Swĩi 5

1Yinni Gusunɔ, a yaayo ye n sun deema. A mɛɛrio a wa nge mɛ sa wãa sekuru sɔɔ. 2Bɛsɛn tem mɛ a sun wɛ̃ mu kua gabugim. Tɔn tukoba ba wãa bɛsɛn diaɔ. 3Bɛsɛn baababa ba gu, ma bɛsɛn mɛrobu ba gɔminiru sɔ̃. Sa wãa tundobu sari. 4Gobiya sa ra kɔsie su sere bɛsɛn tiin dɔkɔn nim nɔ. Gobiya sa ra maa ka bɛsɛn tem dãa dwe. 5Wee, bɛsɛn yibɛrɛba ba sun yoru diisiamɔ. Sa wasire, ba ǹ maa sun wɛ̃rabu wɛ̃ɛmɔ. 6Sa Asirigibu ka Egibitigibu dĩanu kana. 7Wee, bɛsɛn baababa ba kɔ̃sa kua, adama ba ǹ maa ka sun wãa. Bɛsɛra sa yen wahala sɔɔwa. 8Yoba ba kua bɛsɛn yinnibu. Goo maa sari wi u koo sun wɔra ben nɔman di. 9Sa ra bɛsɛn wãaru kari bɔriewa, domi sa ra ka yibɛrɛba tabu kowa gbaburɔ su sere wa su di. 10Gɔ̃ɔrun sɔ̃ bɛsɛn wasi swĩa nge pɛ̃ɛ wɔ̃ɔ yeru. 11Ba tɔn kurɔbu ka wɔndiaba gabirimɔ Yudan tem kpuro sɔɔ ka sere Yerusalɛmuɔ. 12Ba bɛsɛn wirugibu mwɛɛra ba soora doke. Ba ǹ durɔ tɔkɔnu bɛɛrɛ wɛ̃. 13Ba bɛsɛn aluwaasiba mwɛɛra nge yobu bu ka som nam. Ma biba dãa guramɔ ba wɔrukumɔ yen bunum sɔ̃. 14Bɛsɛn bukurobu ba ku ra maa sinɛ bu siribu ko siri yerɔ. Mɛya bɛsɛn aluwaasiba ba ku ra maa womusu ko. 15Bɛsɛn nuku dobu bu kpa. Bɛsɛn nuku dobun yaabu gɔsira nuku sankiranu. 16Bɛsɛn bɛɛrɛ ya kpa. Anna a wahala baka wa tora ni sa kuan sɔ̃. 17Gisɔ sa nuki sankire, ma sa nɔni yĩresu kokumɔ, 18yèn sɔ̃ guu te ba mɔ̀ Siɔni ta kua bansu, ma ta kua gbeeku bɔ̃nun wãa yeru. 19Adama wunɛ Yinni Gusunɔ, a sãawa sunɔ. Kaa n bandu diiwa sere ka baadommaɔ. 20Kaa n sun deriwa n ka tɛ? Mban sɔ̃na kaa n sun duari sere ka baadommaɔ. 21Yinni Gusunɔ, à n nɛɛ, su wurama wunɛn mi, sa ko wurama. A de bɛsɛn wãaru tu wurama nge yellu. 22Kaa n ka sun mɔru baka sãawa? Kaa n sun deriwa mam mam?

will be added

X\