Sãarun Wooda 21

1Yinni Gusunɔ u Mɔwisi sɔ̃ɔwa u nɛɛ, a Aroni ka win bibu sɔ̃ɔwɔ a nɛɛ, yãku kowo u ku raa tii disi doke u wigii goon goru baba 2ma n kun mɔ win mɛro ka win tundon goru ka win tiin biigiru ka win wɔnɔ ka win mɔɔgiru 3ka sere win sesu wi u kun durɔ yɛ̃giru wi ba ǹ gina sue. 4Isireliban suunu sɔɔ, yãku kowo wi, u sãawa ben guro guro. Yen sɔ̃, u ǹ koo tii disi doke ka ben goon goru. 5Goo ù n gu, yãku kowobu bu ku raa ben wii suunun seri kɔni, bu ku raa maa ben toburun beri berika kɔni. 6Mɛya bu ku raa maa tii muriri wasi sɔɔ. Ba ko n wãawa nɛ Gusunɔ ben Yinnin sɔ̃. Ba ǹ nɛn yĩsiru sankumɔ. Domi beya ba ko n da man yãkunu kue ni nu sãa nɛn dĩanu. Yen sɔ̃, ba ko n dɛɛrewa. 7Ba ǹ koo kurɔ tanɔ ǹ kun mɛ wi ba gaba ba ka kpuna sua kurɔ. Ba ǹ maa kurɔ wi u win durɔ yina suamɔ. Domi ba ko n dɛɛrewa ba n wãa nɛ, Yinni Gusunɔn sɔ̃. 8Isireli baawurewa u koo yãku kowo garisi tɔn dɛɛro. Domi wiya u ra ka bɛɛn yãkunu nɛ, nɛ, Yinni Gusunɔn mi. Yen sɔ̃, ba ko n dɛɛrewa, domi nɛ, Yinni Gusunɔ na dɛɛre. Nɛna na bɛɛ gɔsa i n ka maa dɛɛre. 9Yãku kowo goon bii wɔndia ù n tii sekuru dokemɔ u kurɔ tanaru dimɔ, win tundowa u sekuru dokemɔ. Ba koo bii wɔndia wi dɔ̃ɔ mɛniwa. 10Yãku kowo wi ba gum tãre wirɔ u kua yãku kowo tɔnwero, ma ba nùn sãa yãnu dokea, u ku maa win seri sanku goon gɔɔn sɔ̃. Mɛya u ku maa win yãnu gɛ̃ɛku. 11U ku raa goru garu susi u tii disi doke, baa ǹ n win tundo ǹ kun mɛ win mɛron gorun na. 12U ǹ maa yariɔ nɛn kurun di goon gorun sɔ̃, u ku ka kuu te disi doken sɔ̃. Domi ba nùn gum tãre u n ka sãa nɛnɛm. Nɛ, Yinni Gusunɔwa na ye gerua. 13Wɔndia wi u kun durɔ yɛ̃wa yãku kowo tɔnwero u koo sua kurɔ. 14U ǹ koo gɔmini goo sua kurɔ ǹ kun mɛ kurɔ wi ba yina ǹ kun mɛ kurɔ wi ba gaba ba ka kpuna ǹ kun mɛ kurɔ tanɔ. Adama wɔndia wi u kun durɔ yɛ̃wa u koo sua win dusibu sɔɔ. 15Kpa u ku raa bwese tukuru doke win bweseru sɔɔ. Nɛ Yinni Gusunɔwa na nùn gɔsa u n ka dɛɛre. 16Yinni Gusunɔ u maa Mɔwisi sɔ̃ɔwa u nɛɛ, 17a Aroni ka win bibu sɔ̃ɔwɔ a nɛɛ, baa ka win bibun bweserɔ goo ù n alebu gaa mɔ win wasi sɔɔ, yɛ̃ro kun kpɛ̃ u da nɛn kuu te sɔɔ u nɛ, Yinni Gusunɔ dĩanu ganu yãkuru kua. 18Alebugii goo kun kpɛ̃ u nɛn sɔmbu te ko, aa wɔ̃kowa? Aa kɔ̃ri barɔwa? Ǹ kun mɛ yɛ̃ron wuswaa ya kɔsikirewa? 19Ǹ kun mɛ yɛ̃ron naasu ǹ kun mɛ win gãsera bɔɔrewa? 20Ǹ kun mɛ yɛ̃ro u kundu kpiawa? Ǹ kun mɛ u sãawa tɔn kɔmiakubu? Ǹ kun mɛ yɛ̃ron nɔni kpiawa? Ǹ kun mɛ yɛ̃ro taataaru ǹ kun mɛ debu mɔwa? Ǹ kun mɛ win tĩa bii kɔsikira? 21Wi u alebu gaa mɔ wasi sɔɔ gesi Aronin bweseru sɔɔ, u ǹ kpɛ̃ u nɛ, Yinni Gusunɔ yãkuru kua. U ǹ maa kpɛ̃ u ka dĩanu ganu na u ka yãkuru ko nɛn kuu te sɔɔ. 22Adama u koo kpĩ u nɛ, Yinni Gusunɔn dĩa dɛɛranu di. 23Win alebun sɔ̃na u ǹ kpɛ̃ u susi yãku yerɔ ka kuu ten beku kare ten mi. Kpa u ku raa nɛn kuu te disi doke. Nɛ, Yinni Gusunɔwa na ra yãku kowobu gɔsi ba n ka dɛɛre. 24Ma Mɔwisi u Aroni ka win bibu ka Isireliba kpuro gari yi sɔ̃ɔwa.

will be added

X\