Sãarun Wooda 19

1Yinni Gusunɔ u Mɔwisi sɔ̃ɔwa u nɛɛ, 2a Isireliba kpuro sɔ̃ɔwɔ a nɛɛ, i de i n dɛɛre, domi nɛ Gusunɔ bɛɛn Yinni na dɛɛre. 3Yen sɔ̃, bɛɛn baawure u win tundo ka win mɛro bɛɛrɛ wɛ̃ɛyɔ kpa u n da wɛ̃re tɔ̃ɔ wɛ̃rarugiru sɔɔ. Nɛna Gusunɔ bɛɛn Yinni. 4I ku tii bũnu wɛ̃, i ku ra maa bwãaroku gagu seku. 5Ì n nɛ, Yinni Gusunɔ siarabun yãkuru kuammɛ, i tu koowo nge mɛ ta koo ka man wɛ̃re. 6I ko ten yaa diwa dɔma te i ka ye yãkuru kua ǹ kun mɛ sisiru. Adama ye ya tiara sɔ̃ɔ itase, i ko ye dɔ̃ɔ mɛniwa. 7Ì n ye di sɔ̃ɔ itase, na ǹ yãku te mwaamɔ. Domi yaa ye, ya disi duurawa mi. 8Wi u ye di u koo win torarun are wa, domi u ǹ ye garisi nɛgia. Ba koo yɛ̃ro wunawa bɛɛn suunu sɔɔn di. 9Ì n bɛɛn dĩanu gɛ̃ɛmɔ, i ku gɛ̃ ye ya wãa gbee goorɔ. I ku maa bɛɛn gberun dĩanu kunɔnu ko. 10Mɛya i ku maa resɛm gberu sɔɔ resɛm kunɔnu ko ka maa resɛm ye ya wɔruma. I ko ye deriwa sãarobu ka sɔbun sɔ̃. Nɛ Gusunɔ bɛɛn Yinniwa na yeni gerua. 11I ku gbɛni, i ku maa bɛɛn winsim weesu kua ǹ kun mɛ i nùn nɔni wɔ̃ke. 12I ku bɔ̃ri weesugii ko ka nɛn yĩsiru. Domi ì n kua mɛ, i nɛn yĩsiru sankawa. Nɛ Gusunɔ bɛɛn Yinniwa na yeni gerua. 13I ku bɛɛn winsim dam dɔre. I ku maa nùn gãanu mwaari ka dam. I ku bɛɛn sɔm kowon kɔsiaru nɛnɛ sere yam mu ka sãra. 14I ku soso wɔmɛ. I ku maa gãanu yi wɔ̃kon wuswaaɔ ni nu koo nùn sura. I de bɛɛn daa yu sɔ̃ɔsi ma i man nasie nɛ Gusunɔ bɛɛn Yinni. 15I ku murafitiru ko siribu sɔɔ. I ku goon bwɛ̃ɛbwɛ̃ɛru ǹ kun mɛ win dam mɛɛri i ka nùn siri. Adama i ko i bu siriwa nge mɛ baawuren gem mu nɛ. 16I ku gari weesugii kpara bɛɛn tɔnusin sɔ̃. I ku maa nùn gari mani yi yi koo nùn go. 17I ku bɛɛn winsim tusi gɔ̃ruɔ. Adama i nùn gerusio kpa i ku ra tii durum sɔbi win sɔ̃. 18I ku bɛɛn winsim mɔru kɔsie. I ku maa ka goo mɔru nɛnɛ. I bɛɛn tɔnusi kĩɔ nge bɛɛn tii. Nɛ Yinni Gusunɔwa na yeni gerua. 19I de i nɛn wooda yeniba mɛm nɔɔwa. I ku de yɛɛ bwese bweseka yu yɔɔna. I ku dĩa bwesenu yiru duure gbee teeru sɔɔ. I ku yãnu doke ni ba kua ka wɛ̃ɛ bwesenu yiru. 20Goo ù n ka yoo tɔn kurɔ kɔ̃ɔ mɛnna wi ba durɔ kã, adama ba ǹ gina nùn yakie win yorun di, yɛ̃ro u koo yen gobi kɔsiawa, adama ba ǹ bu goomɔ. Domi kurɔ wi, u gina sãa yoo. 21Durɔ win torarun sɔ̃, u koo ka yãa kinɛru na Yinni Gusunɔn wuswaaɔ win kurun kɔnnɔwɔ u ka torarun sɔmbun yãkuru ko. 22Kpa yãku kowo u nùn torarun suurun wororu koosi nɛ Yinni Gusunɔn wuswaaɔ. Saa ye sɔɔra u koo win torarun suuru wa. 23Sanam mɛ i dua Kananin temɔ i kpa, ma i dãa bwese bweseka duura, i ko yen marum garisiwa disigim, wɔ̃ɔ ita. I ǹ mu dimɔ. 24Wɔ̃ɔ nnɛsen marum mɛ ya koo ma, mu ko n sãawa nɛ Yinni Gusunɔgim, i ka man siara tɔ̃ɔ bakarun saa. 25Saa wɔ̃ɔ nɔɔbusen diya bɛɛn tii i ko i n da dãa marum mɛ sɔri i di. Nɛ Gusunɔ bɛɛn Yinniwa na yeni gerua. 26I ku gãanu ganu di ka yɛm. I ku wɛɛ ǹ kun mɛ guru wiru mɛɛri i ka bikiaru ko. 27I ku bɛɛn wirun goo gookan seri kɔni bwɛɛrɛkɛ. I ku maa bɛɛn toburun beri berika kɔni. 28I ku bɛɛn wasi muriri goon gɔɔn sɔ̃. I ku maa bɛɛn wasi yore. Nɛ, Yinni Gusunɔwa na yeni gerua. 29I ku bɛɛn bii wɔndiaba sekuru doke i bu kurɔ tanaru kpɛ̃ɛ sãaru garun sɔ̃, kpa sakararu ka sekuru sariru tu ku raa yibu tem mɛ sɔɔ. 30I n da tɔ̃ɔ wɛ̃rarugiru yaaye kpa i nɛn kuu bekurugiru bɛɛrɛ wɛ̃. Nɛ, Yinni Gusunɔwa na yeni gerua. 31I ku da be ba ra gɔribu sokun mi ǹ kun mɛ sɔrobun mi kpa i ku ra ka tii disi doke. Domi nɛna na sãa Gusunɔ bɛɛn Yinni. 32I wi u seri kpiki mɔ kpuro kpunɔ kpa i durɔ tɔkɔ bɛɛrɛ wɛ̃. I maa nɛ, Yinni Gusunɔ nasio. Domi nɛna na sãa bɛɛn Yinni. 33Sɔɔ goo ù n wãa bɛɛn tem sɔɔ, i ku nùn dam dɔre. 34I ko i nùn kuawa nge kpaa yɛ̃ro, kpa i nùn kĩa nge bɛɛn tii. Domi bɛɛn tii i raa sɔru di Egibitiɔ. Nɛ Gusunɔ bɛɛn Yinniwa na yeni gerua. 35I ku murafitiru ko siribu sɔɔ, ka gãa yĩirubu sɔɔ, ka kiloba sɔɔ ka sakakunu sɔɔ. 36I de bɛɛn kiloba ka bɛɛn sakakunu ye kpuro ya n sãa dee dee. Nɛ Gusunɔ bɛɛn Yinniwa na ye gerua, nɛ wi na bɛɛ yara Egibitin di. 37I nɛn woodaba kpuro mɛm nɔɔwɔ kpa i ye swĩi. Nɛ, Yinni Gusunɔwa na ye gerua.

will be added

X\