Sãarun Wooda 17

1Yinni Gusunɔ u Mɔwisi sɔ̃ɔwa u nɛɛ, 2a Aroni ka win bibu ka sere Isireliba kpuro sɔ̃ɔwɔ a nɛɛ, wooda wee ye nɛ, Yinni Gusunɔ na wɛ̃ɛmɔ. 3Isireliba sɔɔ goo ù n kĩ u saberu garu saka sansaniɔ ǹ kun mɛ mi u wãa kpuro, u koo gina ka tu nawa nɛn kuu bekurugirun kɔnnɔwɔ u ka tu yãkuru ko nɛ, Yinni Gusunɔn wuswaaɔ. 4Yɛ̃ro u kun kue mɛ, ba koo nùn sabe ten yɛm bikiawa domi u yɛm yariwa mi. Saa ye sɔɔ, ba koo yɛ̃ro yarawa Isireliban suunu sɔɔn di. 5Wooda yeni ya koo dewa Isireliba bu ka ben yaa sabenu na yãku kowon mi nɛn kuu ten kɔnnɔwɔ bu go nɛ, Yinni Gusunɔn wuswaaɔ. Kpa bu ku raa tu go mi ba tura. Kpa ta n sãa siarabun yãkuru. 6Yãku kowowa u koo ten yɛm mɛ yɛ̃ka yãku yerɔ kuu ten kɔnnɔwɔ. Kpa u ten gum dɔ̃ɔ doke mɛ̀n nuburu ta koo nɛ, Yinni Gusunɔ dore. 7Nge mɛya Isireliba ba ǹ maa ka bũnu yãkuru kuammɛ nìn bwãarokunu nu ka bonu weenɛ. Yeni ya ko n wãawa ben tiin sɔ̃ ka ben bibun bibun sɔ̃ sere ka baadommaɔ. 8Ǹ n mɛn na, Isireli goo, ǹ kun mɛ sɔɔ goo wi u wãa ben suunu sɔɔ, ù n yãku dɔ̃ɔ mwaararugiru mɔ̀, ǹ kun mɛ yãkunu ganu, 9ma u ǹ ka nu nɛ nɛ, Yinni Gusunɔn kurun kɔnnɔwɔ u ka nin yaa go, ba koo yɛ̃ro yarawa ben suunu sɔɔn di. 10Wee wooda ye nɛ, Yinni Gusunɔ na maa wɛ̃ɛmɔ. Isireli goo, ǹ kun mɛ sɔɔ goo wi u wãa ben suunu sɔɔ ù n yɛm di, baa ǹ n mɛren na mu sãa, nɛ, Yinni Gusunɔwa kon yɛ̃ro wɔrima n nùn yara win tɔmbun suunu sɔɔn di. 11Domi yɛm sɔɔra hunde koni kpuron wãara wãa. Na dera i yɛm dendimɔ yãku yerɔ i ka bɛɛn toranun suuru wa. Yɛm mɛya mu ra de tɔnu u win torarun suuru wa. 12Yen sɔ̃na na nɛɛ, Isireliban goo ǹ kun mɛ sɔɔ goo bɛɛn suunu sɔɔ u ǹ yɛm dimɔ. 13Bɛɛ Isireliban goo ǹ kun mɛ sɔɔ goo wi u wãa bɛɛn suunu sɔɔ, ù n yaa gaa mwa taasoru sɔɔ ǹ kun mɛ gunɔ gagu ge ba ra di, u koo yaa ye, ǹ kun mɛ gunɔ gen yɛm yariwa kpa u mu yanim wukiri. 14Domi hunde koni ye ya wasi kpuro, yen wãara wãawa yen yɛm sɔɔ. Yen sɔ̃na na nɛɛ, i ku hunde koni gaan yɛm di. Domi yɛm sɔɔra wãara wãa. Wi u maa yina u mu di, ba koo yɛ̃ro wunawa wigibun suunu sɔɔn di. 15Bɛɛ Isireliban goo, ǹ kun mɛ sɔɔ goo wi u wãa bɛɛn suunu sɔɔ, ù n yaa goru di ǹ kun mɛ yaa ye gbeeku yaa ya go, yɛ̃ro u koo win yãnu teawa kpa u wobure. Adama ka mɛ, u ko n sãawa disigii sere ka tɔ̃ɔ ten yokaɔ u sere dɛɛra. 16Ù kun win yãa ni teye, ma u ǹ wobura, u koo win torarun are mwa.

will be added

X\