Sãarun Wooda 11

1Yinni Gusunɔ u Mɔwisi ka Aroni sɔ̃ɔwa u nɛɛ, 2bu Isireliba sɔ̃ɔwɔ bu nɛɛ, yɛɛ yi ba koo kpĩ bu di wee. 3Ba koo kpĩ bu yaa di ye ya naa kaburosu mɔ ma ya ra tuka ko. 4Adama ba ǹ yɛɛ dimɔ yi yi ra tuka ko tɔna ma yi ǹ naa kaburosu mɔ. Nge mɛya ba ǹ yooyoo temmɔ yèn sɔ̃ ga ǹ naa kaburosu mɔ baa mɛ ga ra tuka ko. Ba koo gu garisiwa yaa disigia. 5Ba ǹ koo yaa ye ba mɔ̀ damaa tem baa mɛ ya ra tuka ko yèn sɔ̃ ya ǹ naa kaburosu mɔ. 6Mɛya ba ǹ koo maa wukun yaa tem domi ga ǹ naa kaburosu mɔ baa mɛ ga ra tuka ko. Ba koo gu garisiwa yaa disigia. 7Mɛya ba ǹ koo maa kurusɔ di. Ga naa kaburosu mɔ adama ga ku ra tuka ko. Ba koo gu garisiwa yaa disigia. 8Bu ku yɛɛ yi di, bu ku maa yin gonu baba. Ba koo yi garisiwa disigii. 9Yɛɛ yi yi maa wãa daanɔ ka nim wɔ̃kuɔ, yi yi wãa nim sɔɔ gesi kpuro yi ba koo di wee. Yiya yi yi kɛ̃ɛritii mɔ ka kokosu sannu. 10Adama yi yi kun kɛ̃ɛritii mɔ ka kokosu sannu, ba koo yi garisiwa disigii. 11Ba ǹ koo yi di. Mɛya bu ku maa yin gonu baba. 12Yɛɛ yi yi gesi wãa nim wɔ̃ku sɔɔ, ka daanɔ, ma yi ǹ kɛ̃ɛritii ka koko si mɔ, ba koo yi garisiwa disigii. 13Gunɔsu sɔɔ, si ba koo garisi disigisu wee, siya gunɔ bakeru ka sere maa si su ra swɛ̃ɛ di ka si su ra yaa di 14ka yaberekunu ka sere si su ka nu weenɛ 15ka gbanamgbaanu ka maa si su ka nu weenɛ 16ka taataanu ka booro ka sere si su ka su weenɛ ka kasa ka si su ka ye weenɛ, 17ka booro bweseru garu ka nim kpakpayɛ, ka booro dãa kɔ̃ɔru 18ka gunɔ gbamgbayaku ka gunɔ si su ra swɛ̃ɛ din bweseru 19ka swãa wĩaku ka si su ka ye weenɛ ka kɔ̃ɔ. 20I ku maa kɔkɔmii ni nu kasa ka naasu mɔ di. 21Adama ni sɔɔ, i ko i kpĩ i di ni nu ra yɔ̃ɔku tem sɔɔ 22nge twea ka gbɔɔ ka ni nu ka ye weenɛ. 23Adama ni nu tie nu kasa ka naasu mɔ mi, i ku nu di. 24Yɛɛ gɛɛ wãa yìn goru tɔnu ù n baba u koo ko disigii. U ko n disi mɔwa sere ka tɔ̃ɔ ten yokaɔ. 25Wi u yin goru sɔɔwa, u koo win yãnu teawa. Kpa u n wãa disi sɔɔ sere ka yokaɔ. 26- 28Yɛɛ yi i ko i garisi disigii yi wee. Yiya yi yi ǹ naa kaburosu mɔ ka yi yi ku ra tuka ko ka sere yi yi naasu nnɛ mɔ yi sĩimɔ ka naa sɛ̃nu. Wi u yin gaa baba u disi duurawa mi sere ka tɔ̃ɔ ten yokaɔ. Wi u maa yin goru sɔɔwa u koo win yãnu teawa kpa u n disi mɔ sere ka tɔ̃ɔ ten yokaɔ. 29Yɛɛ yi yi kabirimɔ sɔɔ wee yi i ko i garisi disigii. Yiya gunɔ yantaru ka gunɔ kiikiiru ka dɛba ka ye ya ka ye weenɛ kpuro 30ka duurubɛɛku ka sureru ka korombɔɔru ka sokoro ka sunɔ naki. 31Yi kpurowa i ko i garisi disigii yɛɛ yi yi kabirimɔ sɔɔ. Wi u yin gaan goru baba u ko n disi mɔwa sere ka tɔ̃ɔ ten yokaɔ. 32Yin gaan goru tà n wɔri dendi yãnu sɔɔ ni ba kua ka dãa ǹ kun mɛ ka bekuru ǹ kun mɛ ka gɔna ǹ kun mɛ ka saaki, dendi yãa ni, nu disi duurawa mi. Ba koo nu dokewa nim sɔɔ sere ka tɔ̃ɔ ten yokaɔ. Yen biru nu sere dɛɛra. 33Yen gaa yà n wekeru garu wɔri te ba kua ka sɔndu, ye ya wãa mi sɔɔ kpuro ya disi duurawa mi. Ba koo weke te kɔrawa. Bà n nim doke weke te sɔɔ, ma nim mɛ, mu tãra dĩanu sɔɔ ǹ kun mɛ nɔrura gaa sɔɔ, ba koo ye kpuro garisiwa disi. 34Bà n nim doke weke te sɔɔ, ma nim mɛ, mu dãare dĩanu sɔɔ ǹ kun mɛ nɔrura gaa sɔɔ, ba koo ye kpuro garisiwa disi baa ǹ n weke tere sɔɔn na ya wãa. 35Mi yaa yen goru ta wɔri kpuro gesi, doo koo yerɔ ǹ kun mɛ pɛ̃ɛ wɔ̃ɔ yerɔ, ba koo ye kpuro kɔsukuwa. Domi ye kpuro ya disi duurawa mi. 36Yaa goo te, tà n wɔri dɔkɔ sɔɔ ǹ kun mɛ daarɔ, i ǹ ko i nim mɛ garisi disi. Adama wi u tu baba u disi duurawa. 37Tà n wɔri dĩa bwese te ba koo duure sɔɔ, dĩa bwese te, ta ǹ disi duure. 38Adama bà n daa dĩa bwese te wasan na bu ka di, ta disi duurawa mi. 39Yaa ye ba ra di yà n ka tii gu, wi u yen goru baba, yɛ̃ro u disi duurawa mi sere n ka ko tɔ̃ɔ ten yoka. 40Wi u yen yaa tema ǹ kun mɛ u yen goru sɔɔwa, u koo win yãnu teawa kpa u n disi mɔ sere ka tɔ̃ɔ ten yokaɔ. 41I ku yɛɛ yi yi kabirimɔn yaa tem 42ka yi yi ra ka nukuru sĩ ka yi yi kabirimɔ ka naasu nnɛ ǹ kun mɛ yi yi naa dabinu mɔ. I ko ye kpuro deriwa mam mam. 43I ku de yɛɛ yin bweseru yi bɛɛ ko disigibu. 44Domi nɛ Gusunɔ na sãawa bɛɛn Yinni. I ko i tii dɛɛrasia kpa i n dɛɛre. Domi na sãawa Dɛɛro. Yen sɔ̃na i ǹ ko i tii disi doke ka yɛɛ yi yi kabirimɔ. 45Nɛna na bɛɛ yarama Egibitin di na n ka sãa bɛɛn Yinni. Yen sɔ̃, i de i n dɛɛre. Domi na dɛɛre. 46Wooda yeni kpurowa na yi yɛɛ kpuron sɔ̃ ka gunɔsu ka yɛɛ yi yi wãa nimɔ ka sere yi yi kabirimɔ. 47Yera ya koo de i n da yaa wunanɛ ye ba koo ka yãkuru ko ka ye ba ǹ ka yãkuru mɔ̀. Mɛya maa ya koo bɛɛ sɔ̃ɔsi yaa ye i ko i di ka ye i ǹ dimɔ.

will be added

X\