Sãarun Wooda 18

1Yinni Gusunɔ u Mɔwisi sɔ̃ɔwa u nɛɛ, 2a Isireliba sɔ̃ɔwɔ a nɛɛ, nɛna na Gusunɔ bɛɛn Yinni. 3I ku ra ko ye ba ra ko Egibitiɔ mi i raa sina. I ku maa ko ye Kananiba mɔ̀ mi na ka bɛɛ dɔɔ. I ku ben komanu swĩi. 4Adama i nɛn woodaba ka nɛn yiirebu mɛm nɔɔwɔ kpa i ye swĩi. Domi nɛna na sãa Gusunɔ bɛɛn Yinni. 5Ǹ n mɛn na, i nɛn gere ka nɛn woodaba mɛm nɔɔwɔ. Wi u ye mɛm nɔɔwa u ko n wãawa yen sɔ̃. Nɛ Yinni Gusunɔwa na yeni gerumɔ. 6Nɛna na wooda yeniba wɛ̃ɛmɔ. Na nɛɛ, bɛɛn goo u ku raa ka win dusi tɔn kurɔ kɔ̃ɔ mɛnna. 7I ku bɛɛn tundo sekuru doke i ka bɛɛn mɛro kɔ̃ɔ mɛnna. Domi u sãawa bɛɛn mɛro. 8I ku ka bɛɛn mɛron nisi goo kɔ̃ɔ mɛnna, domi ì n kua mɛ, i bɛɛn tundo sekuru dokewa mi. 9I ku ka bɛɛn sesu tundo turosi ǹ kun mɛ mɛro turosi kɔ̃ɔ mɛnna baa bà kun bɛɛ seeye yɛnu teu sɔɔ. 10I ku ka bɛɛn nikurɔbu kɔ̃ɔ mɛnna baa ù n sãan na tɔn durɔn bii, ǹ kun mɛ tɔn kurɔn bii. Domi wi u kua mɛ, u tii sekuru dokewa mi. 11I ku ka bɛɛn tundon kurɔ goon bii kɔ̃ɔ mɛnna domi u sãawa bɛɛn sesu. 12I ku ka bɛɛn tiɔ kɔ̃ɔ mɛnna, domi u sãawa bɛɛn tundon dusi. 13I ku maa ka bɛɛn mɛron wɔnɔ ǹ kun mɛ win mɔɔ kɔ̃ɔ mɛnna. Domi u sãawa bɛɛn mɛron dusi. 14I ku maa bɛɛn tundon wɔnɔ ǹ kun mɛ win mɔɔ sekuru doke i ka win kurɔ kɔ̃ɔ mɛnna. Domi kurɔ wi, u sãawa nge bɛɛn tiin mɛro. 15I ku ka bɛɛn bigii kurɔ kɔ̃ɔ mɛnna, domi u sãawa bɛɛn biin kurɔ. 16I ku ka bɛɛn wɔnɔ ǹ kun mɛ bɛɛn mɔɔn kurɔ kɔ̃ɔ mɛnna. Ì n kua mɛ, i nùn sekuru dokewa. 17I ku ka tɔn kurɔ kɔ̃ɔ mɛnna kpa i maa ka win bii kɔ̃ɔ mɛnna, ǹ kun mɛ win nikurɔbu, domi ba sãawa mi dusinu. Ì n kua mɛ, ya sãawa mi tora bakaru. 18I ku bɛɛn kurɔn wɔnɔ ǹ kun mɛ win mɔɔ sua kurɔ sanam mɛ kurɔ win tii u wãa wãaru sɔɔ. Domi ya koo nisinu ma. 19I ku ka tɔn kurɔ mɛnna sanam mɛ u yasa mɔ̀, domi u sãawa disigii. 20I ku ka bɛɛn winsim kurɔ kɔ̃ɔ mɛnna. Ì n kua mɛ, i tii disi koosiwa mi. 21I ku ka bɛɛn bii yãkuru ko bũu wi ba mɔ̀ Mɔlɔkun mi. Domi ì n kua mɛ, nɛ, Yinni Gusunɔn yĩsira i sanka mi. I n yɛ̃ ma nɛna na sãa Gusunɔ bɛɛn Yinni. 22I ku ka bɛɛn tɔn durɔsi kɔ̃ɔ mɛnna nge mɛ i ra ka tɔn kurɔ ko. Domi ya sãawa seku bakaru. 23I ku ka yaa saberu kɔ̃ɔ mɛnna nge tɔn kurɔ. Domi ì n kua mɛ, i tii disi dokewa. Nge mɛya maa tɔn kurɔ goo u ku raa de yaa saberu tu ka nùn mɛnna. Ya sãawa seku bakaru. 24I ku de koma ninin bweseru nu bɛɛ ko disigibu. Domi niya bwese tuku nini nu ra ko ni kon gira bɛɛn suunu sɔɔn di. 25Ba tem mɛn tii disi doke, ma na mu sɛɛyasia ma mu mɛn tɔmbu yarinasia. 26Bɛɛ Isireliba ka bɛɛ sɔbu bɛɛ be i wãa Isireliba sɔɔ, i nɛn gere ka nɛn wooda ye mɛm nɔɔwɔ. Kpa i bwese nin koma sekurugii ni deri. 27Be ba raa sina tem mɛ sɔɔ i sere na, ba koma ni kua ma tem mɛ, mu disi duura. 28Ǹ n mɛn na, bɛɛn tii i ku mu disi doke kpa mu ku raa maa bɛɛ yarinasia nge yellugibu. 29Domi be ba koma nin garu saara Isireliba kpuro sɔɔ, ba koo bu wunawa ben tɔmbun suunu sɔɔn di. 30Nɛna Gusunɔ bɛɛn Yinni. I de i nɛn gere ka nɛn wooda ye mɛm nɔɔwa mam mam. Kpa i ku bwese tuku nin komanu swĩi ni ba ra ko i sere tunuma mini. Kpa i ku ra tii disi doke.

will be added

X\