kɔ̃sa mɔ̀, wiya u wã Yinni Gusunɔn nɔni sɔɔ. Yɛ̃rowa u ra nùn wɛ̃re. Ǹ kun mɛ, kpa i n mɔ̀, mana Gusunɔ wi u ra siri dee dee mi, u wãa.

will be added

X\