Swĩi 4

1Yinni Gusunɔn sãa yerun wura gea ye, ya tĩra. Ten kpenu nu yari swɛɛ kpuro sɔɔ. 2Yerusalɛmun tɔn be ba raa garisi nge wura gea, ba gisɔ bu garisiwa nge tem mɔnnu. 3Baa ka gbeeku bɔ̃nɔ, nu ra nin binu bom kɛ̃. Adama nɛn tɔmbu ba ǹ ben bibun wɔnwɔndu mɔ. Ba sãawa nge taataa niru te ta wãa gbaburɔ. 4Ba dera ben bii wɛ̃ɛnun yari mani nin darosu sɔɔ nim nɔrun sɔ̃. Bibu ba dĩanu kasu, adama goo sari wi u koo bu wɛ̃. 5Be ba ra raa dĩa geenu di, ba gbisukumɔ swɛɛ sɔɔ. Be ba seeya doo nɔɔru sɔɔ, ba kubanu bũurimɔ. 6Nɛn tɔmbun sɛɛyasiabu bu kpã, bu Sodomugibu kere, wuu ge Yinni Gusunɔ u kpeerasia nɔni kpaki teeru goon nɔma sari mi sɔɔ. 7Ben sina bibu ba raa wɛ̃su bururam kere. Ba mam bom bekum bururam kere. Ben wasin gɔna ra n sɔ̃riwa kpa ben wuswaa ya n ballimɔ nge kpee gobiginu. 8Adama tɛ̃ ba dɔ̃ɔ durom tĩram kere. Ba ku ra maa bu tubu swɛɛ sɔɔ. Ba woorewa sere ben gɔna ya kukunu mani. Ma ben wasi gbere nge dãa gbeba. 9Be ba gbimɔ tabu sɔɔ, ben gɔɔ buram bo n kere be ba ra nɔni sɔ̃ɔre bu woora gɔ̃ɔrun sɔ̃ bu sere gbi. 10Baa mɛ bii mɛrobu ba ben bibu kĩ too, ka mɛ, ba bu yikumɔ ba dimɔ wahala ye ya be, nɛn tɔmbu deeman sɔ̃. 11Yinni Gusunɔ u win mɔru kpuro sɔ̃ɔsi, u Yerusalɛmu dɔ̃ɔ sɔ̃re ma ya dɔ̃ɔ mwaara sere ka yen kpɛɛkpɛɛkuɔ. 12Sina boko goo ǹ kun mɛ tɔn diro goo sari handunia sɔɔ wi u raa tamaa yibɛrɛ u koo kpĩ u du Yerusalɛmun gbãrarun kɔnnɔn di. 13Wahala baka yeni ya nawa Gusunɔn sɔmɔbu ka yãku kowobun toranun sɔ̃. Domi bera ba be ba ǹ toranu ganu kuen yɛm yari Yerusalɛmun swɛɛ sɔɔ. 14Ba ra n sirenɛwa swɛɛ sɔɔ ba n babi nge wɔ̃kobu ba n disi sɔɔwa tɔmbun yɛm sɔ̃. Goo kun kãkɔ u mam ben yãnu baba. 15Bà n da tɔmbun bɔkuɔ, ba ra bu girewa bu nɛɛ, i doonɔ minin di, bɛɛ disigibu. I ku susima i sun baba. Yera ba ra doonɛ min di ba kun yɛ̃ mi ba dɔɔ. Bà n maa wãa bwese tukunun suunu sɔɔ, nu ra bu sɔ̃wa nu nɛɛ, i ku sina bɛsɛn suunu sɔɔ mini n ka tɛ. 16Yinni Gusunɔn tii u bu yarinasia ka mɔru. U ǹ kĩ u bu wa. U ǹ ben yãku kowo goo doke gãanu. U ǹ maa ben durɔ tɔkɔnun wɔnwɔndu kue. 17Sa swaa mɛɛra sa wasira su ka wa mìn di somira koo sun naawa. Sa raa bweseru garu mɛɛra te sa yĩiyɔ ta koo sun faaba ko. Wee, ta ǹ sun faaba kue. 18Yibɛrɛba ba bɛsɛn sanu sanusu mɛɛra, bu ka sun yinari su da wuun batuma sɔɔ. Bɛsɛn gɔɔ turuku kua. Bɛsɛn wãarun tɔ̃ra kpawa mi. 19Bɛsɛn yibɛrɛ be, ba gunɔ bakeru sãabu kere. Ba sun yɔɔru bwɛ̃ɛyɛ gbaburɔ. Ba sun naa gire sere guunu wɔllɔ. 20Bɛsɛn sina boko wi u dera sa wãa, wi, wi Yinni Gusunɔ u gɔsa, wee, ba nùn yina mwa. N deema sa raa nɛɛ, win saabuwa sa ka tii mɔ bwesenun suunu sɔɔ. 21Bɛɛ maa Edɔmuba, bɛɛ be i wãa Usiɔ, i ko kpĩ i nuku dobu ko tɛ̃, adama i n yɛ̃ ma siribu bɛɛ mara. I ko i ko nge be tam mu goomɔ kpa i tereru yɔ̃ra. 22Bɛɛ Yerusalɛmugibu, bɛɛn sɛɛyasiabu kpa. Ba ǹ maa bɛɛ yoru mwaamɔ bu ka doona. Adama bɛɛ Edɔmuba, Yinni Gusunɔ u koo bɛɛ mɔru kɔsia, kpa u bɛɛn toranu terasia.

will be added

X\